Hechos 6

1Ta hich ora, te bin ut'il yac ta p'ohlel te jnopojeletic, hahchic wulajanel te griegohetic ta stojol te hebreohetic yu'un te me'ba' antsetic ma ba ts'acal yac yich'belic te bin ya yich' pucticlambeyel jujun c'ahc'al. 2Ha yu'un te lahchaytuhl jpuc-c'opetic la stsobic tal spisil te jnopojeletic, hich la yalbeyic: Ma snuhp'uc te ya jquehchancotic yalel sc'op Dios yu'un ya ca'telincotic mac'linwanej. 3Ha yu'un quermanotac, lehahic huctuhl winiquetic ta awohlilic te lec sc'oblalic, te nojel ta yo'tanic te Ch'ul Espíritu soc te ay sp'ijil yo'tanic, ha me ya ca'betic scuentahinic te a'tel ini. 4Te ho'otcotique ya ca'telincotic sc'oponel Dios soc yalel sc'op Dios, xchihic. 5Lec la ya'iyic spisilic, hich la stsahic te Esteban, te ay sch'uhunel yo'tan ta lec soc te nojel ta yo'tan te Ch'ul Espíritu; soc te Felipe, Prócoro, Nicanor, Timón, Parmenas soc te Nicolás te talem ta Antioquía, te ma judíohuc pero te yac'oj sba ta judíohil. 6La stehc'ambeyic ta stojol te jpuc-c'opetic, te ha la sc'opombeyic Dios soc la scajanlambe sc'abic ta sjolic. 7Puhc xan ta lec te sc'op Dios soc bayel p'ohl te jnopojeletic ta Jerusalén; soc ay tsobol sacerdotehetic la yich'ic ta cuenta te bin ay ta ch'uhunel. 8Te Esteban, bayel yutsil yo'tan soc bayel yip, la spas muc' jchahp a'teliletic soc señahiletic ta yohlil te ants-winiquetique. 9Pero ay mach'atic ayic ta scuenta te sinagoga yu'un te mach'atic libre ayic sbihil, soc te mach'atic talemic ta Cirene, Alejandría, Cilicia soc ta Asia te hahch sten sbahic ta c'op soc te Esteban. 10Pero ma ba hu' yu'unic stsalbeyel te sp'ijil yo'tan soc te Espíritu te ha c'opoj ta scuenta. 11Ha yu'un la stojic lotil testigohetic te yacuc yalic te la ya'iyic te yac ta sbohlc'optayel te Moisés soc te Diose. 12Hich la shachbeyic yo'tan te pueblo, te mamaletic soc escribanohetic; ochic ta banti ay te Esteban, la stsaquic loq'uel, la yiq'uic tal ta stojol te chahpajibal. 13La stehc'anic lotil testigohetic te la yalic: Ha'i winic ini ma scom sba ta sbohlc'optayel ha'i ch'ul awilal ini soc te Ley. 14La jca'iycotic te la yal te Jesús talem ta Nazaret ya me sjin ha'i ch'ul awilal ini soc ya me sjeltay te costumbrehetic la ya'botic hilel te Moisés, xchihic. 15Spisil te mach'atic huhcajtic ta chahpajibal, c'alal la yilbeyic sit yelaw te Esteban, la yilic te sjel ta sit yelaw ch'ul a'bat.


Copyright
Learn More

will be added

X\