Hechos 3

1Te Pedro soc Juan bahtic ta Templo ta oxeb ora suhtel c'ahc'al a, ha te yorahil sc'oponel Dios. 2Ay jtuhl winic, coxo' ta yayinab to, te jujun c'ahc'al ya x'ic'ot tal ta yochibal te Templo te T'ujbil Ochibal sbihil, scuenta yu'un ya sc'ambe limosna te mach'atic ya x'ochic bahel ta templo. 3Te c'alal la yil te Pedro soc Juan te yaquic ta ochel bahel ta Templo, la sc'ambe te yacuc x'a'bot limosna. 4Te Pedro soc te Juan la yilbeyic sit te coxo' winic, hich la yal te Pedro: Ilawotcotic, xchi. 5Hich la sq'uehlan sit ta smahliyel yil bin ya x'a'bot. 6La yal te Pedro: Mayuc plata ni oro cu'un, pero te bin ay cu'un ya ca'bat: Ta scuenta sbihil Jesucristo talem ta Nazaret, hahchan, behenan, xchi. 7Hich la stsac ta swa'el-c'ab, la snit hahchel; ora la yich' yip te yoc soc te snuc' yoc; 8xijluj hahchel, la stehc'an sba soc hahch ta behel; la sjoquin ochel ta Templo, yac ta behel, yac ta wihlel soc yac ta yalbeyel yutsilal te Diose. 9Spisil te pueblo la yilic te yaquix ta behel soc yac ta yalbeyel yutsilal te Diose. 10La sna'beyic sba te ha te mach'a spisil ora ya shuhcan sba ta c'ambajel ta yochibal te Templo te T'ujbil Ochibal sbihil; xcham yo'tanic yu'un soc xiwic yu'un te bin c'oht ta pasel. 11Te coxo' winic lecubenix stsacoj te Pedro soc Juan, spisil ants-winiquetic xcham yo'tanic, soc la stsob tal sbahic ta banti ayic ta slehch-na yu'un Salomón sbihil. 12C'alal hich la yil te Pedro, hich hahch yalbe te ants-winiquetique: Winiquetic yu'un Israel, ¿bin yu'un xcham awo'tanic yu'un ini? ¿Bin yu'un te ho'otcotic yac awilotcotic, te yac acuyic te ta scuenta cu'elcotic o ta scuenta lec co'tancotic ta stojol Dios te la jcac'cotic behenuc te winique? 13Ha nix te Dios yu'un Abraham, Isaac, Jacob, soc te Dios yu'un te jme'jtatic, la yac' ta ich'el ta muc' te Snich'an, ha te Jesús, ha nix te mach'a la awaq'uic ta c'abal soc te la amuc ta awo'tanic ta stojol Pilato te c'alal c'an scoltay bahel stuquel. 14Ha'ex la amuc ta awo'tanic te Mach'a Ch'ultesbil soc te Mach'a Toj Yo'tan, ha la ac'ambeyic scoltayel te jmilawe; 15la amilic te J'ac'-cuxlejal, pero Dios la scha'cuxajtes tal ta yohlil mach'atic chamenic, ho'otcotic testigohotcotic yu'un. 16Ha ta scuenta sch'uhunel yo'tan ta stojol Jesús te la yich'ix yip ha'i winic ini te yac awilbelic soc te yac ana'beyic sbahe. Ha te sch'uhunel-o'tanil ta scuenta Jesús te la yac' lecubuc ta jc'axel ha'i winic ini te ay ta atojolique. 17Yo'tic, quermanotac, ya jna' te hich la apasic ta scaj te ma ba la ana'ic, soc ha nix hich te principaletic awu'unique. 18Pero Dios hich la yac' c'ohtuc ta pasel te bintic halbil yu'un spisil te jalwanejetic: te ya me xc'ax swocol te Cristo. 19Ha yu'un suhtesa awo'tanic soc suhtanic tal ta stojol Dios scuenta yu'un ya yich' tup'el amulic; scuenta yu'un yacuc xloc' tal ta stojol Cajwaltic te yorahil ya xlecub cuxlejalil, 20soc te yacuc sticon tal te Cristo, te nahil halbotex sc'oblal. 21Ya sc'an ya xhil ta ch'ulchan ha to c'alal ya sta yorahil ya scha'lecubtes spisil bintic ay, ha te la yal Dios ta scuenta te ch'ul jalwanejetic yu'un ta namey tal, 22como hich la yal te Moisés: Te Cajwaltic Dios awu'unic ya me schicnajtes jtuhl jalwanej ta yohlil te awermanotac hich te bin ut'il ho'on; ya me awa'iyic spisil bintic ya yalbeyex, 23soc spisil te mach'a ma ba ya ya'iybe sc'op, ya me yich' bulel loq'uel ta pueblo, xchi. 24Spisil te jalwanejetic c'alal Samuel soc ta patil, te jayeb c'opojic, ha nix la yalbeyic sc'oblal te yorahil ayotic. 25Ha'ex yal-snich'anex te jalwanejetic soc ay ta acuentahic te c'op chapbil yu'un Dios soc te jme'jtatic, te hich la yalbe te Abraham: Ta scuenta ats'umbal ya x'a'bot bendición spisil ta chahp te mach'atic ayic ta bahlumilal, te xchihe. 26Te c'alal Dios la scha'cuxajtes te a'bat yu'un, ha nahil la sticon tal ta atojolic yu'un ya ya'beyex bendición scuenta yu'un jujutuhl ya yihquitay hilel te schopolile, xchi te Pedro.


Copyright
Learn More

will be added

X\