Hechos 19

1C'alal ay ta Corinto a te Apolos, te Pablo la yocliy bahel te ahc'ol q'uinal, tal ta Éfeso. Ay jnopojeletic la sta tey a, 2hich la sjoc'obe: ¿La bal awich'ic te Ch'ul Espíritu te c'alal la ach'uhunique? xchi. Ma'uc, ma ba ca'iyejcotic teme ay Ch'ul Espíritu, xchihic. 3Te Pablo la yal: ¿Mach'a ta scuenta te la awich'ic ha'? xchi. Ha te ich'-ha' yu'un Juan, xchihic. 4La yal te Pablo: Te Juan la yac' ich'-ha' ta scuenta suhtesel-o'tanil, la yalbe ya'iyic te ants-winiquetic te ya me sch'uhunic te mach'a patil ya xtal yu'une, ha te Jesús, xchi. 5C'alal hich la ya'iyic, la yich'ic ha' ta scuenta te Cajwaltic Jesús. 6C'alal te Pablo la scajanlambe sc'ab ta sjolic, hul ta stojolic te Ch'ul Espíritu; hahchic ta c'op ta yantic c'opiletic soc la yalic sc'op-jalwanej. 7Ay wan lahchaytuhl (12) te winiquetic ta spisil. 8Te Pablo och ta sinagoga, soc yip yo'tan c'opoj oxeb u tey a, la yalbe ta lec sc'oblal te cuentahinel yu'un Dios. 9Pero ay mach'atic tulan la yac' sbahic, ma ba la sch'uhunic, soc la sbohlc'optayic te Be ta comonsitil; hich te Pablo la yihquitay hilel, q'uejel la yic' bahel te jnopojeletique. Jujun c'ahc'al la ya'iy p'ijubteswanej ta escuela yu'un te Tirano. 10Cheb ha'bil hich la spas. Hich la ya'iybeyic te sc'op Cajwaltic spisil te mach'atic ayic ta sq'uinal Asia, judíohetic soc griegohetic. 11Dios la spas jchahp a'teliletic ta scuenta te Pablo, 12ay chuhquilaletic o paq'uetic te la spicbeyic sbaq'uetal a te Pablo la yich'ic bahel ta stojol te jchameletic, hich lecubic ta chamel soc loc' bohl espírituhetic yu'un. 13Pero ay judíohetic te bayuc ya xbehenic ta sloq'uesel pucujetic te la stahbeyic ta halel sbihil te Cajwaltic Jesús ta stojol te mach'atic ay bohl espíritu ta yo'tanic, hich la yalic: Ya calbat mandar ta scuenta Jesús te yac ta yalbeyel sc'oblal te Pablo, xchihic. 14Hich yac ta spasel huctuhl snich'nab te jtuhl judío-winic, Esceva, te jtsobaw yu'un te sacerdotehetique. 15Pero la sjac' te bohl espíritu: Ya jna'be sba te Jesús soc ya jna' mach'a a te Pablo, yan te ha'exe, ¿mach'ahex a? xchi. 16Hich te winic te ay bohl espíritu ta yo'tan wihl ta stojolic, ha hu' yu'un tsalaw, hich watalic soc ay yehchenic a loq'uic ta ahnel tey ta na. 17La ya'iyic spisil te mach'atic ayic ta Éfeso, judíohetic soc griegohetic; bayel xiw yo'tanic ta spisilic yu'un, soc ich'bot ta muc' sbihil te Cajwaltic Jesús. 18Tsobol te mach'atic sch'uhunejic, tal yalic ta jamal te bintic chopol spasojique. 19Ha nix hich te mach'atic ya'telinejic na'ojel la yich'ticlanic tal te hunetic yu'unic, la schiq'uic ta comonsitil. La yich'ic cuenta te stojol te hunetique, wacpic soc ho'bahc' (50,000) ta sehp plata te stojole. 20Hich puhc xan ta lec te sc'op Cajwaltic soc la yich' bayel xan yip. 21Ta patil te Pablo la snop ta yo'tan te ya xbaht ta Jerusalén c'alal laj sbehentaybel te Macedonia soc Acaya; hich la yal: Teme laj co'tan tey a, ya sc'an te ya xbohon ta Roma, xchi. 22Hich la sticon bahel ta Macedonia cheb smohlol ta a'tel, ha te Timoteo soc Erasto, yan te Pablo halaj to xan ta Asia stuquel. 