2 San Juan 1

1Te anciano, ta stojol te ants te tsahbil soc te yalatac, te c'ux ta co'tan ta melel; ma jtuqueluc nax, ha nix hich c'uxat ta yo'tan spisil te mach'atic sna'beyijic sba te smelelil c'ope. 2Ha c'uxex ta co'tancotic ta scaj te smelelil c'op te ay ta co'tantic soc te spisil ora ya sjoquinotic: 3Te yutsil-o'tanil, sc'uxul-o'tanil soc te lamal q'uinal yu'un te Jtatic Dios soc te Jesucristo, ha te Snich'an te Tatil, ac'a sjoquinotic ta mero melel soc ta scuenta c'uxul-o'tanil. 4Mero tse'el co'tan yu'un te la jta te ay awalatac te yaquic ta behel ta stojol te smelelil c'op, hich te bin ut'il pasbilotic ta mandar yu'un te Tatile. 5Yo'tic, jnantic, ya calbat wocol te talel c'axel c'uxuc ya ca'iy jbahic. Ma ba ya jts'ihbabat yach'il mandaril, ha nix te quich'ojtic ta shahchibal to. 6Ha c'uxul-o'tanil ini: ha te hich ya xbehenotic te bin ut'il yaloj te mandariletic yu'une. Ha te mandar ini: te yac awa'iyic c'uxultaywanej hich te bin ut'il awa'iyejic ta shahchibal. 7Tsobol jlo'loywanejetic hahchemic ta behel ta bahlumilal te ma ba ya yalic te tal soc sbaq'uetal te Jesucristo. Te mach'a hich ya yal, ha me jlo'loywanej soc ha te anticristo. 8Tsahtaya me abahic scuenta yu'un ma ba ya xch'ay a te sit te awa'telic, te ts'acaluc yac awich'ic stojol ac'abic. 9Mach'ayuc a te ya xhowiy, te ma ba ya x'ayin ta stojol te bintic ay ta nopel yu'un Cristo, ma ba ay ta yo'tan te Diose; yan te mach'a ya x'ayin ta stojol te bintic ay ta nopel yu'un Cristo, ay ta yo'tan te Tatil soc te Nich'anile. 10Teme ay mach'a ya xtal ta atojolic te ma hichuc ya yac' ta nopel, ma me xawic' ochel ta anahic soc ma me xawalbe te lec te tale. 11Como te mach'a ya yalbe te lec te tale, pajal chopol ya'tel ya xc'oht soc. 12Ay bayel bin ya jc'an ya jts'ihbabeyex, pero ma jc'an ya jpas ta hun soc ta tinta, como co'tanuc ya xtal jc'oponex soc ya quilbe jba sitic scuenta yu'un ts'acal ya xc'oht te stse'elil co'tantique. 13Xcoltanucat laj yu'un te yalatac awix te tsahbile. Hichuc.


Copyright
Learn More

will be added

X\