1 Corintios 15

1Yo'tic, quermanotac, ya calbeyex xan te lec yach'il c'op te calbeyejexix awa'iyique, te awich'ojiquix soc te jun awo'tan ach'uhunejique. 2Ta scuenta te lec yach'il c'op ini te colemexix, teme jc'axel yac awac' ta awo'tanic te c'op la jcalbeyexe; teme ma'uque tojol ach'uhunejic. 3Ta shahchibal la jca'beyex anopic te bin a'boton: Ha te laj Cristo ta scuenta jmultic, hich te bin ut'il ts'ihbabil ta Shun Dios; 4la yich' muquel, soc cha'cuxaj tal ta yoxebal c'ahc'al, hich nix te bin ut'il ts'ihbabil ta Shun Dios; 5la yac' sba ta ilel yu'un te Cefas, patil la yac' sba ta ilel yu'un te lahchaytuhl. 6Patil la yac' sba ta ilel yu'un c'axem ta ho'winic scha'bahc' (500) ta tuhl quermanotactic ta junax buelta; ay to tsobol cuxulic ta ora ini, pero ay wayemix sbaq'uetalic. 7Patil la yac' sba ta ilel yu'un te Jacobo, soc ta patil yu'un spisil te jpuc-c'opetique. 8Ta slajibal la yac' sba ta ilel ta jtojol, ho'on te hichon bin ut'il alal ma ba stahoj yayinab a te ayine. 9Te ho'one peq'uel ayon yu'un te yantic jpuc-c'opetic, ma snuhp'uc te jbihilinej jpuc-c'op, yu'un la jcuts'inlan te iglesia yu'un Dios. 10Pero ta scuenta yutsil yo'tan Dios hich ayon te bin ut'il ayone; soc ma tojoluc te yutsil yo'tan ta jtojol, c'ax hich a'tejemon a te bin ut'il a'tejem spisil te yantic jpuc-c'opetique; pero ma ho'ucon, ha nix te yutsil yo'tan Dios ta jtojol. 11Aunque ho'on, aunque ha te yantic jpuc-c'opetic, hich la jcalcotic sc'op Dios soc hich ach'uhunejic. 12Pero teme ya yich' halel te cha'cuxaj tal Cristo ta yohlil mach'atic chamenic, ¿bin yu'un te ay mach'atic ta awohlilic te ya yalic te ma ba ya xcha'cuxajic tal te mach'atic chamenique? 13Te yu'unuc ma ba ya xcha'cuxajic tal te mach'atic chamenic, ma ba cha'cuxaj tal Cristo te hichuque. 14Soc teme ma ba cha'cuxaj tal te Cristo, tojol te sc'op Dios yacotcotic ta yalel soc tojol ach'uhunejic te hichuque. 15Soc lotil testigohotcotic yu'un Dios te hichuque, como calojcotic ta testigo-c'op te Dios la scha'cuxajtes tal te Cristo; pero ma ba la scha'cuxajtes tal teme melel te ma ba ya xcha'cuxaj tal te mach'atic chamenique. 16Teme ma ba ya xcha'cuxajic tal te mach'atic chamenic, ma ba cha'cuxaj tal Cristo te hichuque. 17Teme ma ba cha'cuxaj te Cristo, tojol ach'uhunejic abi, acuchoj to amulic te hichuque. 18Ha nix hich te mach'atic sch'uhunejic Cristo a te way sbaq'uetalic, jc'axel ch'ayic te hichuque. 19Te ha'uc nax ay smuc'ul co'tantic ta scuenta Cristo te jayeb c'ahc'al cuxulotic ta q'uinal, c'ax hich obol jbahtic a te bin ut'il spisil yantic ants-winiquetic te hichuque. 20Pero cha'cuxajemix tal Cristo ta yohlil mach'atic chamenic, ha sba sit c'ohem yu'un te mach'atic wayem sbaq'uetalique. 