2 Tesalonicenses 2

1Te bin ut'il ay sc'oblal te ya xtal te Cajwaltic Jesucristo soc te ya jtsohb jbahtic soque, ya calbeyexcotic wocol, quermanotac, 2te ma me xyanij ta ora te snopojibal awu'unic soc ma me xiw awo'tanic yu'un sc'op-jalwanej o yan c'op o carta te sjel ta cu'uncotic te ya yal te c'ohtix sc'ahc'alel te Cajwaltique. 3Ma me ayuc mach'a ya slo'loyex ta biluc nax ut'il, como ma ba ya xtal ha to teme c'ohtix ta pasel te tsobol ya yihquitayic sch'uhunel Dios soc te ya xchicnaj te winic yu'un mulil, ha te mach'a ch'ayel ya xbaht, 4te ya scontrahin soc ya stoy sba ta stojol spisil bintic a'bot sbihilin Dios o te bintic ay ta ch'uhuntayel; ya x'och shuhcan sba ta templo yu'un Dios, ya yac' sba ta cuyel ta Dios. 5¿Ma bal yacuc ana'ic te hich nix la jcalbeyex a te c'alal joquex to ahe? 6Yo'tic ana'ojic binti a te combil yu'un, scuenta yu'un ha to ya xchicnaj a te c'alal ya sta yorahil. 7Como hahchemix ta a'tel te bin muquen ay yu'un te bin chopole; ha nax ay mach'a yac ta scomel ta ora ini ha to c'alal ya yich' loq'uesel bahel. 8Tey ya xchicnaj a te mach'a chopol, ha te mach'a ya xjihnot yu'un te Cajwaltic ta sahb nax ye soc te ya xlajinot yu'un te sts'anabul c'alal ya xtale. 9Te mach'a chopol te ya xtale, ya x'a'tej ta scuenta yip te Satanás, ya me xtal spas muc'ul a'tel te ay yip, soc señahiletic soc jchahp a'teliletic scuenta lo'loyel, 10soc spisil lo'loyel yu'un mulil ta stojol te mach'atic ch'ayel ya xbahtic, ta scaj te ma ba c'ux ta yo'tanic te smelelil c'op te ya xhu' ya xcolic yu'un. 11Ha scuentahil te Dios la sticombe tal lo'loyel te ay yip, yu'un hich ya sch'uhunic a te lotiyel, 12scuenta yu'un hich ya xbahtic ta ch'ayel spisil te mach'atic ma ba la sch'uhunic te smelelil c'op, te ha la smulanic spasel te bintic ma stojiluc. 13Ya sc'an te spisil ora ya calbecotic wocol Dios ta acuentahic, quermanotac te c'uxex ta yo'tan te Cajwaltic, te bin ut'il ta shahchibal to tsahbilex yu'un Dios yu'un ya xcolex ta scuenta te ch'ultesel yu'un te Espíritu soc ta scuenta sch'uhunel te smelelil c'ope. 14Ha scuentahil te la yiq'uex ta scuenta te lec yach'il c'op la jcalcotic, scuenta yu'un hich yac atahic a te yutsilal te Cajwaltic Jesucristo. 15Ha yu'un, quermanotac, junuc me awo'tanic soc canantayahic te nohptesel te a'botex anopic, teme ta c'op o ta carta cu'uncotique. 16Ha nix te Cajwaltic Jesucristo soc te Jtatic Dios, te ha la sc'uxultayotic soc la ya'botic yip co'tantic scuenta sbahtel q'uinal soc smuc'ul co'tantic ta scuenta yutsil yo'tan, 17ac'a ya'beyex yip awo'tanic soc ac'a scoltayex ta spasel soc ta yalel spisil bintic lec.


Copyright
Learn More

will be added

X\