ROMANOS 2

1Xlhiyucha mas va taʼayucha kʼatʼi jantu paxtoqniyan kʼamukʼanin laqtaqal yu aqayntaun. Tejkan uxintʼi mukʼaniy laqtaqal yu aqayntaun ex vachu mukʼanikʼan mimaqanlqajnati. Vachu va chun makʼay laqtaqal ni uxintʼi. 2Kʼatsayau ni Dios ox makay tejkan lakmukʼaniy ixlaqtaqalkʼan ni lapanakni yu tamaqtaqalhinin. 3Chavay incha kʼalakmukʼanin laqtaqal yu alati pero yu uxintʼi vachu va chun makʼay, ¿lhakʼapʼupʼin ni jantu kamukʼaniyan laqtaqal ni Dios? 4Va tacha akchʼintʼamay yu ay ixjamapayninti ni Dios yu jantu tsʼalaj lukujlay, yu ayaj maqantaulay. ¿Jantu kʼatsʼay ni Dios mapayniyan para kʼamapʼaxa mijatapastakʼati? 5Pero uxintʼi pʼas makʼay melhanuti, jantu aqtaun mapʼaxapʼutʼun. Chuncha tʼaʼuncha lalhavanaʼ mimaqanlqajnati yu kaʼalinaʼ. Ni anchanuʼ julchan Dios kamasuyaʼ ni ox lakmukʼaniy laqtaqal ni lapanakni. 6Yucha kalaqxtaqniyaʼ ixlhilhajatkʼan qayntamin tacha tapaxtoqniy por yu tamakay. 7Yu tamakay yu lajʼoxi, yuʼuncha kalaqxtaqniyaʼ ni jatsukunti yu jantu aqtaun kamiʼoyaʼ. Yuʼuncha tapuxkajuy yu ox para kalaktoʼoyakal y katatsukul mas va tavanancha. 8Lati aqspuknin y jantu taqasmakputun yu laqsaval, vamun tamakaputun yu jantu ox. Dios kalaqtalqauniyaʼ y kalaqxtaqniyaʼ maqanlqajnati. 9Katalaqaʼiyaʼ maqanlqajnati kun maqaniti tachun yu tataylhaʼan makanan laqtaqal. Chuncha tapaxtoqniy yu israelitas pero vachu tapaxtoqniy yu alati lapanakni. 10Pero tachun yu tamakay yu lajʼox yuʼuncha katalaqaʼiyaʼ ni oxixtu yu xtaʼa ni Dios, kalaktoʼoyakanaʼ, oxamaktamin katajunaʼ. Va chuncha tapaxtoqniy ni israelitas pero vachu tapaxtoqniy yu alati lapanakni. 11Yu Dios va aqstanchunin japuxkaulaqtsʼin lapanakni. 12Yu jantu tamispay yu lhinajun Dios yu tsʼoqkanta, incha tamakay talaqalhin, yuʼuncha kataniyaʼ sin katamispal. Yu ox tamispay yu lhinajun Dios, incha tamakay talaqalhin yuʼuncha kalakmukʼanikanaʼ laqtaqal por jantu katamakal yu lhinaunkan. 13Yu vamun taqasmatʼa yu lhinaunkan, yuʼuncha ni Dios jantu jalaqaʼiy. Va jalaqaʼiy yu tamakay tacha lhinaunkan. 14Lati yu jantu israelitas kataval mas jantu tamispay yu lhinajun Dios yu tsʼoqkanta, tamakay yu lhinaunkan, va tacha tamispay yu lhinaunkan. 15Ex chuncha tamasuy ni va tacha tsʼoqkanta la ixjalhanutkʼan yu lhinaunkan. Vachu taʼukskʼatsay tisuncha yu ox ali tisuncha yu jantu ox kʼamakʼatʼi. Vachu la ixjatapastakʼatkʼan kalakmukʼanikanaʼ laqtaqal ixlaqʼamankʼan, vachuʼ kalaqʼaqanixtukanaʼ. 