21Como te bin ut'il och lajel ta scuenta jtuhl winic, ha nix hich ta scuenta jtuhl winic te ya xcha'cuxaj te mach'atic chamenique. 22Hich te bin ut'il ta scuenta Adán te ya xcham spisilic, ha nix hich ta scuenta Cristo spisilic ya xcha'cuxajic. 23Pero xmelmon ya xcha'cuxajic ta tuhlutuhl; Cristo te sba sit, patil te mach'atic yu'un te Cristo. 24Patil ya xtal te slajibal c'ahc'al, te c'alal Cristo ya ya'be ta sc'ab Dios te Tatil te cuentahinel yu'une, te c'alal jc'axel tsalbilix yu'un spisil mach'atic toyol ayic, te mach'atic ay yip ya'telic soc yu'elic. 25Ya sc'an te ay ta ajwalil ha to c'alal la yac' ta ye'tal yoc spisil te scontrataque. 26Te slajibal jcontrahinwanej te ya yich' lajinel, ha te lajele, 27como Dios la yac' ta ye'tal yoc spisil bintic ay. Te bin ut'il ya yal te ac'bilix ta stojol spisil bintic ay, jamal chican te ma ba ochem tey a te Mach'a la ya'be scuentahin spisil. 28Te c'alal spisil ac'bilix ta cuentahinel yu'un, ha nix hich te Nich'anil ya yac' sba ta cuentahinel ta stojol te Mach'a a'bot ta scuenta yu'un spisil bintic ay, scuenta ha yu'un Dios ya xc'oht spisil bintic ay. 29Teme mayuc cha'cuxajel, ¿bin ya spas te mach'atic ya yac' sbahic ta sjelolinel ta ich'-ha' te mach'atic chamenique? Teme melel ma ba ya xcha'cuxajic te mach'atic chamenic, ¿bin yu'un te ya yac' sbahic ta ich'-ha' scuenta sjelol te mach'atic chamenique? 30Soc ¿bin yu'un te spisil ora quechelotcotic ta wocol? 31Ya calbeyex, quermanotac, te ta scuenta te yutsil q'uinal ya ca'iy awu'unic ta stojol Cajwaltic Jesucristo, jujun c'ahc'al quechelon ta lajel. 32Teme ta scuenta ch'ich'-baq'uet la jtsal jba soc ti'awal chambahlametic ta Éfeso, ¿bin ya jta a? Teme ma ba ya xcha'cuxajic te mach'atic chamenic: Ochucotic ta we'el uch'el, como pajel ya xchamotic, xchi ta halel. 33Ma me xhowiyex; yu'un ay hich ya yich' halel: Te mach'atic chopolic te ya sjoquinotic, ha ya sjimbotic te lequil costumbrehetic cu'untic, xchi. 34Cuxuluc me awo'tanic soc ma me xalehulan amulic, yu'un ay mach'atic ma ba ya sna'beyic sba te Diose. Scuenta aq'uexlalic te hich ya cal. 35Pero ay wan mach'a hich ya sjoc'oy: ¿Bin ut'il ya xcha'cuxajic te mach'atic chamenic? ¿Bin yilel sbaq'uetalic ya xcha'cuxajic soc? xchi wan. 36¡Ma xana' q'uinal! Te bin yac ats'un, ma ba ya xcol tal teme ma nahiluc ya xchame. 37Te bin yac ats'un, ma ha'uc te bin ya xloc' tal ta patil, ha nax sbac' trigo o yan te bin yac ats'une. 38Dios ya ya'be sbaq'uetal, ha chican yo'tan stuquel bin yilel, te jujuchahp awalil ay sbaq'uetal yu'un. 39Ma pajaluc sbaq'uetalic spisil bintic cuxajtic, yan sbaq'uetal ants-winiquetic, yan sbaq'uetal chambahlametic, chayetic, soc mutetic. 