1 Ex va chuncha klaqtsʼil ixtayanal pumatʼati ixmayulnin Dios, paʼextamin la ixpiktunuxnan lakamunukpaʼ. Ixtatanchanita yu laʼatʼati un yu alin lakatʼun para jantu kaʼunilal lakatʼun nisin lakxkan nisin laka kʼiu. 2 Vachuʼ klaqtsʼil aqayntaun ixmayul Dios. Ixmintachal taʼan puxajachil julchan. Ixchʼapalhiminta iseyo ni Dios yu kujta. Ex ayaj pʼays jalaqxaqalal yu pumatʼati ixmayulnin Dios yu jalaqxtaqnikal lakatin katalhimaqchapul ni lakatʼun ali lakxkan. Va naul: 3 —Jantu kʼalhimaqchʼapʼu ni lakatʼun ali laka mar ali yu kʼivin. Pʼunaj maqskʼiniy kalakmukʼaniu laqatamin seyo la ixmuntsankʼan ni lapanakni yu tatapatsaniy Dios. 4 Ex astan ijqasmaklhi tas pumachuxicha ixtajunita yu jalakmukʼanikal seyo. Ixjunita va ciento cuarenta y cuatro mil por tachun yu oqxlaqkautʼuy ni israelitas. 5 Kautʼuy mil seyado jalakmakakal ixlapanakni Judá, vachuʼ kautʼuy mil seyado jalakmakakal ixlapanakni Rubén, vachuʼ kautʼuy mil seyado jalakmakakal ixlapanakni Gad. 6 Vachuʼ kautʼuy mil seyado jalakmakakal ixlapanakni Aser, vachuʼ kautʼuy mil seyado jalakmakakal ixlapanakni Neftalí, vachuʼ kautʼuy mil seyado jalakmakakal ixlapanakni Manasés. 7 Vachuʼ kautʼuy mil seyado jalakmakakal ixlapanakni Simeón, vachu kautʼuy mil seyado jalakmakakal ixlapanakni Leví, vachuʼ kautʼuy mil seyado jalakmakakal ixlapanakni Isakar. 8 Vachuʼ kautʼuy mil seyado jalakmakakal ixlapanakni Zabulón, vachuʼ kautʼuy mil seyado jalakmakakal ixlapanakni José, vachuʼ kautʼuy mil seyado jalakmakakal ixlapanakni Benjamín. 9 Taval tejkan chuncha tapasaʼol ex klaqtsʼil alati lapanakni tus jantu matichun lay kaputeʼel por ixtalhavaxtu. Ixʼalinʼojoy yu machaqan tachun putaulanaxna, taʼoqxlaqchux lapanakni yu alin lakamunukpaʼ, ixtachiviniy puchux lhichivin. Ixtayanal taʼan jalhachimoʼonunkan y taʼan ixyal ni Sasʼatʼa borrego. Tachun ixtalhilakayanal xnapapa laqchʼiti y si ixtachʼapalhaʼanta chʼapʼa. 10 Tachun va pʼays ixtachiviniy, ixtanajun: Ni Dios yu vil taʼan jalhachimoʼonunkan vachuʼ yu Sasʼatʼa borrego, yuʼuncha kintamalaqtaxtutancha. 11 Tachun ni ixmayulnin Dios ixtayanal tantilaqachoqo taʼan jalhachimoʼonunkan. Vachu ancha ixtayanal ni xapaynin ali yu laʼatʼati talhitsukuti yu takujta. Tataʼaqtsoqoqtal tus tatalakaputatamal lakatʼun, tatoʼoyal ni Dios, 12 va tanaul: Vamun ni Dios ox kalhichivinkal y ay kamakakal. Yucha lhitʼajun tachun jatapastakʼati, va yucha kaxtaqnikal lhimalaqpuchuncha. Va katoʼoyakal por ixtapʼasta yu xoqta pulay makay. Yucha kiDioskʼan mas va tavanancha, jantu aqtaun katamaktalcha, va chuncha kavalcha. 13 Ex xaqayntaun yu pʼuxauntʼati xapaynin kilhisakmil, va kijunil: —¿Matiʼincha ni aniy lapanakni yu talhilakayanal laqxnapapa laqchʼiti? ¿Tas ancha taminchal? 14 Kitʼin kunil: —Uxintʼi kʼatsʼay, kitʼin jantu ijkʼatsay. Ex yucha kijunil: —Tachun yuʼuncha va si yu talaqtaxtul taʼan alil lhuu maqanlqajnati. Va yu tachaʼatacha ixlaqchʼitkʼan y laqxnapapan tamakal kun ixjakʼalna ni Sasʼatʼa borrego. 15 Xlhiyucha tavilanal taʼan jalhachimoʼonun ni Dios y tatapatsaniy la ixchaqaʼ taʼan toʼoyakan. Ancha tavilanal mas kaval tsʼis mas kaval tunkuj. Dios yu vil taʼan jalhachimoʼonunkan yucha kalaktʼataulaʼ y kalaklhistakʼaʼ. 16 Yuʼuncha jantucha aqtaun katachʼapayaʼ chavan y jantucha katapukikxixaʼ. Jantucha katamichiyaʼ julchan y jantucha lakajnaʼ katalhilayaʼ. 17 Ni Sasʼatʼa borrego yu vil la ixlakaʼukxpuʼ taʼan jalhachimoʼonunkan yucha kalaklhistakʼaʼ. Va kalaklhaanaʼ maʼotʼunuʼ xkan yu xtaʼa jatsukunti. Dios kalaklakpuxakayaʼ tachun ixlaqpuqalhutkʼan.
