1 Ex chuncha chavaycha jantucha tuʼuchun laqtaqal mukʼanikanau ni kijnankʼan yu tiʼukxuyanau kun Cristo Jesús, incha jantucha katijuntayau tacha yu valiʼiy lapanakni, va katijuntayau tacha lhinajun yu Espíritu Santo. 2 Chavay ni Espíritu Santo xtaʼa jatsukunti yu minachal kun Jesucristo. Chuncha kimalaqtaxtul la kintalaqalhin yu lhixajachal lhinin. 3 Yu valiʼiy lapanakni ixtatsʼanqaniy tapʼasta para lay katamakal yu ixlhinajun laka lhachimoʼon. Pero Dios malaqachal isTsʼal para kalhitsukul lakatunaj tacha kijnan yu maqtaqalhinanau. Chuncha kintamaxtunin la ixtapʼasta ni talaqalhin. 4 Chuncha makal para ox kintalaqtsʼin ni Dios tacha yu lhinajun ixlhachimoʼon. Chuncha lhitapasayau ni kijnan yu jantucha katijuntayau tacha yu valiʼiy lapanakni, va katijuntayau tacha lhinajun ni Espíritu Santo. 5 Yu valiʼiy lapanakni tapastakʼa katamakal vamun tacha yuʼuncha tamakaputun, pero yu talhitʼajun ni Espíritu Santo tapastakʼa tacha katamakal yu lhinajun ni Espíritu Santo. 6 Yu xajatapastakʼati yu valiʼiy lapanaki lhixajachal lhinin, pero ixjatapastakʼati ni Espíritu Santo lhixajachal yu ox jatsukunti yu oxamaktaun. 7 Yu valiʼiy lapanaki pastakʼa kamakal tacha yucha makaputun, va ixtʼalaxkayaʼ junita ni Dios. Jantu makay kuenta ixlhachimoʼon ni Dios, jantu lay toʼoyay. 8 Yu tatiʼukxuntayay tacha valiʼiy lapanakni jantu talhipaʼiniy ni Dios. 9 Pero uxiknan jantucha katsʼukʼutʼik tacha valiʼiy lapanakni. Va lhitʼaunatʼik ni Espíritu Santo incha laqsaval ixʼEspíritu ni Dios alinta kun uxiknan. Pero yu jantu kalhitsukul ixʼEspíritu ni Cristo, jantu ixnavin Cristo kaval. 10 Incha ni Cristo alinta kun uxiknankʼan ex ni Dios lajʼoxin tamakanin. Mas la milakatunajkʼan va tacha kʼanitʼik por yu talaqalhin, pero la milhitsukunukʼan va kʼujtʼatʼik. 11 Ni Dios majkujuchoqol ni Jesús tejkan ixnita. Chuncha incha ixʼEspíritu Dios alinta kun uxiknan ex vachu la milakatunajkʼan yu miʼojoy kataxtaqnichoqoyan jatsukunti. Chuncha kamakayaʼ por ixʼEspíritu yu alinta kun uxiknankʼan. 12 Ex chuncha, ketʼalaqaunin, alin yu maqskʼiniy katapatsaniu pero jantucha maqskʼiniy kamakau yu ixmakaputunau tacha valiʼiy lapanakni. 13 Incha katʼiʼukxuntʼayapitik makanan yu talaqalhin ex kʼaniyapitik. Pero incha por ixtapʼasta ni Espíritu Santo kʼamaqniʼoyapitik yu talaqalhin, ex katsʼukʼuyapitik. 14 Tachun yu lakmaʼukxuntayaniy ixʼEspíritu ni Dios yuʼuncha sasʼatʼancha Dios tajunita. 15 Yu Espíritu yu laʼaʼitʼik, yucha jantu talhaʼanchoqoyan la xajatsukunti talhanti. Yucha va tamakayan sasʼatʼan Dios. Ex por ni Espíritu tʼasaniyau ni Dios, naunau: “¡KimPay, kimPay!” 16 Ni Espíritu Santo kintamakʼatsaniyan la kilhitsukunukʼan ni va sasʼatʼan Dios juntau. 17 Chavaycha incha sasʼatʼan juntau ex vachu kintamapasaniyan ixmaqaliti yu kintapaxtoqniyan katʼalaqaʼiyau kun Cristo. Chuncha kunaʼ incha tʼamaqanlqajnanau para vachu katʼalaqaʼiu yu ixʼoxixtu. 18 Kitʼin ox ijkʼatsay ni tachun yu chavay lhamaqanlqajnanau jantu ay kaval tacha ixʼoxixtu Dios yu kintamasuniyankaʼ. 19 Tachun yu makal ni Dios va ayaj tapakxanʼita ni anchanu julchan tejkan Dios kintamasuyan ni va sasʼatʼan juntau. 