2 San Pedro 2

1Ta namey ay lotil jalwanejetic ta yohlil te pueblo Israel, hich te bin ut'il ya me xchicnaj lotil jp'ijubteswanejetic ta awohlilic te muquen ya yotsesic bin ay ta nopel te ya xjinawan, soc ya smuc ta yo'tanic te Cajwaltic te mambil scolelic yu'une. Ha nix yac yich'belic tal castigo te ora ya xtal ta stojolic. 2Ay tsobolic te ya me st'unic te bintic q'uexlaltic sba, soc ha nix ta scuentahic te ya xbohlob sc'oblal te be yu'un te smelelil c'ope. 3Ta scaj sbic'sitayel taq'uin ya me slo'loyex ta scuenta lotil c'op. Ayix ora te quechel yich'belic castigo yu'un, soc yac smahliybel te ch'ayel yu'unique. 4Dios ma ba la spasbe perdón te ch'ul a'batetic te la sta smulic, la sch'ojticlan bahel ta infierno, la yac'ticlan ta chuquel ta yihc'al q'uinal te banti ya smahliyic ich'el ta c'op. 5Soc ma ba la spasbe perdón te mach'atic ayic ta bahlumilal ta namey, la yac' tal puhlel ta stojol te chopol ants-winiquetic, ha nax la scanantay te Noé, te la yalbe sc'oblal te bin toj ta pasel, soc col xan huctuhlic. 6Soc la ya'be castigo te pueblohetic Sodoma soc Gomorra, jc'axel la yac' tanubuc ta c'ahq'uel, ha yich'oq'uehl c'oht te mach'atic ya spasulanic te bintic chopole. 7Pero la scoltay loq'uel te Lot, te toj ta winiquil, te bayel la smel yo'tan yu'un te bintic chopol la spasic te mach'atic chopol yo'tanic, 8(como te mach'a toj ta winiquil ini, te nahin ta yohlilic, jujun c'ahc'al la smel yo'tan yu'un yilel soc ya'iyel te bintic chopol la spasique). 9Te Cajwaltic ya sna' scoltayel loq'uel ta sujel te mach'atic jun yo'tanic ta stojol Dios, soc ya sna' sq'uejel te mach'atic ma tojuc bin ya spasic yu'un ya yich'ic castigo c'alal ya sta yorahil ich'el ta c'op; 10soc c'ax hich a te mach'atic ya st'unic te bintic chopol ya sc'an te sbaq'uetal soc ya sp'ajic te ya xcuentahinotique. Tulan yo'tanic soc biluc ya slomic ta pasel, ma xiwic te ya yixta'c'optayic te mach'atic tulan ya'telic ta ch'ulchan. 11Yan te ch'ul a'batetic, aunque c'ax hich yipic a soc c'ax hich ya xhu' yu'unic a, ma ba ya yalic chopol sc'oblalic ta scontrahinel ta stojol te Cajwaltique. 12Pero te winiquetic ini ya yalbeyic chopol sc'oblal te bintic ma sna'beyic scuentahil; sjelic ta chambahlametic te ma sna'ic q'uinal, te ha nax ayinemic yu'un ya yich'ic tsaquel soc jinel; hich pajal ya xlajic soc. 13Ya me yich'beyic stojol te bintic ma stojiluc la spasic. Ya smulanic spasel ta c'ahc'alel te bintic chopol. Ha sbohlilic soc yabaquilic, ha te mach'atic te c'alal ya sjoquinex ta we'el uch'el ya smulanic spasel bintic chopol. 14Te sitic nojel ta antsiwej, ma xquehchajic ta slehel smulic; ya smonic te mach'atic mayuc yip yo'tanic; c'ahyemic a te spisil bin ya xbic'taj yo'tanic yu'un, ha yal-snich'nab chopol c'oblalil. 15Hilem yu'unic te stojil be, howiyemic ta st'umbeyel sbe te Balaam snich'an Beor, te ha c'ux ta yo'tan te stojol te bin chopole; 16la yich' comel yu'un te bin chopol spasoj, c'oponot yu'un jcoht jcuch-ihcatsil burro te stalel ma xc'opoj, hich c'opoj te bin ut'il winic, la scom te jalwanej te sohquem sjol. 17Ha'ic sloq'uib ha'etic te mayuc ya'lel, soc tocaletic te ya xtenotic yu'un tulan ic'; chapal sc'oblalic te ya xc'oht ayinuquic sbahtel q'uinal ta banti c'ax ihc'. 18Ya xc'opojic ta toyba c'op soc tojol c'op, soc ta scuenta te bin chopol ya smulan ch'ich'-baq'uet ya smonic a te mach'atic ma to haluc ahnic loq'uel ta stojol te mach'atic howiyemic. 19Ya yalbeyic te libre ya xc'ohtic, pero ha'ic nix mosohimbilic yu'un te bin ya xjinawan, como ha moso ya xc'oht yu'un te bin ya xtsalot yu'une. 20Teme ahnemiquix loq'uel ta stojol te sbohlil te bahlumilal ta scuenta te ya sna'beyic sba te Jesucristo te Cajwaltic soc Jcoltaywanej cu'untic, teme ya xchuc xan sbahic soc ya xtsalotic yu'un, c'ax chopol ya xc'ohtic a te bin ut'il ta nahil to. 21Ha lec te manchuc la sna'beyic sba te be yu'un te bin stojil ta pasel, ha wocol te la sna'beyiquix sba a te la swalac'patiy te ch'ul mandaril te a'botique. 22Hich c'oht ta stojolic te bin ya yal te tsahbil c'op ini: Te ts'i'e ya xcha'suht xan ta banti ay te xe, soc te me'chitam te pocbil ya scha'bal xan sba ta ahch'al, xchi.


Copyright
Learn More

will be added

X\