Hechos 25

1C'alal c'oht te Festo ta sq'uinal Cesarea, oxeb c'ahc'al ta patil mo bahel ta Jerusalén. 2Te principal sacerdotehetic soc te mach'atic ich'bilic ta muc' yu'un te judíohetic, c'oht slehbeyic smul te Pablo ta stojol. 3La yalbeyic wocol te yacuc sticon ta iq'uel tal ta Jerusalén te Pablo, yu'un schapoj sc'opic te ya smilic ta be. 4Pero la yal te Festo te ay ta cárcel ta Cesarea te Pablo, soc te nopol ya xbaht tey a. Soc hich la yal: 5Ha yu'un te mach'atic yich'oj ya'tel ta awohlilic ac'a sjoquinonic bahel; teme ay smul te winique, ac'a yalic tey a, xchi. 6Ay wan waxaqueb c'ahc'al o lajuneb c'ahc'al te halaj xan tey a, patil baht ta Cesarea. Ta schebal c'ahc'al la shuhcan sba ta chahpajibal soc la sticon ta iq'uel tal te Pablo. 7C'alal tal te Pablo, te judíohetic talemic ta Jerusalén la sjoytayic, bayel la slehbeyic smul, pero ma ba hu' yu'unic yaq'uel ta ilel teme melele. 8Hich la yal te Pablo ta scoltayel sba: Mayuc jtahoj jmul ta stojol te Ley yu'un te judíohetic, o ta stojol te Templo o te César, xchi. 9Pero te Festo yo'tan spasbe te bin lec yo'tanic yu'un te judíohetic, ha yu'un la sjoc'obe te Pablo: ¿Ya bal ac'an ya xmohat bahel ta Jerusalén yu'un tey yac awich' chahpanel ta jtojol a? xchi. 10La yal te Pablo: Ayonix ta chahpanel yu'un César ta banti ya sc'an ya quich' chahpanel. Ana'oj ta lec te mayuc bin chopol la jpasbe te judíohetique. 11Teme ay bin chopol jpasoj te bin scuenta lajel, ma ba ya cal te ma ba ya xlajon yu'un; yan teme mayuc hich jpasoj te bin ya yalbonic, mayuc mach'a ya xhu' ya yac'on ta sc'abic. Ha ya jc'an ya schahpanon te César, xchi. 12Ha yu'un te Festo, c'alal la yich'be sc'op te yantic te yich'oj ya'telic soc, hich la yal: La ac'an ya schahpanat te César, ta stojol César ya xbahat, xchi. 13Cheb oxeb c'ahc'al ta patil, talic ta Cesarea te ajwalil Agripa soc Berenice yu'un ya spatbeyic yo'tan te Festo. 14Te bin ut'il bayel c'ahc'al halajic tey a, te Festo la yalbe te ajwalil te bin ut'il ay sc'oblal te Pablo, hich la yal: Ay jtuhl winic hil ta chuquel yu'un te Félix; 15c'alal c'ohon ta Jerusalén, te principal sacerdotehetic soc te mamaletic yu'un te judíohetic la yalbeyic smul soc la sc'ambeyic slajel. 16La jcalbeyic te ma hichuc ya spasic te romanohetic te ya yaq'uic ta milel, teme ma nahiluc ya sitin sba ta c'op soc te ya xhu' ya scoltay sba yu'un te smul lehbote. 17Ha yu'un c'alal hulon tal soc li'i, ma ba la jc'ases bayel c'ahc'al, ta schebal c'ahc'al la juhcan jba ta schahpanel soc la jticon ta iq'uel tal te winique. 18Pero te c'alal la stehc'an sbahic te jle-muliletic, ma hichuc mulil la yalic te bin ut'il jcuyoj ya yalique. 19Ha nax smul c'ohem yu'unic te bintic sch'uhunej soc sc'oblal Jesús te laj, pero la yal te Pablo te cuxule. 20Ma la jna' bin ut'il ya jchahpan te c'opetic ini; ha yu'un la joc'obe teme ya sc'an ya xbaht ta Jerusalén yu'un tey ya yich' chahpanel a. 21Pero la sc'ambon te Pablo te ha'uc ya xchahpanot yu'un te ajwalil yu'un Roma. Ha yu'un la jcal mandar te ya yich' canantayel ha to c'alal ya jticon bahel ta stojol César, xchi. 22Ha yu'un te Agripa la yalbe te Festo: Ha nix hichon ya jc'an ya ca'iybe sc'op te winique, xchi. Pajel yac awa'iybe sc'op, xchi te Festo. 23Ta schebal c'ahc'al tal te Agripa soc Berenice, buen ich'bilic ta muc' a ochic talel ta muc'ul tsahl na soc te comandantehetic soc principaletic yu'un te pueblo. Ta scuenta smandar te Festo ic'ot tal te Pablo. 24Hich la yal te Festo: Ajwalil Agripa, soc apisilic te li' joquinej jbahtic, li' ay te winic yac awilic, spisil te judíohetic la sc'ambonic ta Jerusalén soc li'i, xjuyetic ta aw te ma ba ya xcuxajix. 25Pero te ho'one mayuc smul la jtahbe te ya xhu' ya xlaj yu'un, soc ha nix yaloj te ya sc'an ya xbaht ta stojol te ajwalil yu'un Roma, ha yu'un la jnop te ya jticon bahel ta stojol. 26Te bin ut'il ma xweht cu'un bin ya calbe bahel ta hun te ajwalil cu'un, hich la jquic' tal ta atojolic, soc nix ta atojol, ajwalilat Agripa, scuenta yu'un teme yac ajoc'obe ta lec hich me ya xweht bin ya jts'ihbay. 27Como ma hichuc ya ca'iy te ya jticon bahel jchuquel teme ma ba ya cal bahel te bin a'bibil smulin, xchi.


Copyright
Learn More

will be added

X\