1 Tesalonicenses 5

1Quermanotac, ma fuersahuc ya jts'ihbabeyex sc'oblal te bin ora soc te bin yilel q'uinal a, 2como ana'ojic ta lec te sc'ahc'alel te Cajwaltic hich ya xtal te bin ut'il j'elec' ta ahc'abal. 3Te c'alal hich ya yalic: Lamal q'uinal, lec ay spisil, repente nax ya xtal jinel ta stojolic, hich te bin ut'il ya xhahch sc'uxul c'alal ya x'ayin yal te antse, ma ba ya xhu' ya x'ahnic loq'uel. 4Yan te ha'exe, quermanotac, ma ba ayex ta yihc'al q'uinal, yu'un te ch'ayal awo'tanic a ya xtal sc'ahc'alel hich te bin ut'il j'elec'. 5Como apisilic yal-snich'nabex te sacal q'uinal soc yal-snich'nabex te c'ahc'alel. Ma ba yu'unotic te ahc'abal soc ma ba yu'unotic te yihc'al q'uinale. 6Ha yu'un ma me xwayotic hich te bin ut'il te yantique, wiq'uiluc me jsitic soc p'ijuc me x'ayinotic. 7Como te mach'atic ya xwayic, ta ahc'abal ya xwayic, soc te mach'atic ya xyacubic, ta ahc'abal ya xyacubic. 8Yan te ho'otic te yu'unotic te c'ahc'alel, p'ijuc me x'ayinotic, ac'a jlaptic te smahquil jtahntic, ha te sch'uhunel co'tantic soc te sc'uxul co'tantic, soc ac'a jlaptic te smahquil joltic, ha te smuc'ul co'tantic yu'un te colele. 9Como te Dios ma ba la stsahotic yu'un ya quich'tic castigo, ha la stsahotic yu'un te ya jtahtic colel ta scuenta te Cajwaltic Jesucristo, 10ha te mach'a laj cu'untic scuenta yu'un teme cuxulotic o wayem jbaq'uetaltic a pajal ya xcuxajotic soc. 11Ha yu'un talel c'axel me xamuc'ubtesbe aba q'uinal awa'iyic soc talel c'axel me xawa'be aba yip awo'tanic, hich nix te bin ut'il yac apasbelique. 12Ya calbeyexcotic wocol, quermanotac, ich'ahic ta cuenta te mach'atic yacalic ta a'tel ta awohlilic, te ya scuentahinex ta scuenta Cajwaltic soc te ya stsitsexe. 13Ich'ahic ta muc' soc c'ux me xawa'iyic ta awo'tanic ta scaj te ya'telique. Lamaluc me q'uinal ta awohlilic. 14Soc ya calbeyexcotic wocol, quermanotac, tsitsahic te mach'atic ch'ajic, a'beyahic smuc'ul yo'tanic te mach'atic mayuc yip yo'tanic, coltayahic te mach'atic mayuc yipic, soc cuhchuc me awu'unic spisilic. 15Tsahtayahic te mayuc mach'a ya sutbe spacol te bin chopol ya xpasbot, pero spisil ora talel c'axel xapasbe abahic te bin lec soc nix spisil te yantique. 16Spisiluc me ora tse'el awo'tanic. 17A'telinahic me sc'oponel Dios. 18Halbeyahic wocol Dios ta spisil bintic ya xc'oht ta pasel ta atojol, yu'un hich ya sc'an yo'tan Dios ta atojolic ta scuenta Cristo Jesús. 19Ma me xatup'ic te Espíritu. 20Ma me xap'ajic te sc'op-jalwanej. 21Tsahtayahic spisil, ich'ahic te bin leque. 22Coma abahic yu'un spisil bintic chopol. 23Te Dios yu'un lamal q'uinal ts'acal ac'a sch'ultesex; soc ac'a yich' canantayel spisil acuxlejalic, ha te espíritu awu'unic, ach'uhlelic soc abaq'uetalic, te mayuc amulic a te c'alal ya xtal te Cajwaltic Jesucristo. 24Stalel jun yo'tan te Mach'a ya yiq'uex ta stojol, ya me xc'oht ta pasel yu'un. 25Quermanotac, c'opombotcotic me Dios. 26Patbeya yo'tanic spisil te quermanotactic ta scuenta ch'ul uts'uyel. 27Tulan ya calbeyex ta scuenta Cajwaltic te ya me yich'ic ilel te carta ini ta stojol spisil te quermanotactique. 28Ac'a sjoquinex te yutsil yo'tan te Cajwaltic Jesucristo. Hichuc.


Copyright
Learn More

will be added

X\