TITO 1

1Kitʼin kPablo, va ixʼoqxtamati Dios kunita. Ni Dios jalaksakta ixlapanakni y Jesucristo kimalaqachata para kaklaqputeʼenil y katalhakapuʼal. Ex lay katamispal tas maqskʼiniy katatiʼukxuntayal kun Dios. 2Tapakxanʼiy ni jatsukunti yu jantu aqtaun kamiʼoyaʼ. La maqancha tejkan jantukaʼ aqtaynil ni lakamunukpaʼ ni Dios naul kaxtaʼaʼ ni anchanuʼ jatsukunti. Yucha jantu makanunun. 3Ni Dios masul ixchivinti tejkan ox val para katasul. Va masul por ixlaqputeʼeka, yucha ni lhitapatsa yu kixtaqnil Dios yu kiJamalaqtaxtunukʼan. 4Va ikmastakʼayan uxintʼi, Tito, va tacha laqsaval kintsʼal kʼatʼi va por chʼantaun kilhakapuʼatkʼan. Ni kimPay Dioskʼan kun Jesucristo yu kiJamalaqtaxtunukʼan kaxtaqnin jamapayninti y oxamaktaun kamakan. 5Va ikmakaunchaʼan ancha Kreta para kalaʼoxitʼi yu tsʼanqay y para kalakʼulatʼi xalajʼaynin yu talhakapuʼan taun taun japutaulan tacha klhijunin. 6Qayntaun lapanaki para kalakʼulakal tacha xaʼay jalhakapuʼanan maqskʼiniy ox katiʼukxuntayal. Jantu lay kamukʼanikal laqtaqal, vamun qayntaun xanati katʼatsukul. Yu sasʼatʼan vachuʼ maqskʼiniy katalhakapuʼal, jantu kalakmispakal tacha jalaktuʼunun. Ox taqalasmaknan yu laklhijunkan. 7Qayntaun lapanaki yu ulakan tacha xajalhistaknaʼ yu talhakapuʼan, yucha va xtaqnikan ixlhitapatsa Dios. Xlhiyucha maqskʼiniy ox katiʼukxuntayal. Jantu lay kamukʼanikal laqtaqal, jantu lay ay kʼatsan, jantu lay akxaunaʼ joʼati kaval, jantu kataʼapʼal, jantu kalakasamanal, jantu kamakanuskʼil tumin. 8Maqskʼiniy kaval qayntaun yu ox jalaqaʼiy lapanakni la ixchaqaʼ. Vachuʼ kun achati makay yu lajʼoxi, vachuʼ lhistakkan ixjatapastakʼati, ox ukxuyal, makay yu lhipaʼiniy Dios, ox lhistakkan ixputsuku. 9Maqskʼiniy kataylhaʼal kun ni chivinti yu lhakapuʼankan vachu va tacha malanikantacha. Chuncha lay kalakmalanil yu alati kun ni chivinti yu laqsaval. Vachu maqskʼiniy lay kalaqxaqalal ni lapanakni yu talaktanchay ni ox chivinti. 10La alin yu jantu tatoʼoyay yu xalajʼaynin. Yuʼuncha va ayaj chivinʼoj lapanakni yu tamakanununputun. La alin israelitas yu chuncha talay. 11Yuʼuncha jalaktʼilhiniy ixjatapastakʼatkʼan lapanakni yu aqataun chaqaʼ tavilanal. Chuncha talay por yu chivinti yu jamalaninin por tamakanulhajaputun tumin. Xlhiyucha maqskʼiniy saq kalakmakakal. 12Qayntaun yu machaqaʼ Kreta yu ixtoʼoyakan tacha profeta va naul: “Yu machaqan Kreta tamakanununʼalhiy, va tacha maqtalin yu ayajnan, va jamalhaqnin, y ayaj lhuu tavajin.” 13Va laqsaval yu naul. Xlhiyucha laqatapʼasta kalaqxaʼalatʼi ixlapanakni Jesucristo para ox kaval ixlhakapuʼatkʼan. 14Ex chuncha jantucha katamakal kuenta yu valiʼiy kuentos yu tamakay ni israelitas. Vachu jantu katamakal kuenta yu tanajun alati lapanakni yu tamakauntijlay yu laqsaval. Yuʼuncha talhinajun tisuncha yu ox ali tisuncha yu jantu ox, mas jantu laqsaval. 15Chavay yu talhitʼajun ox jatapastakʼati, yuʼuncha tanajun tachun va lajʼoxi. Pero yu jantu ox talakpastaknan y jantu talhakapuʼan, yuʼuncha tanajun jantu tuʼuchun lajʼoxi. Jantu ox kaval ixjatapastakʼatkʼan vachu jantu lay tamispay tisuncha yu ox, tisuncha yu jantu ox. 16Tanajun tamispay ni Dios pero la ixputsukukʼan tasuy ni jantu laqsaval tamispay. Jantu ox laklhaʼankan, jantu tatoʼoyanan, vachu jantu lay tamakay tuʼuchun yu ox.

will be added

X\