Hechos 9

1Te Saulo yac yalbel yuts'inel soc smilel a te jnopojeletic yu'un te Cajwaltic, baht sc'opon te muc'ul sacerdote, 2la sc'an bahel cartahetic ta sinagogahetic ta Damasco, scuenta yu'un teme ya sta winic o ants te ay ta scuenta te Be ini, ya yic'ticlan talel ta chuquel ta Jerusalén. 3Pero c'alal yac ta bahel ta be soc nopol ya xc'ohtix ta Damasco a, repente nax hul stihltes sba ta sjoyobal te Saulo sjahts' c'ahc' tal ta ch'ulchan; 4puch' ta lum te Saulo, la ya'iy c'op te hich la yal: Saulo, Saulo, ¿bin yu'un te yac acontrahimbelon? xchi. 5La yal te Saulo: ¿Mach'ayat a, Cajwal? xchi. Ho'on Jesuson te yac acontrahimbelon; ay awocol yu'un te yac alom ta teq'uel te sni'il te stijojbil wacax, xchi. 6Hahch ta nihquel soc ta xiwel te Saulo, hich la yal: Cajwal, ¿bin yac ac'an ya jpas? xchi. Hahchan, ochan bahel ta pueblo, tey ya xc'ohat ta halbeyel a te bin ya sc'an yac apas, xchi te Cajwaltique. 7Te winiquetic te sjoquinejic te Saulo, tec'ajtic, xch'ayet yo'tanic yu'un, como la ya'iyic te c'op pero mayuc mach'a la yilic. 8Hich te Saulo la stam sba hahchel ta lum, pero c'alal la swic' sit, ma ba la yilix q'uinal. Ha yu'un la snitic ta sc'ab, hich la yotsesic ta Damasco 9banti oxeb c'ahc'al ma ba la yil q'uinal soc ma ba we' uch'. 10Ay jtuhl jnopojel ta Damasco, Ananías sbihil, ta snahalsit hich c'oponot yu'un te Cajwaltic: Ananías, xchi. ¿Li' ayon, Cajwal? xchi te Ananías. 11Halbot yu'un te Cajwaltic: Hahchan, bahan ta calle Derecha sbihil, leha ta sna Judas te jtuhl winic Saulo sbihil, te talem ta Tarso, como yac ta sc'oponel Dios, 12soc ta snahalsit la yil jtuhl winic te Ananías sbihil, te ya x'och tal scajambe sc'ab ta sjol scuenta yu'un ya xjahm sit a, xchi. 13La sjac' te Ananías: Cajwal, bayel ca'iybeyej sc'oblal te winic ini, te bayel la yuts'inlan te mach'atic ch'uhltesbilic awu'un ta Jerusalén. 14Soc yich'ojix orden yu'un te principal sacerdotehetic te ya stsac spisil te mach'atic ya yalbat wocol ta atojol, xchi. 15Halbot yu'un te Cajwaltic: Bahan me, como tsahbilix cu'un te ya yich' bahel te jbihil ta stojol jyanlumetic, ajwaliletic soc te snich'nab Israel. 16Ya ca'be sna' te ya me xc'ax bayel swocol ta scuenta te jbihile, xchi. 17Hich baht te Ananías, och bahel ta na, la scajambe sc'ab ta sjol, hich la yal: Hermano Saulo, te Cajwaltic Jesús te la yac' sba ta ilel ta atojol ta be te banti yacat ta talel, ha la sticonon tal scuenta yu'un ya xjahm asit soc te ya xnoj ta awo'tan te Ch'ul Espíritu, xchi. 18Ora ch'ay cohel ta sit te bin sjel ta suhlil chay, hich la yil xan q'uinal. Hahch te Saulo soc a'bot yich' ha'. 19C'alal we', la yich' xan yip. Ay c'ahc'al la sjoquin te jnopojeletic te ayic ta Damasco. 20Te Saulo ora hahch ta yalel ta sinagogahetic te ha Snich'an Dios te Jesús. 21Spisil te mach'atic la ya'iybeyic sc'op, xch'ayet yo'tanic yu'un, hich la yalic: ¿Ma bal ha'uc te mach'a yac ta slajinel ta Jerusalén te mach'atic ya yich'ic ta muc' te bihilile, soc te ha talem yu'un ya yic' bahel ta chuquel ta stojol te principal sacerdotehetic? xchihic. 