1 San Juan 3

1Ilawil bin ut'il bayel c'uxotic ta yo'tan te Tatil, te ha yal-snich'anotic Dios ya jbihilintic. Ha scuentahil te ma sna'botic jbahtic te bahlumilale, como ma sna'beyic sba te Diose. 2Ha'ex te c'uxex ta co'tan, yo'tic yal-snich'anotiquix te Diose, soc ma to chicanuc bin quileltic ya xc'ohotic; pero jna'ojtic te c'alal ya xchicnaj tal te Cristo, pajal quileltic soc Cristo ya xc'ohotic, yu'un ya me quiltic bin mero yilel stuquel. 3Spisil mach'a te hich yac ta smahliyel, ha nix yac slecubtesbel sba, hich te bin ut'il lec stuquel te Cristo. 4Spisil mach'a ya sta smul, ya sc'axuntay te Ley; como ha mulil te sc'axuntayel te Ley. 5Ana'ojic te ha xtaluc te Cristo yu'un ya sloq'uesbotic jmultic; ha mayuc smul stuquel. 6Spisil te mach'a jc'axel ya x'ayin ta stojol ma ba ya slehulan smul. Spisil te mach'a ya slehulan smul, ma ba yiloj soc ma ba sna'beyej sba. 7Cal-jnich'nab, ma me ayuc mach'a ya slo'loyex; te mach'a ya spas te bin toj, ha toj yo'tan ta winiquil, hich te bin ut'il toj yo'tan stuquel te Jesucristo. 8Te mach'a ya'telinej spasel mulil, ha me yu'un pucuj stuquel, como te pucuj stalel la sle mulil ta shahchibal to tal. Ha scuentahil te chicnaj te Snich'an Dios, yu'un ya slajimbe ya'tel te pucuje. 9Spisil mach'a ayinem ta stojol Dios, ma ba ya slehulanix smul, como yich'beyej stalel te Diose. Ma xhu' ya slehulanix smul, como ha yal-snich'an te Diose. 10Hich ya xchicnaj mach'atic a te yal-snich'nab Dios soc mach'atic a te yal-snich'nab te pucuje: Spisil mach'a ma ba ya spas te bin toj ta pasel soc te ma c'uxuc ya ya'iy ta yo'tan te yermano, ma yu'unuc Dios stuquel. 11Hich ay te c'op te awa'iyejic ta shahchibal to tal: ha te talel c'axel c'ux ac'a ca'iy jbahtic. 12Ma me hichucotic te bin ut'il Caín, te ha yu'un te pucuj, te la smil te yihts'ine. ¿Bin yu'un te la smile? Yu'un chopol te ya'tel te Caín, yan te yihts'in toj ya'tel stuquel. 13Quermanotac, ma me jchahpuc xawa'iyic a teme ya yil-o'tantayex te mach'atic ayic ta scuenta te bahlumilale. 14Jna'ojtic te ma ba ayotiquix ta scuenta lajel, ayotiquix ta scuenta cuxlejal, como c'ux ya ca'iy ta co'tantic te quermanotactique. Te mach'a ma ba c'ux ya ya'iy ta yo'tan te yermano, yu'un ni me ay to ta scuenta lajel a abi. 15Spisil mach'a ya yil-o'tantay te yermano, jmilaw me c'ohem. Ana'ojic te mayuc jtuhluc jmilaw te ay scuxlejal scuenta sbahtel q'uinal. 16Hich ya jna'tic bin ut'il ay te c'uxul-o'tanil, ha te la yac' sba ta lajel ta jcuentatic. Ha nix hichotic, ya sc'an ya cac' jcuxlejaltic ta scuenta te quermanotactique. 17Te mach'a ay bintic ay yu'un ta bahlumilal, teme ya yil te mayuc bin ay yu'un te yermano, pero teme ma sc'an ya sc'uxultay, ¿bin ut'il ay sc'uxul yo'tan Dios ta yo'tan? 18Cal-jnich'nab, ma me ta c'opuc nax o ta sbahuc nax quetic ya caltic te c'ux ya ca'iy jbahtic, smeleliluc me te c'ux ya ca'iy jbahtic soc ac'a me chicnajuc ta ca'teltic. 19Hich to me ya jna'tic a te ayotic ta scuenta te smelelil c'op, soc hich ya jna'tic a te jun co'tantic ayotic ta stojol te Dios, 20teme ay ya yalbotic te co'tantic te ay bin chopol jpasojtic, ha c'ax muc' te Dios te bin ut'il te co'tantic, soc ha ya sna' spisil stuquel. 21Ha'ex te c'uxex ta co'tan, teme mayuc bin ya yalbotic te co'tantic, hich jun co'tantic ayotic ta stojol a te Diose; 22soc ha ya ya'botic spisil bintic ya jc'ambetic, como ya jch'uhumbetic te mandariletic yu'un soc ya jpastic te bin lec yo'tan yu'une. 23Soc ha smandar ini: ha te ya jch'uhumbetic te sbihil te Snich'an, ha te Jesucristo, soc te talel c'axel c'ux ya ca'iy jbahtic, hich te bin ut'il la spasotic hilel ta mandar. 24Te mach'a ya sch'uhumbe smandar, jc'axel ayix ta stojol Dios, soc Dios ay ta yo'tan. Hich ya jna'tic a te ay ta co'tantic te Diose: ha ya jna'tic ta scuenta te Espíritu ya'beyejotique.


Copyright
Learn More

will be added

X\