1 Corintios 16

1Te bin ut'il ay sc'oblal te mahtanil ya yich'ic te mach'atic ch'uhltesbilic, hich me xapasic te bin ut'il la jpas hilel ta mandar te iglesiahetic ta sq'uinal Galacia. 2Ta jujun sba c'ahc'alil semana, ta tuhlutuhl parte me xawaq'uic jtebuc, ha chican jayeb la atahic, q'uejahic, scuenta yu'un ma ha'uc to yac atsobic a te c'alal ya xtalone. 3C'alal ya xtalon, ya jticon bahel soc carta te mach'atic tsahbil awu'unic scuenta yu'un ya yich'ic bahel ta Jerusalén te mahtanil awu'unique. 4Teme hich ya sc'an te ya xbohon ec, ya sjoquinonic bahel. 5Ya xtalon ta banti ayex, pero nahil ya xc'axon tal ta sq'uinal Macedonia, como ya sc'an ya xc'axon tey a. 6Ya wan xhalajon tey ta banti ayex, o tey wan ya xc'ax cu'un a te yorahil sic, scuenta yu'un yac awa'bonic te bin ya xtuhun cu'un ta behel ta banti ya sc'an ya xbohone. 7Como ma jc'an te buelta nax ya xc'ax quilex, ha ya jc'an te ya xhalajon ta banti ayex, teme hich ya sc'an te Cajwaltique. 8Pero ya xhilon ta Éfeso ha to c'alal ta q'uin Pentecostés, 9como jamboton muc'ul puerta ta spasel muc'ul a'tel, aunque bayel mach'atic ya xcontrahinwanic. 10Teme ya xc'oht te Timoteo, xawilic te junuc yo'tan ta awohlilic, como ya'telimbeyej ya'tel te Cajwaltic hich te bin ut'il ho'on. 11Ha yu'un ma me ayuc mach'a peq'uel ya yil, coltayahic scuenta yu'un lamal q'uinal ya suht tal ta jtojol, como ha yac jmahliybel soc te quermanotactique. 12Yan te quermanotic Apolos la jcalbe bayel wocol te yacuc xtal yilex soc te yantic quermanotactic, pero ma ba la sc'an ya xbaht ta ora; ha ya xbaht te bin ora ya xhu' yu'une. 13Wihc'a me asitic, ayuc me yip sch'uhunel awo'tanic, pasahic me lec winiquil, ac'ahic me fuersa. 14Spisil te bintic yac apasic scuentahuc me sc'uxul awo'tanic. 15Quermanotac, ana'ojic te ha sba sit ta Acaya te mach'atic ay yu'un te Estéfanas; ha yac'oj sbahic ta a'batinel yu'un te mach'atic ch'uhltesbilic. 16Ya calbeyex wocol te yacuc awac' abahic ta cuentahinel yu'un te mach'a hich yac spasbelic, soc spisil mach'atic ya xcoltaywanic soc ya x'a'tejic. 17Tse'el co'tan te c'alal tal te Estéfanas, Fortunato soc te Acáico, como ha la ya'bonic te bin ma ba hu' awu'unic yaq'uel, 18como la ya'bonic xan yip co'tan soc ha nix hich la ya'beyex yip awo'tanic. Ich'ahic ta cuenta te mach'atic hich ayique. 19Ya spatbeyex awo'tanic te iglesia ta sq'uinal Asia. Ya spatbeyex awo'tanic ta scuenta Cajwaltic te Aquila soc Priscila soc te iglesia te ya stsob sba ta sna. 20Ya spatbeyex awo'tanic ta spisil te quermanotactique. Talel c'axel xapatbe aba awo'tanic ta scuenta ch'ul uts'uyel. 21Ho'on Pablohon te la jts'ihbabeyex ta jc'ab te pahtil-o'tanil ini. 22Te mach'a ma ba c'ux ya ya'iy ta yo'tan te Cajwaltic Jesucristo, ihlaybil me ac'a c'ohtuc. Talelix te Cajwaltique. 23Ac'a sjoquinex te yutsil yo'tan te Cajwaltic Jesucristo. 24Ta apisilic ayuc ta atojolic te sc'uxul co'tan ta scuenta Cristo Jesús. Hichuc.


Copyright
Learn More

will be added

X\