APOCALIPSIS 4

1Astan, ex klaqtsʼil aqataun puerta laktʼiyan, ixlaqltiʼay. Ijqasmakchoqol ixchivinti yu pʼunaj ixkixaqalatacha, makatʼaul tus tacha maqataun sqol, kijunil: —Kapʼatʼaxtʼucha aniy talman. Kitʼin kakmasuniyan tachun yu katapasayaʼ astan. 2Ex kitʼin nimancha kilaqachʼapal la ixtapʼasta ni Espíritu. Ex klaqtsʼil taʼan jalhachimoʼonunkan ancha laktʼiyan, ancha ixvil qayntaun lapanaki. 3Ni lapanaki yu ancha ixvil ixtasuy tacha kʼus chiyux yu junkan jaspe ali yu junkan kornalina. Ni anchanuʼ taʼan jalhachimoʼonunkan tantilaqachoqo ixʼalin taun xkulumakchati, ixtasuy tacha kʼus chiyux yu junkan esmeralda. 4Vachuʼ ixʼalin laqapʼuxauntʼati putaulan tantilaqachoqo ni laka palhachimoʼon. Kitʼin klaqtsʼil si ixtavilanal qayntamin xapaynin, qaynpʼuxauntʼati ixtajunita. Ixtaʼulata laqxnapapa laqchʼiti kun laqatamin korona la ixʼaqtsulkʼan yu si oro ixjunita. 5Taʼan taulay ni Jalhachimoʼonu ancha ixchivinkan y vachuʼ ixmakatʼajun jamaxkan y vachuʼ ixtasuy makaliukniti. Vachuʼ la ixlakaʼukxpuʼ taʼan jalhachimoʼonunkan ancha ixʼalin laqatujun maklku yu si jikmi ixjunita. Yucha va yu laqatujun ixʼespíritus ni Dios. 6Vachuʼ la ixlakaʼukxpuʼ taʼan jalhachimoʼonunkan ixtasuy xkan tacha ay lakamar, ixpatasuy jalakavanti tus tacha spejo. Vachuʼ taʼan jalhachimoʼonunkan ixtantilaqachoqo ixʼalin laʼatʼati talhitsukuti yu takujta. Tus ixtalaqaʼaqtsamanta laqchul, la ixʼukxpulakapukʼan ali ixpulakankʼan. 7Yu pʼunaj talhitsukuti ixtasuy tacha laqataun león y yu alaqataun ixtasuy tacha laqataun vakax. Yu ataun ixtasuy tacha qayntaun lapanaki y yu xaʼastan ixtasuy tacha laqataun atsʼoʼo ixjaltilinijʼanta. 8Ni anu laʼatʼati talhitsukuti yu takujta, si ixtalhitʼajun laqachaxan paqachuj la ixmakankʼan y talakachux ixlakatunajkʼan va ixtalaqaʼaqtsamanta laqchul. Yuʼuncha mas tunkuj ali tsʼis jantu ixtamamaktay ixchivintikʼan yu inchineʼ najun: Lhitʼaunʼojoy yu lajʼoxi, yu lajʼoxi, yu lajʼoxi ni kiJalhachimoʼonukʼan Dios yu lhitʼaunʼojoy tapʼasta. Va yucha yu ixtʼajun pʼunaj, yu tʼajun chavaycha, yu kaminchoqoyaʼ astan. 9Chuncha ni anu pumatʼati yu tacha laʼatʼati talhitsukuti yu takujta va tatoʼoyay y ay tamakay ni Dios yu vil taʼan jalhachimoʼonun. Vachuʼ taxtaqniy lhimalaqpuchuncha yu tʼajun mas va tavanancha kaval, yu jantu aqtaun katamaktal. 10Tejkan chuncha tamakay ex yu qaynpʼuxauntʼati xapaynin tatatsoqoqtaniy ni Dios yu vil taʼan jalhachimoʼonun. Va tatoʼoyay ni yucha yu tʼajun mas va tavanancha, tamamay ixkoronajkʼan taʼan vil, tanajun yu inchineʼ: 11Uxintʼi kiJalhachimoʼonukʼan unitʼa, vachuʼ kiDioskʼan unitʼa. Uxintʼi paxtoqniyan ay kʼamakʼakʼa, va katʼoʼoyakʼa, va uxintʼi lhitʼaʼunʼoʼoy yu tapʼasta. Va uxintʼi yu makʼaʼo tachun yu alin. Tachun axtoqnuʼ yu alin chavaycha, va uxintʼi la miʼachati lakmakʼatʼi.

will be added

X\