Hechos 10

1Ay jtuhl winic ta Cesarea, Cornelio sbihil, capitán yu'un jtsohb soldadohetic te Italiana sbihil, 2lec yo'tan ta stojol Dios soc yich'oj ta muc' Dios soc sjunal sna; bayel ya sq'uebenlan staq'uin ta pueblo, soc spisil ora ya sc'opon Dios. 3Oxeb wan ora suhtel c'ahc'al a, la yil ta snahalsit och tal jtuhl ch'ul a'bat yu'un Dios te banti ay, hich halbot yu'un: Cornelio, xchi. 4Te Cornelio, la st'ojan sit yilbel, soc xiwel hich la yal: ¿Binti a, Cajwal? xchi. Halbot yu'un: Te sc'oponel Dios awu'un soc te mahtanil taq'uin yac awac', c'ohemix ta stojol Dios scuenta ana'ojibal. 5Yo'tic ticona bahel winiquetic ta Jope, ac'a taluc te Simón, te Pedro yan sbihile. 6Smajambeyej sna Simón te jc'a'tesej-nuhcul, te ay sna ta ti'mar; ha ya yalbat bin ya sc'an yac apas, xchi. 7C'alal baht te ch'ul a'bat te c'oponot yu'un, te Cornelio la yic' tal cheb a'batetic yu'un soc jtuhl soldado te jun yo'tan sch'uhunej Dios; 8c'alal laj yalbel ya'iyic spisil te bin c'oht ta pasel, la sticonlan bahel ta Jope. 9Ta schebal c'ahc'al, te c'alal yacalic ta behel soc nopol ya xc'ohtiquix ta pueblo a, te Pedro mo bahel ta yamaq'uil scha'cajal na ta sc'oponel Dios, nopol sta ohlil c'ahc'al a. 10Ay bayel swi'nal, yo'tanuc ya xwe'; pero te c'alal yac ta chahpambeyel te swe'el, yanij q'uinal la ya'iy: 11La yil jamal te ch'ulchan, ay bin hich yilel te bin ut'il muc'ul sábana licbil ta schanebal schiquin yac ta cohel tal c'alal ta lum; 12ay spisil ta chahp chambahlametic soc chanetic soc ha'mal mutetic tey a. 13Ay mach'a c'oponot yu'un: Hahchan, Pedro, mila ati', xchi sc'oblal. 14La yal te Pedro: Ma'uc, Cajwal, mayuc jwe'oj te bin ma lecuc sc'oblal o te bohloben sc'oblal, xchi. 15Cha'c'oponot yu'un: Te bintic lecuben sc'oblal yu'un Dios, ma xawal te ma lecuc, xchi sc'oblal. 16Oxeb buelta hich c'oht ta pasel, patil ich'ot mohel ta ch'ulchan te sábana. 17C'alal yac sna'bel ta yo'tan a te Pedro bin scuentahil te bin a'bot yil ta snahalsit, te mach'atic ticombilic tal yu'un te Cornelio, te bin ut'il la sjoc'oyic banti ay sna te Simón, hich c'ohtic ta ti'nahil. 18La sjoc'oyic teme tey smajanej na a te Simón, te Pedro yan sbihil. 19Te Pedro, yac ta na'etel te bin scuentahil te bin la yil ta snahalsit, hich halbot yu'un te Espíritu: Yac slehbelat oxtuhl winiquetic. 20Hahchan, cohan bahel, jun awo'tan joquina bahel, yu'un ho'on ticombil cu'un, xchi. 21Hich co bahel te Pedro te banti ay te winiquetic ticombilic tal yu'un te Cornelio, hich la yalbe: Ho'on te yac alebelonique. ¿Bin scuentahil te talemex? xchi. 22La sjaq'uic: Te Cornelio, te capitán-soldado te lec yo'tan ta winiquil soc yich'oj ta muc' te Dios, soc te lec sc'oblal ta stojol spisil te nación yu'un te judíohetic, pasot ta mandar yu'un jtuhl ch'ul a'bat te ya me xtalat ta sna scuenta yu'un ya ya'iybat ac'op, xchihic. 23Hich te Pedro la yic' ochel ta na. Ta schebal c'ahc'al la sjoquin bahel, soc joquinot bahel yu'un cha'oxtuhl te yermanotac ta Jope. 24Ta yan c'ahc'al c'ohtic ta Cesarea. Te Cornelio yac ta mahliywanej, stsoboj tal te smohlol sts'ahquil soc mach'atic c'ux sba ta yo'tan soc. 25C'alal och ta na te Pedro, tal ta tahel yu'un te Cornelio, la squejan sba ta ye'tal yoc ta yich'el ta muc'. 