2 Timoteo 3

1Soc ya sc'an te yac ana' ini: Ta slajibal c'ahc'al bahel ya xtal yorahil wocol. 2Ay mach'atic te ha nix c'ux ya ya'iy sbahic, xbiq'uet ta yo'tanic taq'uin, ya stoybe sba sc'oblalic, jbohlc'optaywanejetic, ya sc'axuntaybeyic smandar sme'static, ma sna'ic yalel wocol, chopolic, 3mayuc sc'uxul yo'tanic, mayuc perdón ta yo'tanic, jlehawetic ta c'op, ma scom sbahic, j'uts'inwanejetic, ihlaybil yu'unic te bintic lec, 4j'ac'awetic ta c'abal, ma sna'ic stsahtayel sbahic, stuquel nax muc' ya scuy sbahic, c'ax hich c'ux ta yo'tanic a te bintic ay ta ac'oltayel ta bahlumilal te bin ut'il c'ux ta yo'tanic te Diose, 5sjel te stojil yaquic ta sch'uhunel Dios yilel, pero ya smuc ta yo'tanic te ay yu'el. Jc'axel ma me xajoquin. 6Ha'ic te ya yochintayic nahetic, ya sjuquic bahel antsetic te bayel smulic, te jteb nax stahelic ta spasel bayel ta chahp chijil-o'tanil, 7te spisil ora yaquic ta snopel pero mayuc bin ora ya xhu' ya sna'beyic scuentahil te smelelil c'ope. 8Hich te bin ut'il la scontrahinic Moisés te Janes soc te Jambres, ha nix hich ya scontrahinic te smelelil c'ope; ha winiquetic te chopol spensaric, mayuc sch'uhunel yo'tanic. 9Pero mayuc binti bayel ya xhu' yu'unic spasel, como ya xchicnaj ta ilel ta comonsitil te sbohlilic, hich te bin ut'il te cheb winiquetique. 10Yan te ha'ate at'unoj te nohptesel cu'un, te bin yilel jtalel, te bin jnopoj ya jpas, te sch'uhunel co'tan, te sc'uxul co'tan, te ya xcuhch cu'un spisil, 11bayel uts'inel soc wocol, hich te bin ut'il c'ax ta jtojol ta Antioquía, Iconio soc ta Listra. Bayel c'ax jwocol ta uts'inel, pero ha la scoltayon ta spisil te Cajwaltique. 12Ha nix hich ya me xc'ax swocolic ta uts'inel spisil te mach'atic ya sc'an ya yo'tantayic sch'uhunel te Cristo Jesús. 13Yan te mach'atic chopolic soc te jlo'loywanejetic behbe bohlobelic stuquel, ya xlo'loywanic soc ha nix lo'loybilic. 14Yan te ha'ate teyuc ay awo'tan spisil ora a te bin anopoj soc te bin c'ohem ta awo'tan, como ana'oj mach'a ya'beyejat anop, 15soc te ta awalalil to ana'oj bin ts'ihbabil ta sch'ul Shun Dios, te ha ya xhu' ya ya'bat ap'ijil scuenta colel ta scuenta sch'uhunel awo'tan ta stojol Cristo Jesús. 16Spisil te bin ts'ihbabil hilel ta Shun hich nix la sc'an Dios te ya yich' ts'ihbayel, soc ya xtuhun scuenta nohptesel, tsitsel, tojobtesel soc yaq'uel ta nopel bin stojil ta pasel, 17scuenta yu'un te winic yu'un Dios chapal ya xc'oht yu'un spasel spisil lequil a'teliletic.


Copyright
Learn More

will be added

X\