1 San Juan 2

1Cal-jnich'nab, hich ya jts'ihbabeyex scuenta yu'un ma ba yac alehix amulic a. Pero teme ay mach'a ya sta smul, ay mach'a ya xc'opoj cu'untic ta stojol te Tatil, ha te Jesucristo te toj yo'tan stuquel. 2Ha te milbil mahtanil yu'un stojel jmultic; ma ho'ucotic nax jmultic, ha la stojbe smul spisil te ants-winiquetic ayic ta bahlumilal. 3Teme ya jch'uhumbetic smandar, hich ya jna'tic a te ya jna'betic sba. 4Te mach'a hich ya yal: Ya jna'be sba te Diose, teme xchihe, pero teme ma ba ya sch'uhumbe smandar, yac ta lot, soc ma ba ay ta yo'tan te smelelil c'ope. 5Yan te mach'a ya sch'uhumbe sc'op, ts'acal c'ohemix ta yo'tan te sc'uxul yo'tan te Dios ta mero melel. Hich ya jna'tic a te jun ayotic soque. 6Te mach'a ya yal sba te spisil ora ay ta stojol te Diose, ya sc'an ya xbehen hich te bin ut'il behen te Jesuse. 7Quermanotac, ma ba ya jts'ihbabeyex yach'il mandaril, ha nix te antiguo mandaril awa'iyejic ta shahchibal to. Te antiguo mandaril ini ha te c'op te ay nix awa'iyejic ta nahil to. 8Pero ya jts'ihbabeyex yach'il mandaril, te chican ta stojol Cristo soc ta atojolic te ha smelelil, como yac ta c'axel bahel te yihc'al q'uinal soc chicanix te smelelil sacal q'uinale. 9Te mach'a ya yal te ay ta sacal q'uinal pero teme ya sp'aj te yermano, ay to ta yihc'al q'uinal abi. 10Te mach'a c'ux ya ya'iy ta yo'tan te yermano, ayinemix ta sacal q'uinal soc mayuc bin ya xyahltesot ta mulil yu'un. 11Yan te mach'a ya sp'aj te yermano, ay ta yihc'al q'uinal, soc yac ta behel ta yihc'al q'uinal, ma sna' banti ya xbaht, como ha macbibil sit yu'un te yihc'al q'uinale. 12Ha'ex cal-jnich'nabex, ya jts'ihbabeyex como pasbilexix perdón yu'un amulic ta scuenta sbihil te Jesucristo. 13Ha'ex tatiletic, ya jts'ihbabeyex como yac ana'beyic sba te Mach'a stalel ay ta shahchibal. Ha'ex ach'ix queremetic, ya jts'ihbabeyex como atsalojiquix te mach'a chopole. Ha'ex alaletic, ya jts'ihbabeyex como ana'beyejiquix sba te Tatile. 14Ha'ex tatiletic, ya jts'ihbabeyex como ana'beyejiquix sba te Mach'a stalel ay ta shahchibal. Ha'ex ach'ix queremetic, ya jts'ihbabeyex como ay awipic, soc ay ta awo'tanic te sc'op Dios, soc atsalojiquix te mach'a chopole. 15Ma me c'uxuc xawa'iy ta awo'tanic te bahlumilal o te bintic ayic ta bahlumilal. Te mach'a c'ux ya ya'iy ta yo'tan te bahlumilal, ma ba yich'oj te sc'uxul yo'tan te Jtatic Dios, 16como spisil bintic ay ta bahlumilal, ha te bin ya smulan te baq'uet scuenta mulil, te bin ya smulan yilel te jsitic, soc te toybahil, ma ba talem ta stojol te Tatil, ha talem ta stojol te bahlumilale. 17Ya me xc'ax bahel te bahlumilal soc te bintic mulambil yu'un te mach'atic ayic ta scuenta, yan te mach'a ya spas te bin ya sc'an yo'tan te Diose, sbahtel q'uinal ya xcuxaj stuquel. 18Cal-jnich'nab, slajibalix c'ahc'al ayotic. Hich te bin ut'il awa'iyejic te ya xtal te anticristo, chicnajemix tsobol anticristohetic. Hich ya jna'tic a te slajibalix ora ayotique. 19Loq'uemic hahchel ta cohliltic, pero ma junuc ayotic soc a, como te junuc ayucotic soc, la sjoquinotic te hichuque; pero loq'uic bahel yu'un tey chicnaj a te ma ba jun ayotic soc ta spisilic. 20Yan te ha'exe, la awich'iquix malel yu'un te Ch'ul Espíritu, hich apisilic yac ana'ic te bintic smelelil. 21Ma ba ya jts'ihbabeyex yu'un te ma ba yac ana'ic te smelelil c'op, yu'un yac ana'ic, soc yu'un ma xloc' talel lot ta smelelil c'op. 22¿Mach'a a te ya ya'iy lot? Ha te mach'a ya yal te ma ha'uc Cristo te Jesús. Ha te anticristo abi, ha te mach'a ya smuc ta yo'tan te Tatil soc te Nich'anile. 23Spisil te mach'a ya smuc ta yo'tan te Nich'anil, ma ba ay ta yo'tan te Tatile. Te mach'a ya yal ta jamal te ha Nich'anil, ha nix ay ta yo'tan te Tatile. 24Te bin awa'iyejic ta shahchibal, jc'axel ayinuc ta awo'tanic. Teme jc'axel ya x'ayin ta awo'tanic te bin la awa'iyic ta shahchibal, ha nix hich jc'axel ya x'ayinex ta stojol te Nich'anil soc ta stojol te Tatile. 25Yaloj Dios te ya ya'botic cuxlejal sbahtel q'uinal. 26La jts'ihbabeyex ini sc'oblal te mach'atic ya sc'an ya slo'loyex. 27Pero te malel yu'un te Espíritu te awich'ojic ya xhil ta atojolic, ma fuersahuc te ay mach'a ya snohptesex. Te malel yu'un te Espíritu te awich'ojic ya ya'beyex anopic spisil, soc smelelil te malel, ma lotiluc, ha yu'un jc'axel ayinanic ta stojol Cristo, hich te bin ut'il ya'beyejex anopique. 28Cal-jnich'nab, jc'axel ayinanic me ta stojol, scuenta yu'un te c'alal ya xchicnaj ay me yip co'tantic a, soc ma ba q'uejel ya cac' jbahtic ta stojol yu'un q'uexlal te c'alal ya xtale. 29Teme ana'ojic te toj yo'tan te Jesucristo, na'ahic me te spisil mach'atic ya spasic te bin toj ha yal-snich'an Dios abi.


Copyright
Learn More

will be added

X\