1 Corintios 3

1Ha yu'un, quermanotac, ma ba hu' cu'un te la jc'oponex hich te bin ut'il te mach'atic ayic ta scuenta te Espíritu, como ta scuenta ch'ich'-baq'uet ayex, hich ayex te bin ut'il bic'tal alaletic ta stojol Cristo. 2La jca'beyex awuch'ic leche, ma ha'uc tulan we'elil, como ma to xhu' awu'unic, 3como ayex to ta scuenta ch'ich'-baq'uet. Te bin ut'il ay ta awohlilic xut'et-o'tanil soc hach-c'op ¿ma bal ayuquex ta scuenta ch'ich'-baq'uet soc te hich ayex te bin ut'il yantic winiquetic? 4Como hich ya yal te yane: Ho'on jt'unoj te Pablo, xchi, soc hich ya yal te yane: Ho'on jt'unoj te Apolos, xchi. ¿Ma bal yu'unuc ayex ta scuenta ch'ich'-baq'uet? 5¿Mach'a a te Pablo, soc mach'a a te Apolos? Ha a'batetic te ha ta scuentahic te la ach'uhunique; soc ha chican te bin a'bot spas jujutuhl yu'un te Cajwaltique. 6Ho'on la jts'un, te Apolos la ya'be ya'lel, pero Dios la yac' ch'ihyuc. 7Ha yu'un ma ha'uc ay sc'oblal te mach'a ya ya'iy ts'umbajel o te mach'a ya ya'be ya'lel, ha ay sc'oblal te Dios te ya yac' ch'ihyuc. 8Pajal ayic te mach'a ya ya'iy ts'umbajel soc te mach'a ya ya'be ya'lel, soc jujutuhl ya x'a'bot yich' stojol, ha chican bin yilel ya'telic. 9Como te ho'otcotic joc jbahcotic ta a'tel soc Dios; te ha'exe sts'unubex Dios, ha snahex Dios. 10Ta scuenta te bin a'bibilon yu'un Dios, ho'on, te bin ut'il ya jna' ta lec pas-na, la jca'be yich'o-ip, yan mach'a ya sts'ahcuy mohel; pero jujutuhl ac'a yil bin ut'il ya sts'ahcuy mohel. 11Mayuc mach'a ya xhu' ya ya'be yan yich'o-ip te bin ut'il ayix, ha te Jesucristo. 12Teme ay mach'a ya sts'ahcuy mohel ta oro, plata, t'ujbil ton, o ta te', ac o c'ajben ta sba te yich'o-ip, 13ya me xchicnaj bin yilel ya'tel ta jujutuhl, como ya me xchicnaj ta yorahil, ta scuenta c'ahc' ya xchicnaj; ya me yich' tsajel ta c'ahc' te ya'tel jujutuhl. 14Teme stalel ya xhil te ya'tel te mach'a la sts'ahcuy mohel, ya me x'a'bot smahtan. 15Yan teme ya xlaj ta c'ahc' te ya'tel, ya xch'ay te ya'tel, pero ya xcol stuquel, aunque hich bin ut'il mach'a col loq'uel ta c'ahc'. 16¿Ma bal ana'ojic te ha templohex yu'un Dios, soc te nahinem ta awo'tanic te Espíritu yu'un Dios? 17Teme ay mach'a ya sjin te templo yu'un Dios, ya me xjihnot yu'un Dios, como ch'ultesbil te templo yu'un Dios, ha'ex abi. 18Ma me ayuc mach'a ya slo'loy sba; teme ay mach'a ay ta awohlilic te ya scuy sba ta p'ij ta scuenta te bahlumilal ini, ac'a sp'is sba te mayuc bin ya sna' scuenta yu'un hich ay sp'ijil yo'tan ya xc'oht. 19Como te p'ijil-o'tanil yu'un te bahlumilal ha howilc'op ta stojol Dios, hich te bin ut'il ts'ihbabil: Ya syac ta scuenta sp'ijil yo'tanic te mach'atic p'ijique, xchi. 20Soc hich ts'ihbabil xan: Te Cajwaltic sna'oj te ma xtuhun te bin snopoj te mach'atic p'ijique, xchi. 21Ha yu'un ma me ayuc mach'a ya stoy sba yu'un te ay bin ya xhu' yu'un te ants-winiquetic, como ha awu'unic spisil: 22teme ha te Pablo, o Apolos, o Cefas, o bahlumilal, cuxlejal, lajel, te bin ay ta ora ini o te bin ya xc'oht ta pasel ta patil. Spisil awu'unic, 23soc ha'ex yu'unex Cristo, soc ha yu'un Dios te Cristo.


Copyright
Learn More

will be added

X\