TITO 2

1Tejkan uxintʼi jamalaninin, maqskʼiniy chʼantaun kaval kun yu ox chivinti yu masukantacha. 2Kʼalakmalanitʼi ni xapaynin para katalhistaklhi ixputsukukʼan para katatiʼukxuntayal tacha lay kalakputoʼoyakal. Ex ox katalhistaklhi ixjatapastakʼatkʼan, vachuʼ ox kaval ixlhakapuʼatkʼan kun ixjapaxkantikʼan y katatayanil tejkan lhitaʼay. 3Vachu va chun ni xanatin maqskʼiniy katatiʼukxuntayal tacha paxtoqniy ixlapanakni Dios, jantu katalaklkanal, jantu katataʼapʼal. Maqskʼiniy katamasul yu ox la ixputsukukʼan. 4Chuncha yuʼuncha lay kalakmalanil yu jatsiʼinkaʼ xanatin para kataʼachanil ixapaykʼan y katapaxkal sasʼatʼankʼan. 5Kalakmalanil katalhistaklhi ixputsukukʼan y jantu katalhitayal yu jantu ox la ixjatsukuntikʼan, y ox katatapatsal laqa chaqaʼ y kajamapayninil y katatoʼoyal ixapaykʼan. Tejkan yu alati lapanakni chuncha katalaqtsʼinaʼ, ex jantu lay katanaul ni jantu ox ixchivinti Dios. 6Vachu va chun kalaqxaʼalatʼi yu tsʼalankaʼ para katalhistaklhi ixputsukukʼan. 7Tachun la mimputsuku kamakʼatʼi yu lajʼoxi y chuncha lay katalaqtsʼiʼin tacha maqskʼiniy kataputsukul. Tejkan malaniy ixchivinti Dios jantu kalhitayal yu jantu ox y jantu kaʼachʼajtʼay. 8Ox kamakʼatʼi minchivinti para jantu lay katamukʼanin laqtaqal. Ex chuncha yu talaktanchaniyan katalhimaxananaʼ, jantu lay kintalhikiltayan. 9Kalakmalanitʼi ni oqxtamatin para katatoʼoyal ixʼukxtinkʼan la ixlhitapatskʼan y para katamakal yu katalhipaʼinil ixʼukxtinkʼan y jantu kataqaltayanal tejkan laklhijunkan lhitapatsa. 10Jantu kataʼalhaunil, va katamakal para kalaklhiʼaynkal. Ex chuncha por tachun yu tamakay katalhimasul ni va la ox ni chivinti yu lhichiviniy Dios kiJamalaqtaxtunukʼan. 11Chavaycha Dios va masuta ixjamapayninti yu laqpumalaqtaxtuy tachun ni lapanakni. 12Kintamasuniyan ni kamakauntijlau yu jalaktuʼunuʼ putsuku kun yu makaputunkan aniy lakamunukpaʼ. Vachu kintamasuniyan kalhistakvi kimputsukukʼan y ox katiʼukxuntayau tacha lhinajun Dios aniy lakamunukpaʼ. 13Chavaycha pakxanʼiyau yu kalhiʼachantajuyau tejkan kun tachun ixʼayaxtu kintatasuniyan yu ay Dios kiJamalaqtaxtunukʼan Jesucristo. 14Yucha maqxtaqkal ixmaqnika por kijnankʼan para kintamalaqtaxtun la kintalaqalhinkʼan. Ex lay kintalaqlaʼoxinin ketsukuntikʼan para ixlapanakni kajuu yu ayaj makaputunau yu lajʼoxi. 15Ex tachun ni anchanu, uxintʼi maqskʼiniy kʼamalanin. Kʼalakmalakʼaʼulatʼi ni lapanakni y kʼalaqlhixaʼalatʼi kun mimpalhachimoʼon. Jantu matichun kʼaʼakchʼintaman.

will be added

X\