23Ha yorahil a hahch bayel c'op ta Éfeso ta scuenta te Be, 24yu'un ay jtuhl winic, Demetrio sbihil, te ya'telinej slop'tayel ta plata te templo yu'un Diana, bayel ganar la ya'be stahic te jpas-platahetique. 25Ha la stsob tal te mach'atic pajal ya'tel soc, hich la yalbe: Winiquetic, na'bil awu'unic te hich ya jta jc'uhlejaltic; 26pero awilojic soc awa'iyejic te Pablo la yac' te parte ya yac' sbahic bayel ants-winiquetic ta scuenta te bin ya yac' ta nopel, ma ha'uc nax li' ta Éfeso, jteb ma spisiluc te Asia; ha ya yal te ma ha'uc diosetic te bin ya yich' pasel ta c'abal. 27Ma ha'uc nax wocol teme mayuc stuc ya xc'oht te bin ya jpastic ganar a, ha wocol teme mayuc ta ich'el ta cuenta ya xc'oht te templo yu'un te muc'ul antsil-dios Diana soc teme ya xhahch ta jinel te yutsilal te mach'a ich'bil ta muc' yu'un spisil Asia soc swohlol bahlumilal, xchi. 28C'alal hich la ya'iyic, bayel ilinic yu'un, hich la yalic ta aw: ¡Muc' sc'oblal te Diana yu'un te efesiohetique! xchihic ta aw. 29Spisil te pueblo sts'otetic hahchel ta c'op, ta junax la sten ochel sbahic ta teatro, snitojic ochel te Gayo soc Aristarco, te mach'atic talemic ta Macedonia te sjoquinejic te Pablo. 30Te Pablo c'an loc'uc bahel ta stojol te pueblo, pero ma ba ac'ot bahel yu'un te jnopojeletique. 31Soc ha nix hich cha'oxtuhl te yich'oj ya'telic ta Asia, te ha yamigotac te Pablo, la sticonic ta halbeyel te manchuc ya x'och ta teatro. 32Yantic bin la yalic ta aw, como te mach'atic stsoboj sbahic ma ba la sna'ic bin ya spasic, ay tsobolic ma ba la sna'ic bin scuentahil te stsoboj sbahique. 33Te judíohetic la sloq'uesic tal te Alejandro ta stojolic. Hich te Alejandro la shach sc'ab ta comaw, yu'un c'an c'opojuc ta stojol te ants-winiquetique. 34Pero c'alal la sna'beyic sba te ha judío, spisilic junax bin la yalic ta aw jteb ma chebuc ora: ¡Muc' sc'oblal te Diana yu'un efesiohetic! xchihic ta aw. 35Ha yu'un te secretario yu'un te pueblo, c'alal la scom te ipal ants-winiquetic, hich la yalbe: Winiquetic yu'un Éfeso, ¿mach'a a te ma ba sna'oj te Éfeso ha jcanantaywanej yu'un te templo yu'un te muc'ul antsil-dios Diana soc te sloc'omba te co tal ta ch'ulchan? 36Te bin ut'il ma xhu' ta contrac'optayele, ha yu'un ya sc'an yac acom abahic ta aw soc ma me biluc nax ya xhahch apasic. 37Awic'ojic tal ha'i winiquetic ini te ma ba yelc'anejic templohetic soc ma ba ya sbohlc'optayic te antsil-dios awu'unique. 38Teme ay c'op ya sc'an ya yac' ta chahpanel te Demetrio soc te smohloltac ta a'tel, ay chahpajibal soc jchahpanwanejetic; tey ac'a stij sbahic ta c'op a. 39Teme ay to bin yan yac ac'anic, ac'a yich' chahpanel ta mero yorahil tsoblej. 40Como repente ya jmulintic hach-c'op yu'un te bin c'ohtix ta pasel, como mayuc scuentahil te jtsoboj jbahtic li'i, xchi. 41C'alal laj yo'tan ta c'op, la sticonlan bahel te mach'atic stsoboj sbahique.


Copyright
Learn More

will be added

X\