1 Chavaycha yu Abraham va kimpaykʼan kintachunkʼan yu israelitas juntau. ¿Tas kalhichiviniucha ni yucha? 2 Ni Dios laqtsʼil ni Abraham tacha ox lapanaki pero jantu kaval por tuʼuchun yu makal. Incha kaval por yu makal, ex kapaxtoqnil la ay kakʼatsal, pero jantu la ixlakaʼukxpuʼ ni Dios. 3 La ixchivinti Dios najun ni Abraham lhakapuʼal ni Dios, xlhiyucha ni Dios laqtsʼil tacha ox lapanaki. 4 Qayntaun oqxtamati yu tapatsay yucha lhajay por ixlhitapatsa, jantu por ixmapaynika. 5 Yu jantu talaqtaxtuputun por tamakay yu ox, incha talaqtaxtuputun por talhakapuʼan, ex ni Dios jalaqaʼiy tacha lajʼoxin lapanakni por ixlhakapuʼatkʼan, mas alin ixtalaqalhinkʼan. 6 Vachu va chuncha maqancha naul ni David ni va ayaj achan ni lapanaki yu Dios laqaʼiy tacha ox junita mas jantu por yu makay. 7 Va inchineʼ tsʼoqlhi ni David: Talajʼachantacha ni lapanakni yu laqmalaqmixiniʼokanta ixtalaqalhinkʼan, yu lakxakaniʼokantacha ixlaqtaqalkʼan. 8 Ayaj achan ni lapanaki yu Dios jantu makaniy kuenta ixlaqtaqal. 9 Yu anuʼ achati, jantu vamun para yu israelitas yu lakxvililichukʼupʼuxnikanta, vachu para yu alati lapanakni. Tacha iknaunau, ni Dios laqaʼil ni Abraham tacha ox lapanaki tejkan lhakapuʼal. 10 ¿Tas ixjunitacha ni Abraham tejkan laqaʼikal, tejkan laqaʼil Dios? ¿Va ixvililichukʼupʼuxnikantacha o jantu? Va jantukaʼ ixvililichukʼupʼuxnikanta. 11 Yu Abraham laqaʼikal tacha qayntaun lapanaki yu ox kaval tejkan jantukaʼ ixchukʼupʼuxnikanta. Ex astan chukʼupʼuxnikal para kamasul ni laqsaval ni Dios laqaʼil por ixlhakapuʼati. Chuncha val xajapay tachun yu jalaqaʼikan tacha lajʼoxin kataval por ixlhakapuʼatkʼan mas jantukaʼ lakchukʼupʼuxnikanta. 12 Vachu val xajapay tachun ni israelitas yu lakchukʼupʼuxnikan pero jantu xajapay kaval por lakchukʼupʼuxnikan, maqskʼiniy katalhakapuʼal. Chuncha ni Abraham va xajapay tachun yu talhakapuʼan tacha lhakapuʼal ni yucha tejkan jantukaʼ ixchukʼupʼuxnikanta. 13 Ni Abraham va junkal ni lakamunukpaʼ va ixnavinkʼan kunaʼ ni sasʼatʼan. Jantu chuncha kajunkal por ixmakay yu lhinaunkan, va por ixlhakapuʼan. Xlhiyucha ni Dios ixlaqtsʼin tacha ox lapanaki. 14 Incha Dios ixnaul ixnavinkʼan kunaʼ vamun incha katamakal yu ixlhinajun, ex jantu xtapal kaval ixlhakapuʼatkʼan y jantu lay matichun kalaqaʼil yu kaxtaqlhi ni Dios. 15 Ixlhilukuj ni Dios tapaxtoqniy yu jantu tamakay yu lhinajun. Pero incha jantu kalhinaul tuʼuchun ex jantu kaʼalil laqtaqal. 16 Ni Dios junil ni Abraham ni kaxtaqniyaʼ ni lakamunukpaʼ va por ixlhakapuʼati, jantu por yu ixmakay, va por ixjamapayninti ni Dios. Ex paxtoqniy tachun sasʼatʼan ni Abraham, jantu vamun ni israelitas yu tamakay yu lhinaunkan, va tachun yu talhakapuʼan tacha lhakapuʼal ni Abraham. Yucha va kimpaykʼan kintachunkʼan. 17 Va chuncha tsʼoqkanta la ixchivinti Dios, va junkal ni Abraham: “Kakmakayan xajapay oqxlaqlhuu lapanakni.” Va chuncha kintalaqtsʼinan ni Dios tacha sasʼatʼan ni Abraham. Yucha lhakapuʼal ni Dios yu majkujuchoqoy ni janinin, yu lhinajun kaʼalil yu jantukaʼ alin. 18 Mas ixtasuy tacha jantu kaʼalinaʼ yu junil Dios, Abraham vananaj ixpakxanʼita y lhakapuʼanil. Va chuncha val xajapay oqxlaqlhuu lapanakni. Vachu va tacha junkal: “Oqxlaqlhuu kaʼalinaʼ yu mesʼatʼan.” 19 Abraham jantu ixʼalin sasʼatʼa, va laycha ixlhitʼajun taun ciento jachʼitin, la ixlakatunaj jantucha kalhitsukul tapʼasta. Vachu ixlakatunaj ixanati, yu Sara, jantucha lay kalhitsukul jasʼatʼa. Pero yu Abraham jantu kamakauntijlal ixlhakapuʼati. 20 Jantu aqtaun kanaul ni Dios jantu lay kaxtaqnil sasʼatʼa, va apalay tapʼasnil ixlhakapuʼati. Va la ay makal ni Dios. 21 Va ixkʼatsʼay ni laqsaval Dios lay kamakaʼoyaʼ tachun yu junil. 22 Xlhiyucha ni Dios laqaʼil tacha lapanaki yu ox junita por ixlhakapuʼati. 23 Taʼan chuncha lhitsʼoqkanta Abraham ni va chuncha laqaʼikal jantu vamun para yucha katsʼoqkal, 24 vachu para kijnankʼan. Chuncha lajʼoxin laqtsʼinkanau incha lhakapuʼanau Dios yu majkujuchoqol kiJalhachimoʼonukʼan Jesús tejkan ixnita. 25 Yucha xtaqkal para kamaqnikal por kintalaqalhinkʼan. Ex majkujuchoqokal para kintalaqaʼin ni Dios tacha lapanakni yu lajʼoxin juntau.