22Pero te Saulo la yich' xan yip soc la stsalticlan ta c'op te judíohetic nahinemic ta Damasco, yu'un la yac' ta ilel te ha nix Cristo te Jesuse. 23Bayel c'ahc'al ta patil te judíohetic la schahpambeyic sc'oblal ta milel te Saulo; 24pero la ya'iy te Saulo te bin chapal sc'oblal yu'unique. C'ahc'al ahc'abal la scanantayic te puertahetic yu'un ya smilic. 25Ha yu'un te jnopojeletic la yiq'uic bahel te Saulo ta ahc'abal, la sjihpanic cohel ta muc'ul moch ta pat ts'ahc. 26C'alal c'oht ta Jerusalén te Saulo, c'an sjoquin te jnopojeletic, pero spisilic la xi'ic, ma ba la sch'uhunic te ha jnopojel. 27Ha yu'un te Bernabé la yic' tal te Saulo ta stojol te jpuc-c'opetic, la yalbe ya'iyic bin ut'il la yil ta be te Cajwaltic soc te c'oponot yu'un, soc te bin ut'il ta Damasco soc yip c'opoj ta scuenta sbihil Jesús. 28Hich te Saulo la sjoquin te jnopojeletic ta Jerusalén; ya x'och soc ya xloc' bahel, 29soc yip c'opoj ta scuenta sbihil Jesús, soc la stsal sba ta c'op soc te judíohetic te ochemic ta griego; pero c'an smilic te Saulo. 30C'alal hich la ya'iyic te yermanotac, la yiq'uic bahel ta Cesarea, la sticonic bahel ta Tarso. 31Hich lamal q'uinal la ya'iyic te iglesiahetic ta spahmal sq'uinal Judea, Galilea soc Samaria; behbe yich'bel yipic soc spisil ora la yich'ic ta muc' Cajwaltic, soc behbe p'ohlel soc yich'bel yip yo'tanic ta scuenta te Ch'ul Espíritu. 32Te Pedro behen ta yilel te jnopojeletic, c'ax yil te mach'atic ch'uhltesbilic te nahinemic ta Lida. 33La sta jtuhl winic tey a, Eneas sbihil, ayix waxaqueb ha'bil ay ta swayib, yu'un chamen schihal yoc sc'ab. 34Hich halbot yu'un te Pedro: Eneas, ha ya slecubtesat ta achamel te Jesucristo; hahchan, chahpana awayib, xchi. Ora hahch te Eneas. 35La yilic spisil te mach'atic nahinemic ta Lida soc ta Sarón, hich la suhtes yo'tanic ta stojol te Cajwaltique. 36Ta Jope ay jtuhl ants te ha jnopojel, Tabita sbihil, (Dorcas, xchi te c'asesbile). Bayel la spas lequil a'teliletic soc la yac'ticlan ta mahtanil staq'uin. 37Tsahc ta chamel, cham. C'alal laj yatintesbelic, la xahch'anic ta jtsahl-na. 38Te bin ut'il nopol yiloj sba soc Jope te Lida, la ya'iyic te jnopojeletic te tey ay a te Pedro, ha yu'un la sticonic bahel cheb winiquetic ta yalbeyel wocol: Ora me xtalat, xchihic c'ohel. 39Hich hahch te Pedro soc la sjoquin bahel. C'alal c'oht tey a, la yiq'uic ochel ta jtsahl-na te banti joytaybil yu'un spisil me'ba' antsetic, yacalic ta oq'uel soc yac yac'belic ta ilel te c'u'ul pac'aletic pasbotic yu'un Dorcas te c'alal sjoquinejic to a. 40Te Pedro la sticon loq'uel spisilic, la squejan sba soc la sc'opon Dios; la sut sba ta stojol te chamen baq'uet soc hich la yal: Hahchan, Tabita, xchi. La swic' sit te Tabita, c'alal la yil te Pedro, la shuhcan hahchel sba. 41Te Pedro la stsac hahchel ta sc'ab; la yic' tal te mach'atic ch'uhltesbilic soc te me'ba' antsetic, cuxulix a la ya'be ta stojolic. 42Ta spisil Jope puhc ta halel sc'oblal, tsobol mach'atic la sch'uhunic te Cajwaltique. 43Te Pedro bayel c'ahc'al halaj ta Jope ta sna Simón te ya'telinej sc'a'tesel nuhcul.


Copyrighted Material
Learn More

will be added

X\