APOCALIPSIS 20

1Astan klaqtsʼil ni ixtaʼeltajuminta qayntaun ixmayul Dios laktʼiyan. Ixchʼapalhiminta ixpumalaqltiʼakan yu xajapuʼan yu la pulman. Vachuʼ ixchʼapata maqataun maqaʼay kadena. 2Ex niman chʼapachal ni ay tsapul yu maqancha tʼajun, junkan Diablo vachu junkan Satanás. Ox chʼiʼulal kun ixkadena para ancha kataulal tus taun mil jachʼitin. 3Ixmayul Dios tanqalhumul ni tsapul la xajapuʼan. Ancha ox malaqachʼinul, vachuʼ ltʼaunikal para jantucha apalay kamakanul tachun ni lapanakni tus kataqayntsal taun mil jachʼitin. Astan kataxtuchoqoyaʼ para katijuntayal pero jantu maqan. 4Vachuʼ klaqtsʼil taʼan tataulay pumalhuu jalhachimoʼonun. Yu ancha tataulal si jalaqxtaqnikal palhachimoʼon para katamukʼal laqtaqal. Vachuʼ klaqtsʼil ni lapanakni yu japixtuchaqxpʼuxkal por ixtalaqputeʼey ixchivinti Dios yu lhichiviniy Jesucristo. Yuʼuncha jantu katatoʼoyal ni maqtaliʼ ali ixʼantivaj. Vachu jantu kalaqxtaqkal kalakmukʼanikal ixtaqaʼuti la ixmuntsankʼan ali la ixmakakʼan. Klaqtsʼil ni yuʼuncha takujchoqol mas ixtanitacha. Ex talhachimoʼonul chʼantaun kun Jesucristo taun mil jachʼitin. 5Yuʼuncha va yu pʼunaj takujchoqol laka lhinin. Yu alati yu vananaj tatamakaul, yuʼuncha katakujchoqoyaʼ tus tejkan kataqayntsayaʼ taun mil jachʼitin. 6Ayaj katalhiʼachantajuyaʼ ni lapanakni yu pʼunaj tapaxtoqnil katakujchoqol, va ixlapanakni Dios tajunita. Yuʼuncha jantucha katapaxtoqniyaʼ yu ataun lhinin, va katajunaʼ ixkuras Dios ali Jesucristo. Katatʼalhachimoʼonunaʼ Jesucristo taun mil jachʼitin. 7Tejkan kataqayntsayacha taun mil jachʼitin ex ni Satanás kamaxtuchoqokanacha taʼan vil laka pachʼin. 8Katataxtuyaʼ y kalakmakanuyaʼ ni lapanakni tus taʼakapuchun lakamunukpaʼ. Kalakmakanuyaʼ xalakatʼun Gog ali Magog, kamaqxtoqyaʼ ixtropaskʼan para katamakal lhilukuj. Yuʼuncha va pumalhuu, tacha xakukuj lakamar yu jantu lay puteʼekan. 9Ex chuncha taʼalcha tus taʼakapuchun ni lakamunukpaʼ, tamalaqachoqoxnul ni putaulan yu Dios achaniy, taʼan ixtavilanal ixlapanakni Dios. Pero ni Dios jamaʼeltajunil jikmi laktʼiyan, ex jalaqxavaʼol. 10Ni aqmoqxnuʼ yu jalakmakanul ni lapanakni tanqalhupʼukal laka jikmi taʼan maqtayvil kun azufre, vachuʼ an taʼan tanqalhupʼukal ni maqtaliʼ ali ni lapanaki yu jantu vas kalaqputeʼel ixchivinti Dios. Ancha katatsukuyaʼ maqanlqajnan tsʼis ali tunkuj, jantu aqtaun katamaktayaʼ. 11Ex astan klaqtsʼil laqataun ay siya, ox xnapapa ixjunita, taʼan taulay yu ay Jalhachimoʼonuʼ. La ixlakaʼukxpuʼ yu ancha ixvil tus taqoslhi ni laktʼiyan ali lakamunukpaʼ y jantucha aqtaun kalaqtsʼinchoqokal. 12Ex klaqtsʼil ancha ixtayanal ni lapanakni yu ixtanitacha, yu lajʼay ali lakstʼuniy la ixlakaʼukxpuʼ ni Dios. Ex japuxʼoqkalcha libros. Ni anchanuʼ janinin jalakmakanikal kuenta ixlaqtaqalkʼan tacha tsʼoqʼulakanta yu tamakatacha. Vachuʼ tapuxʼoqlhi ataun libro, yucha va taʼan jatsʼoqʼulakanta ixtaqaʼutkʼan tachun ni lapanakni yu talhitʼajun jatsukunti. 13Ni lakamar jamaqxtaqʼol tachun janinin yu ancha tanil, vachu ni putaknun taʼan ixtaʼaknunun, vachu yu laqnin. Ex tachun si jalakmakanikal kuenta qayntamin tacha ixtamakatacha. 14Astan yu laqnin ali ni putaknun taʼan tavilanal janinin, yuʼuncha jalaqnaqpʼukal taʼan pʼays maqtayvil jikmi. Ancha, taʼan maqtayvil jikmi, yucha naunputun va aqtʼuy taniy. 15Vachu ancha jalaqtanqalhupʼukal ni lapanakni yu jantu katemanikal ixtaqaʼutkʼan ni laka libro taʼan jatsʼoqkanta ixtaqaʼutkʼan yu talhitʼajun jatsukunti.

will be added

X\