Hechos 12

1Ha yorahil a te ajwalil Herodes la sticon ta tsaquel cha'oxtuhl mach'atic ayic ta iglesia yu'un ya yac'ticlambe swocolic. 2La yac' ta milel ta espada te Jacobo, te sbanquil te Juan. 3C'alal la yil te lec yo'tanic yu'un te judíohetic, la yac' ta tsaquel te Pedro. Ha yorahil Q'uin yu'un Pan te ma ba yich'oj levadura. 4Hich la stsac te Pedro, la yotses ta cárcel, la yac' ta sc'ab chanchahp soldadohetic te ayic chantuhl ta jujuchahp yu'un ya scanantayic. Te Herodes ay ta yo'tan te ya yic' loq'uel stehc'ambe ta stojol te pueblo te c'alal ya xc'ax te Q'uin Pascua. 5Hich och ta cárcel te Pedro; pero te iglesia ma ba la scom sbahic ta sc'opombeyel Dios ta stojol. 6C'alal pajel xanix ya x'ic'ot loq'uel yu'un Herodes, ha nix ta ahc'abal a, wayal ta yohlil cheb soldadohetic te Pedro, chucul ta cha'lihc cadena, soc ay jcanan-cárceletic yac scanantaybelic te ti'carcel. 7Repente nax c'oht stehc'an sba ch'ul a'bat yu'un te Cajwaltic, soc xlipet sts'anabul ta yutil te cárcel; c'oht stijbe smochbaquel te Pedro, hich la yal: Hahchan ta ora, xchi. Ora pohl hilel te cadenahetic chucticlambil sc'ab a. 8Halbot yu'un te ch'ul a'bat: Chuca ach'uht, lapa atep, xchi. Hich la spas te Pedro. Soc halbot xan: Meya aba ta amuc'ul-c'u', la' t'unawon, xchi. 9Hich te Pedro la st'un loq'uel te ch'ul a'bat, pero ma ba la sna' teme melel te bin yac ta spasel te ch'ul a'bat, la scuy ta snahalsit. 10C'axic ta primero soc ta schebal jcanan-cárcel, c'ohtic ta ti'carcel pasbil ta taq'uin te ya xjahm bahel ta sbehlal te pueblo, jahm ta stuquel. Hich loq'uic bahel, c'axic ta jun calle, tey ihquitayot yu'un a te ch'ul a'bat. 11C'alal la sna' q'uinal te Pedro, hich la yal: La jna'ix te melel te Cajwaltic la sticon tal ch'ul a'bat yu'un soc la scoltayonix loq'uel ta sc'ab te Herodes soc spisil bintic yac smahliybel te judíohetic, xchi. 12Te bin ut'il hich sna'oj, baht ta sna te María te snan te Juan, te Marcos yan sbihil, ta banti bayel stsoboj sbahic ta sc'oponel Dios. 13C'alal c'oht stij te puerta yu'un te yamaq'uil na te Pedro, loc' tal ya'iy jtuhl ach'ix, Rode sbihil. 14C'alal la sna'be sba ta sc'op te ha te Pedro, ma ba la sjam te puerta ta scaj tse'el yo'tan, ahnimal och bahel ta yut na, c'oht yalbe ya'iy te yantic te teq'uelix ta ti'nahil te Pedro. 15¡Sohquem ajol! la yutic. Pero la yal te ach'ix te melele. Ha wan te ch'ul a'bat yu'un, xchihic. 16Pero te Pedro la yac' fuerza ta stijel; te c'alal la sjamic soc la yilic, xch'ayet yo'tanic yu'un. 17Pero la sjimulan sc'ab yu'un yacuc xch'abic, la yalbe ya'iyic bin ut'il coltayot loq'uel ta cárcel yu'un te Cajwaltique. Soc hich la yal xan: A'beyahic sna' te Jacobo soc te quermanotactic, xchi. Hich loc' bahel ta yan lugar. 18C'alal sacub q'uinal, hahch bayel c'op yu'un te soldadohetic te ma ba chicanix te Pedro. 19Te Herodes la yac' ta lehel pero ma ba la sta, hich la yich'ticlan ta c'op te jcanan-cárceletic, la yal mandar te ac'a yich'ic milel. Patil loc' bahel ta sq'uinal Judea te Herodes, hil ta Cesarea. 20Te Herodes ilinem ta stojol te mach'atic ayic ta Tiro soc Sidón; ha yu'un la schap sc'opic, bahtic ta stojol Herodes. Hu' yu'unic te lec c'ohtic ta stojol te Blasto, te tulan ya'tel ta stojol te ajwalil, la sc'anic te yacuc xlahmaj q'uinal, yu'un tey ya sta swe'elic tey ta sq'uinal te ajwalile. 21Ta sc'ahc'alel te chapale, te Herodes c'oht shuhcan sba ta chahpajibal yu'une, slapoj fino pac' scuenta sc'u' ajwalil, hahch ta c'op ta stojolic. 22Hahchic ta aw te pueblo: ¡Ha sc'op jtuhl dios, ma ha'uc sc'op winic! xchihic. 23Ora ehchentesot yu'un ch'ul a'bat yu'un Cajwaltic te Herodes ta scaj te ma ba la yalbe yutsilal te Diose; tohc schanul, cham yu'un. 24Yan te sc'op Dios muc'ub soc puhc xan ta halel. 25Te Bernabé soc Saulo, c'alal ts'acay ya'telic ta Jerusalén, suhtic bahel ta Antioquía; la yiq'uic bahel sjoquinic te Juan, te Marcos yan sbihile.


Copyright
Learn More

will be added

X\