1 Corintios 1

1Pablo, te ic'bil ta jpuc-c'opil yu'un Jesucristo ta scuenta sc'anojel yo'tan Dios, soc nix te quermanotic Sóstenes, 2ya jpatbecotic yo'tanic te iglesia yu'un Dios te ay ta Corinto, te mach'atic ch'uhltesbilic ta scuenta Cristo Jesús, te ic'bilic yu'un pajal ya yich'ic ch'ultesel soc spisil yantic ta bayuc te ya yalbeyic wocol ta scuenta sbihil te Cajwaltic Jesucristo, te Ajwalil yu'unic soc cu'untic. 3Ac'a c'ohtuc ta atojolic te yutsil yo'tan soc te lamal q'uinal yu'un te Jtatic Dios soc te Cajwaltic Jesucristo. 4Spisil ora ya calbe bayel wocol Dios awu'unic, yu'un te yutsil yo'tan Dios te a'bibilex ta scuenta te Cristo Jesús; 5como ha ta scuenta te buen jc'uhlej c'ohemex, ta spisil c'opetic soc spisil bintic ay ta na'el, 6hich smuc'ul awich'ojic te bin ut'il ban c'alal yich'oj yip ta awo'tanic te testigo-c'op sc'oblal te Cristo, 7ha yu'un mayuc junuc mahtanil ya spasbeyex falta te c'alal yaquex ta smahliyel te ya xchicnaj tal te Cajwaltic Jesucristo, 8ha te mach'a ya ya'beyex yip awo'tanic yalel c'alal ta slajibal ora, scuenta yu'un hich mayuc amulic ya xtahbotex c'alal ya xtal te Cajwaltic Jesucristo. 9Stalel jun yo'tan stuquel te Diose, te ha la yiq'uex scuenta yu'un jun awo'tanic ya xc'ohex soc te Snich'an, ha te Cajwaltic Jesucristo. 10Quermanotac, ya calbeyex wocol ta scuenta sbihil te Cajwaltic Jesucristo, te junuc ac'opic ta apisilic, te manchuc yac ajat abahic, te jc'axel junuc awo'tan abahic soc junuc snopojibal awu'unic; 11como te mach'atic ayic yu'un Cloé la yalbonic te ay hahchem c'op awu'unic, quermanotac. 12Ay laj hich yac awalic: Ho'on jt'unoj te Pablo; o: Ho'on jt'unoj te Apolos; o: Ho'on jt'unoj te Cefas; o: Ho'on jt'unoj te Cristo, ay laj xchihex. 13¿Yu'un bal sjatoj sba te Cristo? ¿Ha bal cham ta cruz awu'unic te Pablo? ¿La bal awich'ic ha' ta scuenta sbihil te Pablo? 14Wocol yal Dios yu'un te mayuc la jca'beyex awich'ic ha', ha nax te Crispo soc te Gayo, 15scuenta yu'un mayuc mach'a ya xhu' ya yal te ho'on ta scuenta jbihil te a'bot yich' ha'. 16Soc la nix ca'be yich' ha' ta sjunal sna te Estéfanas; ma jna' teme ay to yantic la jca'be yich'ic ha'e. 17Como ma ha'uc sticonejon ta yaq'uel ich'-ha' te Cristo, ha sticonejon ta spuquel te lec yach'il c'op, pero ma ha'uc scuenta sp'ijil-c'op ants-winiquetic, scuenta yu'un ma tojoluc ya xc'oht a te cham ta cruz te Cristo. 18Te mach'atic ch'ayel ya xbahtic, howil c'op cuybil yu'unic sc'oblal te cruz, yan te ho'otic te ya xcolotic, ha yu'el te Diose. 19Melel hich ts'ihbabil: Ya jimbe sp'ijilic te mach'atic p'ijic; ya cac' te mayuc scuentahil ya xc'oht te bin snopoj te mach'atic ay bin ya sna'ic, xchi. 20¿Banti ay te mach'a p'ij? ¿Banti ay te escribano? ¿Banti ay te mach'a ya xtsalawan ta c'op ta bahlumilal? ¿Ma bal ha'uc te Dios la yac' ta howil c'op te sp'ijil mach'atic ayic ta bahlumilal? 21Ta scuenta sp'ijil yo'tan Dios, ma ba la sna'be sba Dios ta scuenta sp'ijil mach'atic ayic ta bahlumilal; lec la ya'iy Dios te ya yac' coluc te mach'atic ya sch'uhunic ta scuenta yalel sc'op Dios te cuybil ta howil c'ope. 22Te judíohetic ya sc'an ya yilic señahiletic, soc te griegohetic ya slehic p'ijil-o'tanil, 23yan te ho'otic ya calbetic sc'oblal te cham ta cruz te Cristo: te ha c'ohchinojibal c'ohem yu'un te judíohetic, soc ha howil c'op cuybil yu'un te griegohetique; 24yan te mach'atic ic'bilic yu'un Dios, judíohetic soc griegohetic, ha yu'el Dios soc ha sp'ijil yo'tan Dios te Cristo, 25como te bin sonso yu'un Dios c'ax hich p'ij a te bin ut'il sp'ijil te ants-winiquetic, soc te bin mayuc yip yu'un Dios c'ax hich yip a te bin ut'il yip te ants-winiquetique. 26Quermanotac, na'a awa'iyic bin awilelic te c'alal ic'bilex yu'un te Diose, mayuc tsobolex te ay ap'ijilic ta scuenta ch'ich'-baq'uet, soc mayuc tsobolex te tulan awa'telic o te muc' ac'oblalique; 27ha tsahbil c'oht yu'un Dios te bin mayuc sc'oblal ta bahlumilal scuenta yu'un ya sq'uexlaltes te mach'atic ay sp'ijilic; soc ha tsahbil c'oht yu'un Dios te bin mayuc yip ta bahlumilal scuenta yu'un ya sq'uexlaltes te mach'atic ay yipic; 28soc ha tsahbil c'oht yu'un Dios te bin mayuc stuc soc te bin p'ajbil ta bahlumilal, soc te bin ma ba ay, scuenta yu'un ya slajimbe sc'oblal te bin aye, 29scuenta yu'un mayuc mach'a ya xhu' ya stoy sba ta stojol a te Diose. 30Ha nix ta scuenta Dios te jun ayex soc Cristo Jesús, te ha sp'ijil co'tantic c'oht yu'un Dios soc te ha ta scuenta te halbotic te toj ayotic, te ch'ultesbilotic soc te colemotic ta libre yu'une, 31scuenta yu'un, hich te bin ut'il ts'ihbabil: Te mach'a ya sc'an ya stoy sba, ac'a stoybe sc'oblal te Cajwaltique, xchi.


Copyright
Learn More

will be added

X\