ROMANOS 16

1Kitʼin iknajun ni ox kalaʼaʼitʼik ni kintʼalapanakkʼan Febe. Yucha lakʼulakan kalaqʼaqtayjul yu talhakapuʼan laka putaulan Cencrea. 2Ox kalaʼaʼitʼik, yucha va ixlapanaki kiJalhachimoʼonukʼan. Kʼalaʼaʼitʼik tacha paxtoqniy ixlapanakni Dios. Kaʼaqtʼayʼutʼik mas va tisuncha kaval yu maqskʼiniy. Yucha lhuucha jalaqʼaqtayjuta y vachu kiʼaqtayjul ni kitʼin. 3Kalakmastʼakʼatʼik ni Priscila ali yu Aquila yu kintatʼatapatsayan la ixlhitapatsa ni Cristo Jesús. 4Yuʼuncha ixtamaqxtaqta ixjatsukuntikʼan por kitʼin. Xlhiyucha ikxtaʼa lhimalaqpuchuncha pero jantu vamun kitʼin. Vachu tachun ni lapanakni yu talhakapuʼan Dios yu jantu israelitas kataval, si taxtaʼa lhimalaqpuchuncha por yuʼuncha. 5Vachu kʼamastʼakʼatʼik ni lapanakni yu talhakapuʼan yu tataqxtoʼa la ixchaqakʼan. Kʼamastʼakʼatʼik kiʼamigo Epeneto yu ikpaxkay. Yucha pʼunaj lhakapuʼal ni Cristo xalakatʼun Akaya. 6Kʼamastʼakʼatʼik ni María yu ayaj tapatsal por uxiknan. 7Kʼamastʼakʼatʼik Andrónico ali Junias yu kintʼamachaqan yu ixkintatʼatanun laka pachʼin. Tachun ni lapanakni yu jamalaqachal ni Jesús tus ox lakmispay ixlaʼatʼuykʼan. Yuʼuncha pʼunaj talhakapuʼal ni Cristo ex astan kitʼin. 8Kʼamastʼakʼatʼik ni Amplias yu ikpaxkay tacha ixlapanaki ni Jalhachimoʼonuʼ. 9Kʼamastʼakʼatʼik ni Urbano yu kintatʼatapatsayan la ixlhitapatsa ni Cristo. Vachu kʼamastʼakʼatʼik Estakis yu ikpaxkay. 10Kʼamastʼakʼatʼik Apeles, mispakan ni ox lhakapuʼan ni Cristo. Kʼamastʼakʼatʼik ixlapanakni Aristóbulo. 11Kʼamastʼakʼatʼik Herodión yu kintʼamachaqaʼ. Kʼamastʼakʼatʼik ixlapanakni Narsiso yu talhakapuʼan ni kiJalhachimoʼonukʼan. 12Kʼamastʼakʼatʼik Trifena ali Trifosa yu tatapatsay kun kiJalhachimoʼonukʼan. Kʼamastʼakʼatʼik Pérsida yu ox paxkayau. Yucha va lhuu lhitapatsa makaniy kiJalhachimoʼonukʼan. 13Kʼamastʼakʼatʼik Rufo yu laksakta kiJalhachimoʼonukʼan y vachu ixnati yu va tacha kinati klaqtsʼin. 14Kʼamastʼakʼatʼik Asínkrito ali Flegonte ali Hermas ali Patrobas ali Hermes y tachun yu jatʼalaqaunin yu tavilanal kun yuʼuncha. 15Kʼamastʼakʼatʼik ni Filólogo ali Julia ali Nereo kun ixtʼalapanaki, ali Olimpas ali tachun ixlapanakni Dios yu tavilanal kun yuʼuncha. 16Kʼalamastʼakʼatʼik kun jamapayninti tacha paxtoqniy ixlapanakni Dios. Tachun ixlapanakni Dios yu aniy tavilanal tamastakʼaʼoyan. 17Ketʼalaqaunin, klatapayniniyau ni kʼamakʼatʼik kuenta ni lapanakni yu talaktʼilhiputunan, tamakay para kamakʼauntʼijlatʼik milhakapuʼatkʼan. Yuʼuncha jantu tamakay tacha yu lanitʼik uxiknan. Jantu chʼantaun kalaktʼaʼuntʼik. 18Yuʼuncha jantu tatapatsaniy ni Cristo kiJalhachimoʼonukʼan, vamun tatapatsay para ixlaqʼamankʼan. Kilkʼus tachiviniy y chuncha talakmakanuy ni lapanakni yu jantukaʼ ox tamalaqasiy. 19Tachun ni lapanakni takʼatsay ni ox lhakʼapʼupʼinatʼik, xlhiyucha klhiʼachantajuy por uxiknankʼan. Ox kʼamispʼatʼik makanan yu ox, jantu kʼalanitʼik yu jantu ox. 20Ni Dios yu oxamaktaun makanan, yucha niman kaʼakchʼintamayaʼ ni Satanás la minchʼajakʼan. Katamapaynin kiJalhachimoʼonukʼan Jesucristo. 21Tamastakʼayan ni Timoteo yu kintʼatapatsay, vachu Lucio ali Jasón ali Sosípater yu kintʼamachaqan. 22Kitʼin Tercio yu iktʼajun tsʼoqmulan ixchivinti Pablo vachu klamastakʼayau tacha ixlapanaki kiJalhachimoʼonukʼan. 23Tamastakʼayan ni Gayo. Kitʼin kPablo kvil la ixchaqaʼ. Vachu tamastakʼayan tachun ixlapanakni Dios yu tataqxtoʼa la ixchaqaʼ. Vachu tamastakʼayan Erasto yu maʼay xatumin laka putaulan. Vachu tamastakʼayan ni Kuarto yu kintʼalaqajunkʼan. 24Katamapaynin ni kiJalhachimoʼonukʼan Jesucristo. 25¡Ay kamakakal ni Dios! Yucha lay tamapʼasniyan para ox kʼalhakʼapʼupʼintʼik ni ox chivinti yu klaqputeʼey yu lhichiviniy ni Jesucristo. Ni anchanuʼ chivinti mas jantu ixmispakan tejkan aqtaynil ni lakamunukpaʼ 26va tus chavaykaʼ ni Dios masuy. Va masukan la ixjatsʼoqnutkʼan ni lapanakni yu maqancha ixtalaqputeʼey ixchivinti. Ni Dios yu alin mas va tavanancha, yucha lhinaul va chuncha katamispal tachun ni lapanakni lakamunukpaʼ para lay kataqalasmaklhi y katalhakapuʼal. 27Va taun ni Dios y vamun yuʼ lhitʼajun jatapastakʼati. Va yucha ay kamakakal mas va tavanancha kaval por yu makal ni Jesucristo. Va chuncha kavalcha.

will be added

X\