2 Corintios 5

1Jna'ojtic teme ya xlaj te nahilpac' te banti jnahinejtic ta bahlumilal, ay jnatic yu'un Dios ta ch'ulchan te sbahtel q'uinal ay, te ma pasbiluc ta c'abal. 2Yacotic ta ahcan yu'un, co'tanticuc te ya jc'u'intic te jnatic ay ta ch'ulchan, 3como te c'alal hich jc'u'inejtic, ma ba watalotic ya xtahotic. 4Como te c'alal jc'u'inejtic to te nahilpac' ini, ayotic ta ahcan yu'un wocol, como ma jc'antic te watalotic, ha ya jc'antic te ay jc'u'tic, scuenta yu'un te bin ay ta scuenta lajel ya xlajimbot sc'oblal yu'un te cuxlejale. 5Ha nix te Dios te hich la spasotic, soc te ya'beyejotic te Espíritu scuenta seña te bin ya quich'tic ta patil. 6Ha yu'un jun co'tantic spisil ora, soc jna'ojtic te c'alal ayotic ta jbaq'uetaltic ma ba joquinejtic te Cajwaltic 7(como ya xbehenotic ta scuenta sch'uhunel co'tantic, ma ha'uc ta scuenta te bin chican ta ilel ta jsitic). 8Pero jun co'tantic, soc co'tanticuc te ma ba ayotiquix ta jbaq'uetaltic, te ha ya joquintiquix te Cajwaltique. 9Ha yu'un ya co'tantaytic te lecuc yo'tan cu'untic, chican teme quich'ojtic to te jbaq'uetaltic o teme ma ba quich'ojtiquix a, 10como jpisiltic ya me xc'ohotic ta chahpajibal yu'un Cristo, scuenta yu'un jujutuhl ya yich' stojol, ha chican bin la spas te c'alal ay to ta sbaq'uetal a, teme lec o teme ma lecuque. 11Jna'ojcotic bin ut'il ay ta xi'el te Cajwaltic, ha yu'un ya cac'cotic fuersa te ha'uc ya xc'oht ta yo'tanic te ants-winiquetique. Dios sna'oj bin ut'il ayotcotic, soc co'tanuc te ha nix hich ana'ojique. 12Ma yu'unuc ya calcotic xan lec jc'oblalcotic ta atojolic, ha ya jc'ancotic te tse'eluc awo'tanic ta jtojolcotic, scuenta yu'un hich me ya xweht bin yac awalbeyic a te mach'atic ya stoy sbahic yu'un te bin chican ta ilel, ma ha'uc bin yilel yo'tanic. 13Teme sohquem jolcotic, ha ta scuenta Dios; teme lec te jpensarcotic, ha'ex me ta acuentahic. 14Como te sc'uxul yo'tan te Cristo ya sujotic, como hich jna'ojtic: te jtuhl cham yu'un spisilic, hich cham ta spisilic. 15Ha cham Cristo yu'un spisilic, scuenta yu'un te mach'atic cuxulic, ma ba ya xcuxajic ta stuquelic, ha ya xcuxajic yu'un te mach'a cham soc te cha'cuxaj ta scuentahique. 16Ha yu'un yo'tic soc ta patil bahel mayuc mach'a ya jna'becotic sba ta scuenta ch'ich'-baq'uet, aunque ta nahil to hich la jna'becotic sba te Cristo, ma hichuquix ta ora ini. 17Ha yu'un teme ay mach'a junax c'ohemix soc Cristo, ha yach'il ants-winic: hilix te bin poco', spisil pasbilix ta yach'il. 18Ta spisil ini talem ta stojol Dios, te la yac' te jun co'tan jbahtic c'ohotic soc ta scuenta Cristo, soc la ya'botic ca'teltic yu'un te junuc yo'tan sbahic ya xc'oht soc Dios te yantique. 19Como te Dios, ta scuenta Cristo, la yac' te junuc yo'tan sbahic ya xc'oht soc Dios te ants-winiquetic, ma ba ich'bot ta cuenta te smulique, soc la ya'botic ca'teltic ta yalel bin ut'il jun yo'tan sbahic ya xc'ohtic soc Dios. 20Ha yu'un ticombilotic yu'un Cristo, hich c'ohem te bin ut'il Dios yac ta c'op ta stojolic ta jcuentatic. Ya calbeyex wocol ta scuenta sbihil te Cristo: Junuc me awo'tan abahic soc Dios. 21Te mach'a mayuc smul, a'bot te ha mulil c'oht ta jcuentatic, scuenta yu'un toj ya yilotic Dios ta scuenta.


Copyright
Learn More

will be added

X\