2 Timoteo 1

1Pablo, jpuc-c'op yu'un te Jesucristo ta scuenta sc'anojel yo'tan Dios, ta scuenta bin ut'il halbilix ta jamal te ay cuxlejal ta scuenta Cristo Jesús, 2ta atojol, Timoteo, te jnich'an te c'uxat ta co'tan: Ayuc me ta atojol yutsil-o'tanil, sc'uxul-o'tanil soc lamal q'uinal yu'un te Jtatic Dios soc te Cajwaltic Jesucristo. 3Ya calbe wocol te Dios, te jun co'tan cac'oj jba ta a'batinel yu'un hich te bin ut'il te jme'jtat ta namey, c'ahc'al ahc'abal ma xquehchaj jna'belat te c'alal ya jc'opon te Diose. 4C'alal ya jna' te ya'lel asit, co'tanuc ya quilat yu'un ya xtal bayel stse'elil co'tan a. 5Ya xtal ta co'tan te sch'uhunel awo'tan te melel ay ta awo'tan, te nahil ay ta yo'tan te achuchu'me'el Loida soc ta yo'tan te anan Eunice, soc ya jna' te ha nix hich ay ta awo'tan. 6Ha yu'un ya calbat te ya me awac' tihluc xan te mahtanil yu'un Dios te awich'oj ta scuenta te la jcajambat jc'ab ta atojol, 7como te Dios ma ha'uc la ya'botic te espíritu yu'un xiwel, ha la ya'botic te espíritu yu'un yu'el, yu'un c'uxul-o'tanil soc te ya xhu' scomel jbahtic. 8Ha yu'un ma me xq'uexawat ta yalel ta testigo c'op te sc'oblal Cajwaltic, soc ma me xq'uexawat cu'un te bin ut'il ayon ta chuquel ta scuenta, pero ta scuenta te yu'el Dios joquinawon ta sc'asesel wocol ta scuenta te lec yach'il c'ope. 9Dios la scoltayotic soc la yic'otic ta scuenta te ch'ul iq'uel yu'un, ma ha'uc ta scuenta ca'teltic, ha ta scuenta te hich snopoj soc ta scuenta te yutsil yo'tan te la ya'botic ta scuenta Cristo Jesús te c'alal ma to ayuc bin ay a, 10pero ta ora ini ac'bilix ta na'el te bin ut'il chicnaj te Jcoltaywanej cu'untic, ha te Jesucristo, te ta scuenta te lec yach'il c'op la slajin te lajel soc la yac' ta sacal q'uinal te cuxlejal te ma xlaje. 11Te lec yach'il c'op ini ac'oton ta yalbeyel sc'oblal, soc ha jpuc-c'opon soc maestrohon yu'un, 12soc ha scuentahil te yac ta c'axel jwocol yu'une. Pero ma xq'uexawon, como jna'oj Mach'a a te jch'uhunej, soc sch'uhunej co'tan te ay yu'el ta scanantayel te bin ca'beyej scanantaybon ha to c'alal ya sta sc'ahc'alel. 13Canantaya te lequil c'op awa'iyej ta jtojol, soc ayuc me sch'uhunel awo'tan soc sc'uxul awo'tan ta scuenta te Cristo Jesús. 14Ta scuenta te Ch'ul Espíritu te nahinem ta co'tantic, canantaya te bin lec a'botate. 15Ana'ojix te la spihtesonic hilel spisil te mach'atic ayic ta Asia soc nix te Figelo soc te Hermógenes. 16Ac'a yich' c'uxultayel yu'un Cajwaltic sjunal sna te Onesíforo, como bayel buelta la smuc'ubtesbon q'uinal ca'iy soc ma ba q'uexaw yu'un te bin ut'il chuculon ta cadena. 17Pues te c'alal ay ta Roma la yac' fuersa slehbelon ha to c'alal la stahon. 18Ac'a me yich' c'uxultayel yu'un te Cajwaltic te c'alal ya sta yorahil ya xtale. Soc ana'oj ta lec bin ut'il bayel la scoltayotic ta Éfeso.


Copyright
Learn More

will be added

X\