2 Corintios 11

1Ayuc bin ut'il ya xcuhch awu'unic jtebuc howil c'op. Cuhchuc me awu'unic, 2como xut'et co'tan ya ca'iy ta atojolic ta scuenta Dios. Jtuhl nax mach'a la jcac' yiq'uex, ha te Cristo, scuenta yu'un ya caq'uex ta stojol hich te bin ut'il ach'ix te mayuc mulil ta scuenta. 3Pero hich te bin ut'il te chan la smombe yo'tan ta lo'loyel te Eva, ya jxi' te ay wan bin ut'il ya showiytesbeyex te snopojibal awu'unic, te hich ma junuquix awo'tanic ta stojol Cristo. 4Como teme ay mach'a ya xtal yalbe sc'oblal yan Jesús, te ma ha'uc te Jesús la jcalbeyexcotic sc'oblale, o teme yan espíritu yac awich'ic, te ma ha'uc te Espíritu te awich'ojic, o teme ay yan yach'il c'op te bin ut'il awich'ojic, ora nax yac awich'ic. 5Te ya cal ma ba peq'uel c'ohemon yu'un te mach'atic muc'ul jpuc-c'opetic. 6Aunque ma jna' c'op ta lec, pero ay bin ya jna'. Jamal la jcac'ticlambeyex awilic ta scuenta spisil ta chahp te la jpascotique. 7¿Ha bal jmul c'oht te peq'uel la jcac' jba scuenta yu'un ha'ex ya xtohy ac'oblalic, te bin ut'il ma ba la jc'an jtojol a te la jcalbeyex te lec yach'il c'op yu'un Dios? 8La jpojbe sbiluc yantic iglesiahetic yu'un hich la jta jtojol a te la jcac' jba ta a'batinel awu'unic. 9Soc te c'alal ayon ta awohlilic te ay bin tuhun cu'un, mayuc mach'a la jca'be yihcats, como te bintic tuhun cu'un ha la ya'bon te quermanotactic talemic ta Macedonia. Ta spisil jtsahtayej jba te mayuc mach'a la jca'be yihcats soc hich ya jpas xan bahel. 10Te bin ut'il ay ta co'tan te smelelil c'op yu'un te Cristo, mayuc mach'a ta spahmal sq'uinal Acaya ya xhu' ya scomon te ya cal jc'oblale. 11¿Bin yu'un? ¿Yu'un bal ma ba c'uxex ta co'tan? Sna'oj Dios te c'uxex ta co'tane. 12Pero te bin yac jpasbel, hich ya jpas xan bahel, scuenta yu'un hich ma ba ya ca'be spas te mach'atic ya sle bin ut'il ya spajaltayotcotic te bin ya stoy sbahic yu'une, 13como ha lotil jpuc-c'opetic ini, jlo'loywanej j'a'teletic, ya sp'is sbahic ta jpuc-c'opetic yu'un Cristo. 14Ma me yanuc yac awa'iyic a, como ha nix hich te Satanás ya sp'is sba ta ch'ul a'bat yu'un sacal q'uinal. 15Ha yu'un ma me yanuc yac awa'iyic a teme te a'batetic yu'un ya sp'is sbahic ta a'batetic yu'un bin stojil ay ta pasel. Te slajibal yu'unic hich ya xc'oht te bin ut'il ay te ya'telique. 16Ya jcha'halbeyex xan: Ma me ayuc mach'a ya scuy ta sohquem jol; o teme hich yac awa'iyique, hich yac awic'on te bin ut'il jsohquejol, scuenta yu'un ya jtoy jba jtebuc a. 17Te bin ya cale, ma hichuc ya xc'opojon te bin ut'il ya sc'an te Cajwaltique, hich ya xc'opojon te bin ut'il jsohquejol, te bin ut'il hich ya jtoy jba. 18Te bin ut'il tsobol mach'atic ya stoy sbahic ta scuenta ch'ich'-baq'uet, ha nix hichon ya jtoy jba; 19como te bin ut'il p'ijex, jun awo'tanic yac awa'iybeyic sc'opic te mach'atic ma sna'ic q'uinal, 20yu'un ya xcuhch awu'unic teme ay mach'a ya smosohinex, o teme ya slajimbeyex bin ay awu'unic, o ya spojbeyex abiluquic, ya stoy sba, o ya smajbeyex awelawic. 21¡Ya xq'uexawon yu'un te ya cal te mayuc quipcotic ta spasel ini! Pero te bin ya stoy sba yu'un te yane, ha nix hichon, ay bin ya jtoy jba yu'un (ya xc'opojon hichuc jsohquejol). 22¿Ha'ic bal hebreohetic? Ha nix hichon. ¿Ha'ic bal israeletic? Ha nix hichon. ¿Ha'ic bal sts'umbalic Abraham? Ha nix hichon. 23¿A'batetic bal yu'un Cristo? C'ax hichon a. (Sjel ta sohquem jol te bin ut'il hich ya xc'opojon.) C'ax hich a'tejemon a, c'ax hich quich'oj chuquel a, ma ahtaybaj quich'oj majel, c'ax bayel buelta c'an lajucon. 24Ho'eb buelta la jquich' majel yu'un te judíohetic, jujun xanix ma ba loc' cha'winic (40) ta yahlel. 25Oxeb buelta la jquich' majel ta te'; jun buelta la jquich' ch'ojel ta ton; oxeb buelta ochon ta barco te laj ta mar; jun c'ahc'al soc jun ahc'abal ayon ta yohlil mar; 26bayel buelta behenemon; c'ax jwocol ta muc'ul-ha'etic, c'ax jwocol yu'un j'eleq'uetic, c'ax jwocol yu'un jlumal, c'ax jwocol yu'un jyanlumetic, c'ax jwocol ta pueblo, ta jochol taquin q'uinal, ta mar, c'ax jwocol yu'un mach'atic sp'isoj sbahic ta quermanotic; 27ay jwocol ta a'tel soc ta luhbel, bayel yahwayel, ay jwocol ta wi'nal soc ta taquinti'il; bayel buelta ma ba weht jwe'el; ay jwocol ta sic, ay jwocol yu'un mayuc jc'u' jpac'. 28Ay to xan yantic, jujun c'ahc'al ya x'ochon na'etel ta scaj spisil te iglesiahetique. 29¿Mach'a a te mayuc yip, te ha nix mayuc quip ya ca'iy? Te mach'a ya x'a'bot sc'ohchin sba, ¿yu'un bal ma ba ya x'ilinon yu'un? 30Teme ya sc'an te ay bin ya jtoy jba yu'une, ha ya jtoy jba yu'un te mayuc quip. 31Te Dios, te Stat te Cajwaltic Jesucristo, te sbahtel q'uinal ay ta ich'el ta muc', sna'oj te ma ba ya ca'iy lot. 32Ta Damasco te gobernador yu'un te sq'uinal te ajwalil Aretas la scanantay te pueblo yu'un te damascohetic yu'un ya stsaconic; 33pero la jquich' jihpanel ta moch ta ventana ta pat-ts'ahc, hich colon loq'uel ta sc'ab.


Copyright
Learn More

will be added

X\