APOCALIPSIS 9

1Taval yu pumakisiniʼ ixmayul Dios sunul isqol. Ex klaqtsʼil laqataun jastʼaku patajul laktʼiyan, tamachal tus lakatʼun. Ex maqxtaqnikal yu pumalaqltiʼakan ni pachʼin yu la pulman. 2Tejkan malaqltiʼalcha ex ancha pataxtul lhuu jin tus tacha xajin laqataun ay horno. Ni anchanuʼ jin tus maputsʼisiʼol taʼakchun taʼan ixmapulkuy ni julchan. 3La ixpulakna ni anchanuʼ jin taxajchil lhuu silaqa. Ex aqtaylcha taltilinin taʼakchun lakatʼun. Jalaqxtaqnikal ixtapʼastakʼan tacha ixtapʼastakʼan ni statsukun lakamunukpaʼ. 4Jalakjunkal para jantu katalhimaqchapul ni javan yu alin lakatʼun, nisin qaltaun yu xtakʼau nisin yu jakʼivinan. Jalhijunkal katalhimaqchapul vamun lapanakni yu jantu katalhitsukul iseyo ni Dios la ixmuntsankʼan. 5Pero jantu kalaqxtaqnikal lakatin para katamaqnil lapanakni. Vamun para kamamaqanlqajnivakal kun lhuu ixkayaxtu tus laqakis malkuyuʼ. Yu ixkayaxtu va aqstanchun tacha tejkan kachajun statsuku. 6Exnicha anchanu julchan ni lapanakni kataniputunaʼ pero jantu lay kataniyaʼ. 7Ni anchanu silaqa ixtatasuy tacha jukin yu listujcha para kataʼal laka lhilukuj. La ixʼaqtsulkʼan ixtalhaʼanta laqatamin tuʼuchun tacha korona yu jamakanti kun oro. Ixʼukxpukʼan va tacha lapanakni. 8Ixʼaykʼan ixtasuy tacha ixʼaji xanati. Ixtatsalatkʼan va tacha ixtatsalati león. 9Ixlaqchʼitkʼan yu ixtaʼulata la ixtankilaknakʼan ixtasuy tacha apuro tsasnati. Ixpaqachuj ixpakatʼajun tacha tejkan lhuu jukin katalaqxaqamalhaʼal carros laka lhilukuj. 10Vachuʼ ixtalhitʼajun ixtiʼistajkʼan tacha ixtiʼistaj statsuku. Va ox laqʼaqatantsupipi para kalaqmamaqanlqajnival ni lapanakni tus laqakis malkuyuʼ. 11Ixʼalin ixʼukxtinkʼan yu laklhichimoʼoy. Yucha va qayntaun ixmayul Dios yu lhistakʼa taʼan la pulman pachʼin. Ni anchanu ukxtin laka lhihebreo junkan Abadón, laka lhigriego junkan Apolión, naunputun yu Jalaktʼilhinin. 12Ex tapasatacha yu pʼunaj maqanlqajnati, pero vananaj tsʼanqay alaʼatʼuy. 13Taval ni pumachaxanaʼ ixmayul Dios sunul isqol. Ex ijqasmaklhi laqataun chivinti makatʼaul taʼan alin yu maʼatʼati aqaloqoti ni laka altar taʼan vil Dios. 14Va jaxaqalakal yu pumachaxanaʼ ixmayul Dios yu ixchʼapata ni sqol, va junkal: —Kʼalaqxʼoqtʼicha yu pumatʼati mayulnin yu tavilanal tachʼinin yu ay laʼaxkan yu junkan Eufrates. 15Ex jalaqxʼoqlhicha ni pumatʼati mayulnin. Yuʼuncha oxicha listuj ixtavilanal vamun para exnicha, ni anchanuʼ julchan ali anchanuʼ malkuyuʼ ali anchanuʼ jachʼitin. Va ixlakʼulata para katamaqniʼol tampataun yu pumaʼatʼutu lapanakni yu alin lakamunukpaʼ. 16Kitʼin ijqasmaklhi ixtalhavaxtu ixtropas ali jukin tus doscientos miyones ixtajunita. 17Chuncha klaqtsʼil ni jukin yu ixtapujukʼanal. Ixtalhaʼanta laqatamin tsasnati la ixtankilaknakʼan. Va xlapul tus tacha jikmi, vachuʼ azul ali xqavau. Ixʼaqtsulkʼan ni jukin ixtasuy tacha ixʼaqtsul león. La ixkilnakʼan ixtaxtuy jikmi ali jin, vachuʼ azufre. 18Tampataun yu pumaʼatʼutu lapanakni yu alin lakamunukpaʼ tus taniʼol. Yu jalaqmaqnil va yu ixtakiltaxtuy ni jukin, va jikmi ali yu jin ali yu azufre. 19Ixtapʼastakʼan ni jukin ixtalhitʼajun la ixkilnakʼan vachuʼ la ixtiʼistajkʼan. Yu ixtiʼistajkʼan ixtasuy tacha maqataun tsapul, yu lhitʼajun ixʼaqtsul. Va yucha lay ixtapamaqninin. 20Ni lapanakni yu jantu katanil, yuʼuncha jantu katamakauntijlal ixtoʼoyaka ni aqmoqxnuʼ, jantu katamakauntijlal ixdioskʼan yu jantu laqsaval. Yucha jamakanti kun oro ali plata ali bronce ali chiyux ali kʼiu. Jantu lay jalakavanan, jantu lay jaqasmaknan, jantu lay jaltanan. 21Jantu katamakauntijlal jamaqninti, vachuʼ jantu katamakauntijlal jachavanti. Vachuʼ tataylhaʼal tʼatamanan lapanakni yu jantu ixnavinkʼan kaval. Vachuʼ tataylhaʼal jaʼalhavanti.

will be added

X\