2 Timoteo 2

1Ha'at, jnich'an, ayuc me yip awo'tan ta scuenta te yutsil-o'tanil te ay ta scuenta te Cristo Jesús. 2Te bintic awa'iyej cu'un ta stojol tsobol testigohetic ha me xawa'be snop winiquetic te jun yo'tanic, te ya xhu' ya ya'beyic snop yantic. 3Cuhchuc me awu'un te wocol hich te bin ut'il lequil soldado yu'un Jesucristo. 4Mayuc mach'a te ochem ta soldadohil te ya xchuc sba ta spasel te bintic yan ay ta pasel ta cuxlejalil li' ta bahlumilal, yu'un ya sc'an te lec yo'tan yu'un te mach'a cuentahimbil yu'une. 5Ha nix hich te mach'a ya ya'iy tsaltamba ta ixta', ma xhu' ya yich' spremio teme ma stojiluc ya spase. 6Te mach'a tulan ya x'a'tej ta q'uinal, nahil ya sc'an ya x'a'tej, patil ya stuhumbe sit. 7Nopilana te bin la jcalbat, ha ya scoltayat ta sna'el spisil te Cajwaltique. 8Na'a me te Jesucristo, te ha sts'umbal David, te cha'cuxaj tal ta yohlil mach'atic chamenic, hich te bin ut'il ya yal te lec yach'il c'op yacon ta yalel, 9te yac ta c'axel jwocol yu'un, asta chuculon ta cadena hich te bin ut'il mach'a bayel smul stahoj. Pero te sc'op Dios ma ba chucul stuquel. 10Ha yu'un spisil ya xcuhch cu'un scuenta yutsil slequil te mach'atic tsahbilic, scuenta yu'un ha'ic nix ya xhu' ya stahic te colel te ay ta scuenta Cristo Jesús, soc te ya sta yutsilalic sbahtel q'uinal. 11Ha smelelil c'op ini: Teme pajal chamotic soc, ha nix hich pajal ya xcuxajotic soc; 12teme ya xc'ax jwocoltic, ha nix hich pajal ya x'ochotic ta cuentahinwanej soc. Teme ya jmuc ta co'tantic, ha nix hich ya smucotic ta yo'tan; 13teme ma junuc co'tantic, stalel jun yo'tan stuquel, como ma xhu' ya smuc sba ta yo'tan stuquel. 14Ac'ticlambeya sna'ic ini, tsitsticlana ta stojol Cajwaltic te manchuc ya sten sbahic ta scuenta c'op; mayuc bin ya xtuhun a, ha nax ya sjimbe yo'tanic a te mach'atic ya ya'iyique. 15Ayuc bin ut'il lec ac'oblal te c'alal yac atehc'an aba ta stojol Dios, hich te bin ut'il mach'a ya x'a'tej te mayuc bin ya xq'uexaw yu'un, te stojil ya sna' stuhunel te smelelil c'ope. 16Ma me xawac' aba a te banti ay howil c'op scuenta nax bahlumilal te mayuc scuentahil, como ha ya yac' te c'unc'un ya yihquitayic hilel ta ch'uhunel te Diose, 17soc te bin ya yaq'uic ta nopel ya xpuhc bahel hichuc c'a'el. Hich c'oht te Himeneo soc te Fileto, 18te la yihquitayic hilel te smelelil c'ope. Ya yalic te c'axemix te cha'cuxajel, hich ya sjimbeyic sch'uhunel yo'tanic yantic a. 19Pero stalel ay te yich'o-ip yu'un Dios soc yich'oj te sellohil ini: Te Cajwaltic ya sna'be sba te mach'atic yu'une, xchi, soc: Ihquitayahic te bin chopol spisil mach'atic ya yich'ic ta muc' sbihil te Cristo, xchi. 20Ta muc'ul na ma ha'uc nax ay bintic ya xtuhun te pasbil ta oro soc ta plata, ay nix tey a te pasbil ta te' soc ta ahch'al; ay bintic ich'bil ta cuenta te banti ya yich' tuhunel, ay yantic te ma ich'biluc ta cuenta te banti ya yich' tuhunele. 21Ha yu'un te mach'a ya spoc sba yu'un te bintic chopol ini, ha ya yich' tuhunel yu'un spasel te bin bayel sc'oblal, ch'ultesbil ya xc'oht, ya xtuhunot yu'un te Cajwaltic soc chapal ta spasel spisil lequil a'telil. 22Ahnan loq'uel ta stojol te bin ya smulan spasel sbaq'uetal te ach'ix-queremetic, t'una te bin stojil ta pasel, te sch'uhunel-o'tanil, sc'uxul-o'tanil soc lamal q'uinal, ha xat'un soc te mach'atic pocbil yo'tanic a ya yalbeyic wocol te Cajwaltique. 23Ma me xawich' ta cuenta te tentamba c'op te mayuc scuentahil, como ana'oj te ha nax ya xhahch c'op yu'une, 24como te a'bat yu'un te Cajwaltic ma xpas ya shach c'op; ha ya sc'an te lecuc yo'tan ta stojol spisil yantic, te ya xhu' yu'un p'ijubteswanej, soc te spisil bin ya xcuhch yu'une. 25Soc yutsil yo'tan ya stojobtes mach'atic ya scontrahinic, yu'un ayuc bin ut'il ya sutesbot yo'tanic yu'un Dios yu'un hich ya xhu' ya sna'beyic scuentahil te smelelil c'op, 26soc hich ya x'ahnic loq'uel ta syac te pucuj te banti chucbilic yu'un ya spasic te bin ya sc'an yo'tan stuquel.


Copyright
Learn More

will be added

X\