2 San Pedro 1

1Simón Pedro, a'bat soc jpuc-c'op yu'un te Jesucristo, ta stojol te mach'atic ta scuenta stojil yo'tan te Jesucristo te Dios soc Jcoltaywanej cu'untic, stahojic sch'uhunel yo'tanic te pajal st'ujbilal soc te cu'uncotique: 2Ayuc bayel yutsil-o'tanil soc lamal q'uinal awu'unic ta scuenta bin ut'il yac ana'beyic sba te Dios soc te Cajwaltic Jesús. 3Ta scuenta yu'el te Dios la ya'botic spisil te bintic ya xtuhun cu'untic ta jcuxlejaltic soc ta sch'uhunel Dios, ta scuenta te ya jna'betic sba te Mach'a la yic'otic ta scuenta te yutsilal soc t'ujbil ya'tel. 4Ha nix ta scuentahic ini te ay bintic yalbeyejotic te Dios te c'ax t'ujbil soc te muc' sc'oblal, scuenta yu'un ta scuenta bintic yaloj, yac awich'beyic stalel te Dios soc ya x'ahnex loq'uel ta stojol te bin ya xjinawan te ay ta bahlumilal ta scaj chijil-o'tanil. 5Ha yu'un ac'ahic fuersa te ya snuhp'in sba soc te sch'uhunel awo'tanic soc te lec atalelic; teme lequix te atalelic, ya sc'an te ay bintic yac ana'ic; 6teme ay bintic ana'ojic, ya sc'an te yac ana' scomel abahic; teme la ana' scomel abahic, ya sc'an te ya xcuhch awu'unic; teme ya xcuhchix awu'unic, ya sc'an te lec yac ach'uhunic Dios; 7teme la ach'uhunic ta lec, ya sc'an te jun awo'tanic soc awermanotac; teme jun awo'tanic soc awermanotac, ya sc'an te ay sc'uxul awo'tanic. 8Teme awich'ojic ini soc teme yaquic ta p'ohlel ta awo'tanic, ya yaq'uic te ay bintic ya xhu' awu'unic spasel soc te ya sitinex, te bin ut'il yac ana'beyic sba te Cajwaltic Jesucristo. 9Yan te mach'a mayuc yu'un ini, ma ba lec te site, ma xyil q'uinal, ch'ayem ta yo'tan te pocbotix loq'uel te smul la sta ta nahil to. 10Ha yu'un, quermanotac, ac'ahic xan fuersa te smelelil ya xc'oht te iq'uel soc te tsahel awu'unic, como teme hich yac apasic, ma jaymehl ya xyahlex. 11Hich me muc' ya xjambotex ochel sbehlal ta banti ay te cuentahinel sbahtel q'uinal yu'un te Cajwaltic Jesucristo, te Jcoltaywanej cu'untique. 12Ha yu'un ma ba ya xlaj co'tan te ya calbeyex ini, aunque ana'ojiquix soc junix awo'tanic ta stojol te smelelil c'op awich'ojiquix. 13Stojil ya ca'iy te ya hultesbeyex awo'tanic te jayeb xan c'ahc'al cuxulon soc jbaq'uetal, 14yu'un jna'oj te ma ba halix c'ahc'al ya quihquitay hilel te jbaq'uetal, hich te bin ut'il la ya'bon jna' te Cajwaltic Jesucristo. 15Soc ya cac' fuersa te ayuc bin ut'il ya xhu' yac ana'ulanic spisil ora ha'i c'op ini te c'alal wayemix jbaq'uetal a. 16Te c'alal la jca'beyexcotic ana'ic bin ut'il ay sc'oblal te ya xtal te Cajwaltic Jesucristo soc bin ut'il ay sc'oblal te yu'el, ma ba jt'umbeyejcotic nopbil cuentohetic, ho'otcotic nix la jquilcotic ta jsitcotic te smuc'ul yutsilale. 17Ha ac'ot ta ich'el ta muc' soc a'bot yutsilal yu'un te Dios Tatil te c'alal chicnaj tal c'op ta stojol te Muc'ul Utsilal te hich la yal: Ha Jnich'an ini te c'ux ta co'tan, te bayel yutsil co'tan yu'un, xchi sc'oblal. 18Ho'otcotic la jca'iycotic te c'op te tal ta ch'ulchan te c'alal joquinejcotic ta ch'ul wits. 19Ha yu'un chican xan ta lec te ha smelelil te sc'op te jalwanejetique. Lec te yac awich'ic ta cuenta, hich te bin ut'il c'ahc' te yac ta tihlel ta yihc'al q'uinal, ha to c'alal ya sacub q'uinal soc te ya yac' sts'anabul ta awo'tanic te jsacubel ec'. 20Ha bayel sc'oblal te yac ana'ic te mayuc sc'op-jalwanejetic ta Shun Dios te ay mach'a te stuquel nax ya xhu' ya sna'be scuentahil; 21como te sc'op-jalwanejetic ma ba talem ta scuenta sc'anojel yo'tan ants-winic, ha cuentahinotic yu'un te Ch'ul Espíritu te winiquetic te hich c'opojic ta scuenta Dios.


Copyright
Learn More

will be added

X\