40Yantic bintic ay ta ch'ulchan, soc yantic bintic ay ta bahlumilal; pero yan yutsilalic a te bintic ay ta ch'ulchan, soc yan yutsilalic a te bintic ay ta bahlumilal. 41Yan yutsilal a te c'ahc'al, yan yutsilal a te u, yan yutsilal a te eq'uetic; yantic yilel yutsilalic ta jujun chahp. 42Hich nix ay te cha'cuxajel yu'un te mach'atic chamenique. Ya xc'a' te bin ya yich' muquel, pero mayuquix sc'a'emal a te ya xcha'cuxaj tale; 43mayuc sc'oblal a te ya yich' muquel, pero ayix yutsilal a te ya xcha'cuxaj tale; mayuc yip a te ya yich' muquel, pero ayix yip a te ya xcha'cuxaj tale; 44ch'ich'-baq'uet a te ya xmucot, pero baq'uet scuenta espíritu te ya xcha'cuxaj tale. Teme ay baq'uet scuenta ch'ich'-baq'uet, ay baq'uet scuenta espíritu. 45Hich ts'ihbabil: Te sba winic Adán, a'bot scuxlejal, xchi; te slajibal Adán, ha espíritu te ya yac' cuxlejal. 46Ma ha'uc nahil ay te bin scuenta espíritu, ha nahil ay te bin ch'ich'-baq'uet, patil te bin scuenta espíritu. 47Te sba winic loq'uem tal ta lum, ha yu'un bahlumilal; te schebal winic, ha te Cajwaltic, talem ta ch'ulchan. 48Te bin yilel te mach'a talem ta lum, hich nix yilel te mach'atic ayic ta scuenta bahlumilal; te bin yilel te mach'a talem ta ch'ulchan, hich nix yilel te mach'atic ayic ta scuenta ch'ulchan. 49Hich te bin ut'il quich'beyejtic stalel te bin scuenta bahlumilal, ha nix hich ya quich'betic stalel te bin scuenta ch'ulchan. 50Pero ya calbeyex, quermanotac, te ch'ich'-baq'uet ma xhu' ya x'a'bot yich' te cuentahinel yu'un Dios, soc te bin scuenta c'a'el ma xhu' ya x'a'bot yich' te bin ma xc'a'e. 51A'iya awa'iyic, ya calbeyex te bin mayuc mach'a sna'oj: Ma jpisilticuc ya xway jbaq'uetaltic, pero jpisiltic ya xc'atp'ujotic, 52jts'ihn nax, ta muhts' nax ta sitil, ta slajibal yoq'uel corneta, como ya yich' oq'uesinel corneta, te mach'atic chamenic mayuc sc'a'emal a ya xcha'cuxajtesotic tal, soc te ho'otic ya xc'atp'ujotic, 53como te baq'uet te ya xc'a' ya sc'an ya sc'u'in te bin ma ba ya xc'a', soc te baq'uet te ya xlaj ya sc'an ya sc'u'in te bin ma xlaje. 54Te baq'uet te ya xc'a', c'alal yich'ojix te bin ma xc'a', soc te baq'uet te ya xlaj, c'alal yich'ojix te bin ma xlaje, hich ya xc'oht ta pasel a te bin ts'ihbabil: Jc'axel tsalbilix te lajele. 55Ha'at, lajel, ¿banti ay te ac'uxule? Ha'at, muquenal, ¿banti ay te tsalaw awu'une? xchi. 56Como te sc'uxul te lajel ha te mulile, soc te yip te mulil ha te Ley. 57Pero wocol yal Dios yu'un te ya yac' ca'iytic tsalaw ta scuenta te Cajwaltic Jesucristo. 58Ha yu'un, quermanotac te c'uxex ta co'tan, ayuc me yip awo'tanic soc junuc me awo'tanic, spisil ora behbehuc me ta muc'ubel awu'unic te ya'tel te Cajwaltic, como ana'ojic te ma tojoluc ya xc'oht te awa'telic yu'un te Cajwaltique.


Copyright
Learn More

will be added

X\