ROMANOS 13

1Tachun ni lapanakni maqskʼiniy katatoʼoyal yu jalhachimoʼonun. Tachun yu talhachimoʼonun, va Dios jalakʼulal. 2Chuncha yu jantu talhiʼajin ni jalhachimoʼonun, yuʼuncha jantu talhiʼajin yu lakʼulal ni Dios. Va ixlaqʼamankʼan lakmukʼanikan ixmaqanlqajnatkʼan. 3Ni lapanakni yu ox tamakay jantu maqskʼiniy katatalhaunil ni jalhachimoʼonun, yu maqskʼiniy katatalhaunil va yu jantu ox tamakay. Incha tʼaulpʼutʼun para jantu katʼalhaunin ni jalhachimoʼonun ex kʼamakʼatʼi yu ox. Ex chuncha yu jalhachimoʼonun ox katalaqtsʼinan. 4Yuʼuncha va Dios tatapatsaniy para ox kaxajchal la metsukunti. Pero incha jantu ox makʼay ex maqskʼiniy katʼalhaunin. Jantu valiʼiy kaval yu ixtapʼasta yu lay katapumukʼanin mimaqanlqajnati. Va Dios tatapatsaniy para katamaqalchaul kun maqanlqajnati yu jantu ox tamakay. 5Xlhiyucha maqskʼiniy katʼoʼoyatʼik ni jalhachimoʼonun, jantu vamun por yu maqanlqajnati yu lay katamukʼanin. Vachu por mispʼayatʼik yu ox ali yu jantu ox. 6Va xlhiyucha jamapʼalananatʼik tejkan taskʼin yu jalhachimoʼonun. Yuʼuncha tatapatsay tacha ixʼoqxtamatin ni Dios tejkan chuncha tamakay. 7Kʼamapʼalniʼotʼik yu jalhipʼiniyatʼik. Incha tsʼanqay kʼamapʼalnitʼik ni jalhachimoʼonun ex kʼamapʼalnitʼik. Incha tsʼanqay kʼamapʼaltʼik miʼimpuestoskʼan, ex kʼamapʼaltʼik. Incha tsʼanqay katʼoʼoyatʼik matichun, ex katʼoʼoyatʼik. Incha tsʼanqay kʼalhiʼayntʼik matichun, ex kʼalhiʼayntʼik. 8Jantu kʼalhipʼininintʼik kun matichun, kʼalalhipʼinitʼik vamun japaxkanti. Yu japaxkanan yucha makaʼojoy ixlhachimoʼon ni Dios. 9Taʼan tsʼoqkanta la ixlhachimoʼon Dios najun: “Jantu kʼatʼatʼamatʼi aqayntaun yu jantu minavin kaval. Jantu kʼamaqnin. Jantu kaʼalhavan. Jantu kʼamanunin jalaklkanti matichun. Jantu kʼaʼakchʼipʼi.” Tachun yu anchanu chivinti va aqstanchun tacha yu inchineʼ tsʼoqkanta: “Kʼapʼaxkʼatʼi mintʼamachaqaʼ vachu va tacha pʼaxkʼakʼan meʼeman.” 10Yu japaxkanan jantu makaniy tuʼuchun yu jantu ox yu aqayntaun. Chuncha yu japaxkanan makaʼojoy yu lhinajun Dios. 11Tejkan chuncha makʼayatʼik, kʼamakʼatʼik kuenta yu chavay tapasay. Va lakachilcha ni julchan para kakujvicha, jantucha maqskʼiniy kaltatau. Tejkan pʼunaj lhakapuʼau tus chavaycha apalay ukstsʼuniy lakaminta ni julchan tejkan kapulaqtaxtuyau. 12Va laycha katapasaʼol ni japutsʼisniʼ, va taʼukstsʼuniycha ni anchanu julchan. Xlhiyucha maqskʼiniy kamakauntijlaʼojoo xalhitapatsa ni japutsʼisniʼ, kalhilakatayau xaputsuku ni jatunkunaʼ. 13Ox katijuntayau tacha maqskʼiniy laka jatunkunaʼ. Jantu maqskʼiniy kataʼapʼau laka kʼatan, jantu katʼatamau aqayntaun yu jantu kinavinkʼan kaval, jantu kamakau laqxtoqnuʼ. Jantu maqskʼiniy kalalukujlaniu y jantu kalaʼakchaʼaniu. 14Maqskʼiniy katiʼukxuntayau tacha kiJalhachimoʼonukʼan Jesucristo. Jantucha maqskʼiniy kamakau tacha yu tamakaputun yu valiʼiy lapanakni.

will be added

X\