Hechos 14

1Ta Iconio ochic ta sinagoga yu'un te judíohetic, soc te bin ut'il buen jamal c'opojic, tsobol judíohetic soc tsobol griegohetic la sch'uhunic. 2Pero te judíohetic te ma ba sch'uhunejic la stijbeyic yo'tan soc la sjimbe yip yo'tan te jyanlumetic te yacuc scontrahinic te mach'atic yermano sbahic ta stojol Dios. 3Pero bayel c'ahc'al halajic tey a te Pablo soc Bernabé, soc yip yo'tanic c'opojic ta scuenta te Cajwaltic, te ha la ya'be yip te bin ay ta halel sc'oblal te yutsil yo'tan, ta scuenta spasel jchahp a'teliletic soc señahiletic ta scuentahic. 4Te ants-winiquetic yu'un te pueblo cha'chahp c'ohtic: jchahp la yac' sbahic soc te judíohetic, jchahp la yac' sbahic soc te jpuc-c'opetique. 5Te judíohetic soc te jyanlumetic, soc nix te jcuentahinwanejetic yu'unic, la schapbeyic sc'oblal ta uts'inel soc ta sch'ojel ta ton; 6pero c'alal la sna'ic, ahnic bahel ta Listra soc ta Derbe te ayic ta sq'uinal Licaonia, soc spisil sq'uinal ta sjoyobal, 7tey la spuquic ta halel a te lec yach'il c'ope. 8Ay jtuhl winic ta Listra te hucul tey a te mayuc yip yoc, coxo' ta yayinab to, jc'axel mayuc behenem. 9La ya'iy te bin yac yalbel te Pablo. Te Pablo la yilbe sit, la yil te ay sch'uhunel yo'tan te ya xlecub, 10ha yu'un la yal ta aw: Hahchan, toj xatehc'an hahchel aba ta awoc, xchi. Hich wihl hahchel, hahch ta behel. 11C'alal la yilic te ants-winiquetic te bin la spas te Pablo, hich la yalic ta aw ta licaónica-c'op: Cohemix tal ta jtojoltic diosetic te sjel ta winiquetic, xchihic. 12Te Bernabé la ya'beyic sbihilin Júpiter, te Pablo, Mercurio sbihil c'oht yu'unic, como ha te mach'a c'opoj. 13Te sacerdote yu'un Júpiter, te ay ta yochibal pueblo te templo yu'un, la yic' tal torohetic soc chahpambil nichimetic ta stojol te puertahetic, soc tsobol ants-winiquetic c'an ya'be milbil mahtaniletic. 14C'alal la ya'iyic te jpuc-c'opetic Bernabé soc Pablo, la sch'i' sc'u'ic yu'un soc la sten ochel sbahic ta yohlil te ants-winiquetic, hich la yalbeyic ta aw: 15Winiquetic, ¿bin yu'un hich yac apasic? Pajal winicotic. Ha yac calbelex awa'iyic te yacuc xhil awu'unic te bin mayuc scuentahil ini, te yacuc asuhtes awo'tanic ta stojol te cuxul Dios te la spas ch'ulchan, bahlumilal, mar soc spisil bintic ay tey a. 16Ta namey Dios la ya'be slajin yo'tanic ta spasel bintic la sc'an yo'tan te ants-winiquetique; 17ma yu'unuc te mayuc testigo yu'un, lec bin ya spas, ha te ya ya'botic tal ha'al ta ch'ulchan soc ya yac' sitinuc awal-ts'unubiletic ta yorahil, hich ya ya'botic jwe'eltic soc stse'elil co'tantic, xchihic. 18Aunque hich la yalic, wocol hu' scombelic te ants-winiquetic te ya x'a'botic milbil mahtaniletic yu'unique. 19Pero ay judíohetic te talemic ta Antioquía soc ta Iconio te la sjimbeyic yo'tan te ants-winiquetic; hich la sch'ojic ta ton te Pablo, la stasic loq'uel ta sti'il te pueblo, yu'un la scuyic te chamenix. 20Pero c'alal tal ta joytayel yu'un te jnopojeletic, la stehc'an hahchel sba soc suht ochel ta pueblo. Ta schebal c'ahc'al loc' tey a, baht ta Derbe soc te Bernabé. 21La yalic te lec yach'il c'op tey ta pueblo, tsobol ochic ta jnopojel, patil suhtic xan bahel ta Listra, ta Iconio soc ta Antioquía. 22La smuc'ubtesbe q'uinal ya'iyic te jnopojeletic, la ya'beyic yip yo'tan te manchuc ya xch'ay sch'uhunel yo'tanic, hich la yalbeyic: Hich ya sc'an te ta scuenta bayel jwocoltic ya x'ochotic ta cuentahinel yu'un Dios, xchihic. 23La slehic ancianohetic ta jujun iglesia, la scom swe'elic soc la sc'opombeyic Dios, hich la ya'beyic ta sc'ab te Cajwaltic te ha sch'uhunejiquixe. 24C'axic ta Pisidia, c'ohtic ta Panfilia. 25La yalic sc'op Dios ta Perge, patil cohic bahel ta Atalia. 26Tey ochic ta barco a, suhtic xan bahel ta Antioquía ta banti a'botic ta scuenta yutsil yo'tan Dios yu'un spasel te a'tel te hu'ix ta pasel yu'unique. 27C'alal c'ohtic tey a, la stsobic te iglesia, la yalbe ya'iyic te bintic muc' spasticlanej Dios ta scuentahic soc bin ut'il la sjambe yo'tanic te jyanlumetic te ya sch'uhunique. 28Bayel c'ahc'al la sjoquinic tey a te jnopojeletique.


Copyright
Learn More

will be added

X\