ROMANOS 3

1¿Ex tisuncha xtapal kʼapʼutsʼukʼu israelita? ¿Tas kaʼaqtayjun incha kʼaxvililichʼukʼupʼuxnikʼa? 2Ayaj xtapal kʼapʼutsʼukʼu israelita. Va yuʼuncha ni Dios pʼunaj jaxtaqnil ixchivinti. 3Pero lati jantu katalhakapuʼanil ixchivinti. ¿Exni? ¿Lhilay va xlhiyucha ni Dios jantucha lay lhakapuʼanikan? 4Jantu chuncha kaval. Dios si najun yu laqsaval mas tachun ni lapanakni talaklkanan. Va chuncha tsʼoqkanta, junkan ni Dios: Kakʼatsakanaʼ ni laqsaval minchivinti. Vachu incha matichun mukʼaniputunan laqtaqal, si ox kʼaxajtʼachiy. 5Tejkan makayau talaqalhin, ex apalay ox tasuy ni Dios tachun ox makay. ¿Exni? ¿Lhilay va xlhiyucha ni Dios jantu ox makay tejkan kintamukʼaniyan laqtaqal? (Chuncha tanajun lati lapanakni.) 6Jantu laqsaval kaval. Incha Dios jantu ox makay ex jantu kalayaʼ kamukʼaniyaʼ laqtaqal yu xalapanakni lakamunukpaʼ. 7Lati tanajun ni apalay ox kʼalaklkʼan. Ex chuncha apalay ox katasul ni laqsaval yu najun ni Dios, ex apalay katoʼoyakal. Xlhiyucha jantu maqskʼiniy kimukʼanil kilaqtaqal. 8Vachu tanajun: “Apalay ox kamakau talaqalhin para kaxajchal yu lajʼox.” Yuʼuncha tanajun va chuncha ikmalaniy kitʼin pero kintamanuniy jalaklkanti. Va yuʼuncha tapaxtoqniy ixmaqanlqajnatkʼan. 9¿Exni? ¿Lhilay ni kijnankʼan yu israelitas apalay lajʼox juntau xajantu yu alati lapanakni? Jantu laqsaval kaval. Yu tacha va aniykaʼ klamasuniu, mas yu israelitas, mas yu alati lapanakni, va si kintalhajayan ixtapʼasta talaqalhin. 10Va chuncha najun taʼan tsʼoqkanta la ixchivinti Dios: Jantu kaʼalil matichun yu ox kun Dios, jantu matichun. 11Jantu matichun malaqasiy. Jantu matichun lakxkajuy ni Dios. 12Tachun ni lapanakni valiʼiy taʼoqspalatʼajun tus jantucha tuʼuchun ixtapalkʼan kataval. Jantu kaʼalil matichun yu makay yu lajʼox, jantu matichun. 13La ixkilkʼan va tacha putaknuncha lvaa kiluvil. La isimaʼatkʼan tamakanunun. Tacha yu laktuʼunun tsapulin, ixqaqxtaʼakʼan si ixvenenokʼan talakmaʼata. 14Ixkilkʼan qaqsun tajunita, va si laqxtoqnuʼ tachiviniy. 15Tatakyautʼajun vamuncha para katamaqninil. 16La ixtinkʼan talaqalhilhaʼan y tamakaulhaʼan jamaqaniti taʼan tapuʼan. 17Jantu aqtaun tamispay yu lakatin taʼan puʼan yu oxamaktaun putsuku. 18Jantu aqtaun tatalhauniy Dios. 19Kʼatsayau ni tachun yu lhinajun Dios la ixlhachimoʼon yucha laklhijuniy ni lapanakni yu tapaxtoqniy katamakal. Xlhiyucha tachun ni lapanakni lakamunukpaʼ maqskʼiniy saq katataulal tejkan Dios lakmukʼaniy ixlaqtaqalkʼan. 20Jantu matichun lay ox kaval kun Dios por kamakaputul yu lhinaunkan. Va por yu lhinaunkan pukʼatsayau ni alin kilaqtaqalkʼan. 21Chavaycha ni Dios masuy ni kintalaqtsʼinan tacha lajʼoxin lapanakni, pero jantu va por kamakau yu lhinaunkan. Vachu va chuncha yu la maqancha tatsʼoqlhi ixchivinti Dios, yuʼuncha ixtanajun chuncha katasuyaʼ. Chuncha ixtanajun ni lapanakni yu tatsʼoqlhi ixlhachimoʼon ali vachu yu ixtalaqputeʼey ixchivinti. 22Ni Dios jalaqtsʼin lapanakni tacha lajʼoxin kataval incha talhakapuʼan ni Jesucristo, mas va tachun yu talhakapuʼan. Va aqstanchunin, mas va taʼayucha kaval. 23Tachun ni lapanakni tamaqtaqalhinin, va tatsʼanqaniy ixʼoxixtu ni Dios. 24Pero Dios jalakmapayniy y jalaqtsʼin tacha lajʼoxin lapanakni. Yucha va por ixjamapayninti por yu makal ni Cristo Jesús yu jamalaqtaxtuy. 25Yucha ni Dios laksaklhi para kanil ex chuncha val tacha taun lapaxkan yu moqslakal. Ex chuncha jantucha kintalukujlaniyan ni Dios incha lhakapuʼanau ni katapulaqtaxtuyau ixjakʼalna ni Jesús. Chuncha makal ni Dios para katasul ni ayaj ox makay. Va ox maqantaulay, jantu kintamukʼanin maqanlqajnati por yu makataucha. 26Va chuncha makal para katasul ni ayaj ox makanan mas va chavaycha. Ex chuncha mispakan ni Dios ox makanan. Vachu mispakan ni Dios jalaqtsʼin tacha lajʼoxin lapanakni tachun yu talhakapuʼan ni Jesucristo. 27¿Chavay vananaj paxtoqniy para ay kakʼatsʼa? Jantu tsʼuniy. ¿Valiʼiycha? Jantu kalaqtaxtuyau por yu lhachimoʼon yu lhinajun suncha kʼamakʼatʼi, va por yu lhachimoʼon yu lhinajun kʼalhakʼapʼupʼi. 28Chavay kʼatsayau ni Dios jalaqtsʼin tacha lajʼoxin kataval ni lapanakni por talhakapuʼan, jantu por tamakay yu lhinaunkan laka lhachimoʼon. 29¿Lhilayatʼik ni Dios vamun ixDioskʼan ni israelitas? Jantu laqsaval kaval. Vachu va ixDioskʼan yu jantu israelitas kataval. 30Yu Dios va taun. Xlhiyucha jalaqtsʼin tacha lajʼoxin lapanakni tachun yu talhakapuʼan, mas va yu israelitas yu jaxvililichukʼupʼuxnikal y mas va yu alati lapanakni. 31Chuncha vamun maqskʼiniy kalhakʼapʼupʼi, pero jantu iknaunau ni jantucha xtapal ni lhachimoʼon. Iknaunau ni apalay xtapal.

will be added

X\