1 Tesalonicenses 4

1Ha yu'un, quermanotac, ya calbeyexcotic wocol soc ya jtsitsexcotic ta scuenta te Cajwaltic Jesús, te hich te bin ut'il la anopic ta jcuentacotic bin ut'il ya sc'an ya xcuxajex te lec yo'tan yu'un te Diose, c'axemuc hich xapasulanic a. 2Ana'ojic te bin la jca'beyexcotic ana'ic ta scuenta te Cajwaltic Jesús. 3Ha ya sc'an yo'tan Dios te yac awich'ic ch'ultesel, ha te jc'axel ya xhil awu'unic antsinel soc antsiwej; 4te jujutuhlex yac ana'ic bin ut'il ya yic' jtuhl nax yihnam hich te bin ut'il ya sc'an scuenta ch'ultesel soc ich'el ta cuenta, 5ma ha'uc soc chijil-o'tanil, hich te bin ut'il ya spasic te jyanlumetic te ma ba ya sna'beyic sba te Diose; 6soc ma me ayuc mach'a ya spasbe te yermano te bin chopol o te hich ya slo'loy, como te Cajwaltic ha jpac-c'abal yu'un spisil ini, hich te bin ut'il la jcalbeyexcotic soc la jca'beyexcotic ana'ic. 7Ma ba la yic'otic Dios yu'un te ya jpastic chijil-o'tanil, ha la yic'otic yu'un te ya quich'tic ch'ultesel. 8Ha yu'un te mach'a ya sp'aj ini, ma ha'uc ya sp'aj te winic, ha ya sp'aj te Dios te ha nix ya'beyejex te Ch'ul Espíritu. 9Ma fuersahuc ya jts'ihbabeyex sc'oblal bin ut'il c'ux yac awa'iy abahic soc awermanotaquic, como ha'ex nix a'botex anopic yu'un Dios te talel c'axel c'ux yac awa'iy abahique; 10soc ha nix hich yac apasbelic ta stojol spisil te quermanotactic ayic ta spahmal sq'uinal Macedonia. Pero hawocolicuc, quermanotac, c'axemuc hich yac apasulanic a. 11Ayuc bin ut'il lamal q'uinal ya x'ayinex, o'tantayahic spasel te bin ay ta acuentahic spasel soc a'tejanic me ta ac'abic, hich te bin ut'il la jpasexcotic ta mandar, 12scuenta yu'un lec ya xcuxajex ta stojol te mach'atic ma ba sch'uhunejic Dios, soc hich mayuc bin ya spasex falta a. 13Quermanotac, ma jc'ancotic te ma xana'ic bin ut'il ay sc'oblal te mach'atic ya xway sbaq'uetalic, scuenta yu'un ma hichuc yac amel awo'tanic yu'un a te bin ut'il te mach'atic mayuc smuc'ul yo'tanique. 14Como teme jch'uhunejtic te cham te Jesús soc te cha'cuxaj, ha nix hich te Dios ya me yic' tal soc Jesús te mach'atic sch'uhunejic Jesús te wayem sbaq'uetalique. 15Ha yu'un ya calbeyexcotic awa'iyic ini ta scuenta te sc'op te Cajwaltic: ho'otic te cuxulotic to a te c'alal ya xtal te Cajwaltic, ma ba ya xnahilijotic yu'un te mach'atic wayemix sbaq'uetalique. 16Ha nix te Cajwaltic ya xco talel ta ch'ulchan ta scuenta tulan aw ta mandar, soc sc'op jtsobaw ch'ul a'bat, soc te oq'uel yu'un te corneta yu'un Dios. Ha nahil ya xcha'cuxajic tal te mach'atic chamenic te ayic ta scuenta Cristo. 17Patil te ho'otic te cuxulotic, te hilemotic, pajal ya x'ic'ototic mohel soc ta tocal yu'un ya jta jbahtic soc te Cajwaltic ta ic' ta toyol; hich sbahtel q'uinal ya joquintic te Cajwaltique. 18Ha yu'un talel c'axel me xamuc'ubtesbe aba q'uinal awa'iyic ta scuenta te c'op ini.


Copyright
Learn More

will be added

X\