Hechos 17

1Te Pablo soc Silas c'axic ta Anfípolis soc ta Apolonia, c'ohtic ta Tesalónica ta banti ay sinagoga yu'un te judíohetique. 2Och tey a te Pablo, hich te bin ut'il c'ahyem ta spasel. Oxeb semana ta sc'ahc'alel cux-o'tan c'opoj soc, 3la yalbe ya'iyic soc la ya'be sna'ic ta scuenta te Shun Dios te la sc'an te c'ax swocol te Cristo soc te ya xcha'cuxaj tal ta lajel. Soc hich la yal xan: Te Jesús te la jcalbeyex awa'iyic sc'oblal, ha nix te Cristo, xchi. 4Ay mach'atic la sch'uhunic soc la sjoquinic te Pablo soc Silas; soc tsobol griegohetic te yich'ojic ta muc' Dios, soc bayel antsetic te ich'bilic ta muc'. 5Yan te judíohetic te ma ba sch'uhunejic, xti'ton yo'tanic yu'un, la stsobic chopol winiquetic te yacalic tec'lajanel ta calle, sts'otetic hahchel ta c'op soc la shachic c'op ta pueblo. La yochintaybeyic sna te Jasón, yu'un c'an sloq'uesic tal ta stojolic te Pablo soc Silas, 6pero ma ba la stahic, hich la yiq'uic tal te Jasón soc cha'oxtuhl yermanotac ta stojol Dios, c'oht stehc'ambeyic ta stojol te mach'atic ay ya'telic ta pueblo, hich yac yawtaybelic: Ha'ic ini te yac shachbelic c'op ta swohlol bahlumilal, ha nix hich talemiquix li'i, 7soc ha yic'oj ta sna te Jasón. Spisil yac scontrahimbelic smandar César yu'un ya yalic te ay yan ajwalil, ha te Jesús, xchihic ta aw. 8C'alal hich la ya'iyic, hahch bayel c'op yu'un te pueblo soc yu'un mach'atic yich'oj ya'telic ta pueblo. 9Pero la yaq'uic hilel taq'uin te Jasón soc te yantic, hich la scoltayic bahel. 10Ta ora nax ta ahc'abal ticonotic bahel ta Berea te Pablo soc Silas yu'un te yermanotaque. C'alal c'ohtic tey a, ochic ta sinagoga yu'un te judíohetique. 11Te mach'atic ayic ta Berea ha lec xan stalelic a te bin ut'il te mach'atic ayic ta Tesalónica, yu'un spisil yo'tanic la sch'uhunic te sc'op Diose. Jujun c'ahc'al la yo'tantayic yilel te bin ts'ihbabil ta Shun Dios teme hich nix ya yal a. 12Hich ay tsobol mach'atic la sch'uhunic, soc griega-antsetic te ich'bilic ta muc' soc bayel winiquetic. 13C'alal la ya'iyic te judíohetic ayic ta Tesalónica te yac ta yalel sc'op Dios ta Berea te Pablo, baht shachic c'op ta stojol te ants-winiquetic tey a. 14Pero te yermanotac ora la sticonic bahel te Pablo ta ti'mar; yan te Silas soc te Timoteo hilic ta Berea. 15Te mach'atic la yiq'uic bahel te Pablo, c'oht yihquitayic hilel ta Atenas. C'alal halbotic yu'un te Pablo te ac'a taluc te Silas soc te Timoteo, suhtic bahel. 16C'alal yac ta mahliwanej ta Atenas a te Pablo, bayel c'opoj yo'tan yu'un te c'alal la yil te nojel ta loc'ombahetic te pueblo. 17Ha yu'un ta sinagoga te Pablo c'opoj soc te judíohetic soc te mach'atic lec yo'tanic ta stojol Dios, soc jujun c'ahc'al la sc'opon te mach'atic la sta sba soc ta plaza. 