20 Tachun yu makakal va jantucha ox val. Jantu va chuncha kajunputulcha, va chuncha lhinaunkal. Pero mas chuncha val, va si tapakxanʼiy 21 ni julchan tejkan kalaqtaxtuyaʼ yu tʼajun talaktʼilhiniʼ, tejkan oxamaktaun katalaqaʼiyaʼ ixʼoxixtukʼan ni sasʼatʼan Dios. 22 Kʼatsayau ni lakamunukpaʼ tus chavaycha va jatʼijninta, tacha tejkan jamaqanlqajnan qayntaun xanati tejkan maqlaqavanan. 23 Jantu vamun ni lakamunukpaʼ jatʼijnin, vachu kijnankʼan. Lhitʼaunau ni Espíritu Santo, yucha yu pʼunaj kintaxtaqnitan ni Dios. Maqanlqajnanau y pakxanʼitau ni anchanu julchan tejkan ni Dios ox kintamakayan sasʼatʼan, tejkan oxamaktaun katajunaʼ kilakatunajkʼan. 24 Dios kintamalaqtaxtun y kintamakan para kapakxanʼiu yu ox. Pero incha kʼalaqtsʼicha yu kapʼakxanʼitʼi ex jantucha maqskʼiniy kapʼakxanʼitʼi. Jantu matichun pakxanʼiy yu lhitʼajuncha. 25 Pero incha laqsaval pakxanʼiyau yu jantukaʼ laqtsʼinau, ex vananaj kun maqantaulati pakxanau. 26 Vachu ni Espíritu Santo kintaʼaqtayjuyan tejkan kintatsʼanqaniyan tapʼasta. Jantu ox kʼatsayau tisuncha kaskʼiniu Dios. Pero yu Espíritu Santo yucha tapayniy por kijnankʼan, va lhijatʼijnin yu jantu lay naunkan. 27 Ni Dios yu jalaqtsʼiniy ixjalhanutkʼan ni lapanakni yucha mispay tacha pastakʼa ixʼEspíritu. Kʼatsaʼojoy yu skʼin ni Espíritu Santo tejkan tapayniniy por ixlapanakni tacha najun ni Dios. 28 Ox kʼatsayau ni para yu taʼachaniy Dios, ni Dios makay para ox kaxajʼochal tachun yu tapasay la ixjatsukuntikʼan. Va yuʼuncha yu jalakjuntaʼita Dios para kataval tacha yucha najun. 29 Ni Dios jalakmispal ixlapanakni tejkan jantukaʼ ixtatsukuy. Jalaksaklhi para kataval tacha ni Cristo Sasʼatʼa, ex chuncha ni Cristo tacha xajayaʼ kaval yu pumalhuu ixtʼalaqaunin. 30 Yu jalaksakta vachu yuʼuncha jalakjuntaʼita. Vachu yu jalakjuntaʼita yuʼuncha jalaqtsʼintacha tacha lajʼoxin lapanakni. Yu jalaqtsʼinta tacha lajʼoxin lapanakni, yuʼuncha jamaqxtaqnita ixʼoxixtu. 31 ¿Ex por tachun yu aniy tisuncha kanaunaucha? Incha Dios alinta kun kijnankʼan ex jantu matichun tuʼuchun lay kintamakaniyan. 32 Dios jantu kamaʼal Sasʼatʼa, va maqxtaqlhi para kamaqnikal por kintachunkʼan. Chuncha incha kintaxtaqnin Sasʼatʼa ex laqsaval chux kintaxtaqniyan. 33 ¿Taʼayucha lay kintatislajmayan yu kintalaksaktan ni Dios? Va Dios yu ox kintalaqtsʼinan. 34 ¿Taʼayucha lay kintamukʼaniyan laqtaqal? Ni Cristo nil y kujchoqol, ex taulnil la ixlhijakanaj ni Dios, ancha kintalhitapayniyan. 35 ¿Taʼayucha lay kintamamakauniyan yu ixjapaxkanti ni Cristo? Jantu yu jamaqanlqajnati, jantu yu lhitaʼay la ketsukuntikʼan, jantu yu kintalhixkayan, jantu yu ay chavan, jantu tejkan kintatsʼanqaniyan kilaqchʼitkʼan, jantu tejkan va laycha kaniu, jantu tejkan kintamaqniputunan. 36 Va chuncha tsʼoqkanta, va junkan ni Dios: Por uxintʼi va lhilhiy kintamaqniputunan. Kintalaqtsʼinan tacha borregos yu va laycha kalaqmaqnikal. 37 Pero mas tachun yu anchanu iktapasayau, si ikmaqalhajaʼoyau kun ixtapʼasta ni Cristo yu kintapaxkayan. 38 Tus ox ijkʼatsay ni jantu tuʼuchun lay kintamamakauniyan ixjapaxkanti ni Dios, jantu yu lhinin, jantu yu tapasay la ketsukuntikʼan, jantu ixmayulnin Dios vachuʼ jantu yu aqmoqxnun, jantu yu chavay tapasay, jantu yu katapasayaʼ, jantu tuʼuchun yu lhitʼajun tapʼasta, 39 mas yu alin talman, mas yu alin pulman, mas tuʼuchun yu makakanta, jantu lay kintamamakauniyan ixjapaxkanti ni Dios yu alin la ixjatsukunti ni Cristo Jesús kiJalachimoʼonukʼan.