26Pero licot hahchel yu'un te Pedro, hich la yal: Tehc'ana aba, pajal winicotic, xchi. 27Yac ta c'op soc a, och bahel te Pedro soc la sta tsobol mach'atic stsoboj sbahic. 28Hich la yal te Pedro: Ana'ojic te ma xpas ya sjoquin jyanlum te mach'a judío, pero Dios la ya'bonix quil te mayuc mach'a ma lecuc sc'oblal o te bohloben sc'oblal. 29Ha yu'un, te c'alal la aticonon ta iq'uel tal, jun co'tan talon. Ha yu'un ya joc'obeyex: ¿Bin scuentahil te la aticononic ta iq'uel tal? xchi. 30La sjac' te Cornelio: Ayix ta schanebal c'ahc'al ta hichilan ora yacon ta sc'oponel Dios ta jna, ta oxeb ora suhtel c'ahc'al a la jquil te hul stehc'an sba ta jtojol jtuhl winic te ay sts'anabul sc'u' spac', 31hich la yalbon: Cornelio, Dios la ya'iybat ac'op soc na'bil yu'un te mahtanil taq'uin yac awac'. 32Ha yu'un ticona ta iq'uel talel ta Jope te Simón, te Pedro yan sbihil, te smajambeyej sna te Simón te jc'a'tesej-nuhcul te ay sna ta ti'mar; c'alal ya xhul ha me ya yalbat, xchi. 33Ha yu'un ora la jticonat ta iq'uel, ha lec te talate. Yo'tic, jpisilcotic jtsoboj jbahcotic ta stojol Dios yu'un ya ca'iycotic spisil bintic la spasat ta mandar te Diose, xchi. 34Hich hahch ta c'op te Pedro: La jna'ix te mayuc mach'a nax tsahbil yu'un Dios, 35ta spisil nacionetic lec yo'tan yu'un te mach'a yich'oj ta muc' soc te toj bin ya spas. 36Dios la sticombe sc'op ta stojol te snich'nab Israel, la yalbe sc'oblal te lec yach'il c'op scuenta lamal q'uinal ta scuenta Jesucristo, ha te Ajwalil yu'un spisil. 37Ha'ex ana'ojic te bin c'oht ta pasel ta Judea, ha te hahch ta Galilea te c'alal yalbeyejix sc'oblal ich'-ha' te Juan: 38ha te bin ut'il Dios la smal ta Ch'ul Espíritu soc yu'el te Jesús talem ta Nazaret, soc te bin ut'il behen ta spasel lequil a'teliletic soc ta scoltayel spisil mach'atic ay swocolic yu'un te pucuj, como joquimbil yu'un Dios. 39Ho'otcotic testigohotcotic yu'un spisil bintic la spasticlan te Jesús ta sq'uinal Judea soc ta Jerusalén. La sjihpanic ta te', 40pero Dios la scha'cuxajtes ta yoxebal c'ahc'al soc la yac' ta ilel, 41ma ha'uc yu'un spisil te pueblo, ha nax te testigohetic te nahil tsahbilic yu'un Dios, ho'otcotic te la joquincotic ta we'el ta uch'el te c'alal cha'cuxajemix tal ta yohlil mach'atic chamenic. 42Soc la spasotcotic hilel ta mandar te ya me calbecotic ya'iyic te ants-winiquetic soc te ya calcotic ta testigo-c'op te ha nix Jesús te a'bot ya'tel yu'un Dios ta jchahpanwanej yu'un mach'atic cuxajtic soc mach'atic chamenic. 43Ha me te halbil sc'oblal yu'un spisil jalwanejetic te ta scuenta sbihil Jesús ya xpasbot perdón yu'un smul spisil mach'atic ya sch'uhunic, xchi te Pedro. 44Hich yac ta c'op a te Pedro, tal te Ch'ul Espíritu ta stojol spisil te mach'atic yac ya'iybelic te sc'ope. 45Te mach'atic yich'ojic circuncisión te sjoquinejic tal te Pedro, xch'ayet yo'tanic yu'un te ha nix hich te jyanlumetic ta mahtanil la yich'ic te Ch'ul Espíritu, 46como la ya'iyic te yacalic ta c'op ta yantic c'opiletic soc yac yalbebelic yutsilal te Diose. 47Ha yu'un la yal te Pedro: ¿Ay bal mach'a ya xcomotic yu'un te ya yich'ic ha' te mach'atic la yich'iquix te Ch'ul Espíritu hich te bin ut'il te ho'otique? xchi. 48Hich la yal mandar te ya x'a'bot yich'ic ha' ta scuenta sbihil Jesucristo. La yalbeyic wocol te Pedro te yacuc sjoquinic cheb oxeb c'ahc'al tey a.


Copyright
Learn More

will be added

X\