18Ay cha'oxtuhl jp'ijubteswanejetic yu'un te epicúreohetic soc yu'un te estóicohetic la stsal sbahic ta c'op soc te Pablo. Ay mach'atic la yalic: ¿Bin ya sc'an ya yal te winic ini te bayel ya xc'opoj? xchihic. Ay yantic la yalic: Yu'un wan yac yalbel sc'oblal yach'il diosetic, xchihic, como yac yalbel sc'oblal te Jesús soc te cha'cuxajele. 19Ha yu'un la yiq'uic bahel te Pablo ta Areópago, hich la yalbeyic: ¿Ya bal awac' jna'cotic te bin yach'il yacat ta yalele? 20Yu'un jchahp ya ca'iycotic te c'op yac awalbele, co'tanuc ya ca'iycotic te bin scuentahil ini, xchihic. 21(Como spisil te mach'atic ayic ta Atenas soc te jbehyometic te tey nahinemiquix a, ha nax ya smulanic yalel soc ya'iyel bintic yach'il.) 22Ha yu'un te Pablo la stehc'an sba ta yohlil te Areópago, hich la yal: Winiquetic yu'un Atenas, ya quil te bayel bintic ach'uhunejic. 23Como te c'alal c'axon bahel ta yilel banti ya yich' ch'uhunel te diosetic awu'unic, la jta jun scajtajib ta chiq'uel mahtanil ta banti hich ts'ihbabil: TE DIOS MA NA'BILUC SBA, te xchihe. Te bin yac ach'uhunic te ma xana'beyic sba, ha te ya calbeyex sc'oblale. 24Te Dios te la spas te bahlumilal soc spisil bintic ay tey a, te ha Yajwal te ch'ulchan soc bahlumilal, ma ba ya xnahin ta templohetic pasbilic ta sc'ab winiquetic, 25soc ma smajambe sc'ab winiquetic, como mayuc bin ya xpasot falta yu'un stuquel, como ha nix te ya ya'be scuxlejal ants-winiquetic soc te ya ya'be yich'ic ic' soc spisil bintic ya xtuhun yu'unique. 26Ta jtuhl nax winic la schicnajtes spisil ta chahp nacionetic yu'un ya xnahinic ta swohlol bahlumilal; soc la schahpambe yorahilic soc te banti ya xnahinic, 27scuenta yu'un yacuc slehic Dios soc ayuc bin ut'il ya stahic ta lehel, aunque ma ba namal ay ta jtojoltic. 28Como ha ta scuenta te cuxulotic, te ya xbehenotic soc te hich ayotic; hich te bin ut'il yalojic te mach'atic awu'unic te ya sna'ic tsahbil c'opetic: Ha sts'umbalotic, te xchihique. 29Ha yu'un, te bin ut'il ha sts'umbalotic te Diose, ma me jcuytic te Dios te ha pajal soc oro, o plata o ton, te ha loc'omba pasbil ta sc'ab winiquetic te hich nax la snop shachel. 30Ta namey mayuc ta cuenta yu'un Dios te bin ut'il ma ba la sna'ic q'uinal, pero yo'tic yaquix spasbel ta mandar spisil ants-winiquetic ta bayuc te ac'a suhtes yo'tanic; 31yu'un schapoj jun c'ahc'al te stojil ya yich' ta c'op te bahlumilal ta scuenta te winic te tsahbil yu'une. Ha la ya'be sna'ic spisil ants-winiquetic ta scuenta te la scha'cuxajtes tal ta lajel, xchi. 32C'alal la ya'iybeyic sc'oblal te cha'cuxajel yu'un te mach'atic chamenic, ay la slabanic, ay yantic la yalic: Yan to buelta ya ca'iycotic xan sc'oblal ini, xchihic. 33Hich te Pablo loc' bahel ta yohlilic. 34Pero ay mach'atic te stsoboj sbahic tey a te la sch'uhunic, la st'unic bahel te Pablo; ha'ic te Dionisio te ochem ta Areópago, soc jtuhl ants, Dámaris sbihil, soc ay to yantic.


Copyright
Learn More

will be added

X\