1 Corintios 6

1Teme ay hahch c'op awu'unic ta stojol yan, ¿lec bal yac awa'iyic teme yac awac' abahic ta chahpanel yu'un mach'atic ma ba sch'uhunejic Dios, te ma ha'uc ta stojol te mach'atic ch'ultesbilique? 2¿Yu'un bal ma ba ana'ojic te mach'a ch'uhltesbilic ya me schahpanic te mach'atic yu'un te bahlumilale? Teme yac achahpanic te mach'atic ayic ta te bahlumilal, ¿yu'un bal ma xhu' awu'unic schahpanel te bintic peq'uel sc'oblale? 3¿Ma bal ana'ojic te ya me jchahpantic te ch'ul a'batetique? ¿Ha'uc to balix a te bintic scuenta te jcuxlejaltic li' ta bahlumilal? 4Ha yu'un teme ay hahchem c'op te bintic scuenta te cuxlejal li'i, ¿bin yu'un yac awac' ta chahpanel ta stojol mach'atic mayuc ya'telic ta stojol te iglesia? 5Hich ya calbeyex yu'un ya xq'uexawex a. ¿Yu'un bal mayuc jtuhluc ta awohlilic te ay sp'ijil yo'tan te ya xhu' ya schahpan c'op ta yohlil te yermanotac? 6Teme ay ya scontrahin sbahic soc yermanotac ¡ya schahpanic ta stojol te mach'atic ma ba sch'uhunejic Dios! 7Melel, tsalbil c'ohemex te bin ut'il yac acontrahimbel abahic. ¿Ma bal ha'uc lec xan te ya xcuhch awu'unic te bin ma stojiluc ta pasel ta atojolic? ¿Ma bal ha'uc lec xan te ya xcuhch awu'unic te yac awich'ic lo'loyel? 8Pero ha'ex nix yac apasbeyic te bin ma stojiluc ta pasel soc yac awa'iyic elec', ¡hich yac apasbeyic te awermanotaque! 9¿Ma bal ana'ojic te ma ba ya x'a'bot yich'ic te cuentahinel yu'un Dios te mach'atic chopolique? Ma me slo'loybeyex awo'tanic: te jpas-muliletic, te mach'atic sch'uhunejic lotil diosetic, j'antsiwejetic, mach'atic smohlol sba ta winiquil o ta antsil te ya sjoquin sbahic, 10j'eleq'uetic, mach'atic ay st'ut'ilic, jyacubeletic, j'ixta'c'opetic, jlo'loyej-biluquetic, ha'ic ini ma ba ya x'a'bot yich'ic te cuentahinel yu'un Dios. 11Ay hich ayex ta namey, pero pocbilexix, ch'ultesbilexix soc halotix te toj ayex ta scuenta sbihil te Cajwaltic Jesucristo soc ta scuenta te Espíritu yu'un te Dios cu'untique. 12Libre ayon ta spasel spisil, pero ma spisiluc lec ta pasel; libre ayon ta spasel spisil, pero mayuc bin ya cac' yu'untayon. 13Te we'elil ha yu'un ch'uhtul soc te ch'uhtul ha yu'un we'elil, pero Dios ya me slajin ta schebal. Pero te jbaq'uetaltic, ma ha'uc stuc yu'un antsiwej o antsinel, ha yu'un Cajwaltic, soc te Cajwaltic ha yu'un te jbaq'uetaltique. 14Te Dios te la scha'cuxajtes te Cajwaltic, ha nix hichotic ya me scha'cuxajtesotic ta scuenta yu'el. 15¿Yu'un bal ma ba ana'ojic te jbaq'uetaltic jun ay soc te sbaq'uetal Cristo? ¿Ya bal ca'be te bin ay yu'un te sbaq'uetal Cristo te ya sjoquin j'antsinel-ants? ¡Ban c'an hichuc! 16¿Yu'un bal ma ba ana'ojic te mach'a jun ya yac' sba soc j'antsinel-ants te jun sbaq'uetal ya xc'oht soc? Como hich ts'ihbabil: Ta schebalic, jun sbaq'uetal ya xc'ohtic, xchi. 17Yan te mach'a jun ya yac' sba soc te Cajwaltic, jun sch'uhlel soc. 18Ahnanic ta stojol antsiwej. Spisil yantic muliletic te ya spasic ants-winiquetic ma ba ay ta sbaq'uetal; yan te mach'a ya ya'iy antsiwej, ya sta smul ta stojol te sbaq'uetale. 19¿Yu'un bal ma ba ana'ojic te abaq'uetalic ha templo yu'un te Ch'ul Espíritu te ay ta awo'tanic, te a'botex yu'un Dios? Ma awu'unuc abahic, 20como ay atojolic mambilex; ha yu'un ac'ahic ta ich'el ta muc' Dios soc abaq'uetalic soc ach'uhlelic, como yu'un Dios ta schebal.


Copyright
Learn More

will be added

X\