16Anchanu julchan ni Dios kalaqlaqtsʼintanuniyaʼ ixjatapastakʼatkʼan mas yu tamakay laqatamaqsaq. Chuncha najun yu lajʼox chivinti yu klaqputeʼey. 17Ka va uxintʼi naʼun va israelita kʼatʼi, lhilay kʼapʼulaqtʼaxtʼuyeʼecha por kʼamispʼatʼi ixlhachimoʼon Dios. Vachu ay makʼakʼan por naʼun ox mispʼay ni Dios. 18Vachu lhilay ni mispʼay yu lhinajun Dios. Vachu naʼun ni ixlhachimoʼon masuniʼoyan tisuncha yu apalay ox maqskʼiniy. 19Ayaj kʼatsʼancha, naʼun ni lay kʼalaklhitʼa yu jantu tamispay tacha laʼachʼixin kataval. Kʼatsʼancha tacha maklku yu maputunkujuy taʼan putsʼista. 20Makʼakʼan tacha kalakmalanitʼi yu jantu tuʼuchun tamispay, tacha kalakmamoʼotʼi yu tontoskaʼ. Lhitʼaʼun ixlhachimoʼon Dios, xlhiyucha lhilay kʼatsʼaʼoʼoy tachun y mispʼay yu laqsaval. 21Uxintʼi jamalaniniʼ kʼatsʼan. ¿Ex valiʼiycha jantu malanikʼan meʼeman? Chavay laqpʼutʼeʼey ni jantu kʼaʼalhavan. ¿Ex valiʼiycha alhavanan? 22Vachuʼ naʼun jantu kʼatʼatʼamatʼi qayntaun yu jantu minavin. ¿Ex valiʼiycha tʼatʼamay qayntaun yu jantu minavin? Lakxkʼaʼiy yu antivas. ¿Ex valiʼiycha jalakʼalhaumaxtʼunin yu taʼan tatoʼoyanan? 23Uxintʼi ay makʼakʼan por mispʼay yu lhinajun ni Dios pero jantu makʼay tacha lhinajun. Ex chuncha jantu tʼoʼoyay ni Dios. 24Xlhiyucha laqsaval yu tsʼoqkanta la ixchivinti Dios taʼan najun: Va milaqtaqalkʼan uxiknan ni taʼakchʼintamay ni Dios yu jantu tamispay. 25Chavay incha kʼamakʼaʼo tacha tsʼoqkal laka lhachimoʼon ex paxtoqniy kʼaxvililichʼukʼupʼuxnikʼa. Pero incha jantu kamakʼaʼo tacha lhinajun, ex jantu xtapal mas kʼaxvililichʼukʼupʼuxnikʼa. 26Xlhiyucha ni Dios ox jalaqtsʼin yu tamakay yu lhinajun, mas jantu israelitas kataval, mas jantu kalakxvililichukʼupʼuxnikal. 27Ex chuncha yu makay tacha lhinaunkan mas jantu kalakxvililichukʼupʼuxnikal, yuʼuncha katamukʼaniyan milaqtaqalkʼan yu israelitas untʼatʼik. Mas xvililichʼukʼupʼuxnikʼantʼatʼik, jantu alasmatʼatʼik yu lhinaunkan. 28Qayntaun lapanaki jantu lay kaval israelita vamun por kaxvililichukʼupʼuxnikal. Jantu maqskʼiniy kaxvililichukʼupʼuxnikal vamun la xaxtaʼa. 29Yu laqsaval israelita maqskʼiniy kaxvililichukʼupʼuxnikal yu jantu ox la ixjalhanuti. Chuncha makay ni Espíritu Santo, jantu chuncha makay ni chivinti yu tsʼoqkanta. Ex mas jantu ox talaqtsʼin yu alati lapanakni, pero yu Dios ox laqtsʼin.

will be added

X\