APOCALIPSIS 14

1Ex klakavanal, va klaqtsʼil ni Sasʼatʼa borrego ixyal laka aspajun yu junkan Sión. Ancha ixlaktʼayal 144,000 lapanakni. La ixmuntsankʼan ixtalhitʼajun ixtaqaʼuti ni Sasʼatʼa borrego ali ixtaqaʼuti ixPay. 2Astan ijqasmaklhi ni pʼays ixmakatʼajun taun tuʼuchun laktʼiyan tacha kamil maqataun laʼaxkan, tacha makaliukniti ali laktʼasati ixmakatʼajun. Yu ijqasmaklhi va tacha lhuu arpas yu tasay lapanakni. 3Ixtamilpay titaun saystʼi milpati taʼan vil ni Jalhachimoʼonu Dios. Ixtamilpay la ixlakaʼukxpukʼan yu laʼatʼati talhitsukuti yu takujta ali yu pʼuxauntʼati ay lapanakni. Jantu matichun lay ixlaniy ni milpati, vamun yu 144,000 lapanakni yu jamalaqtaxtukal lakamunukpaʼ. 4Yuʼuncha va yu jantu katamakal laqtaqal kun xanatin, ox jalaklhistakkal la ixjatsukuntikʼan. Tatʼaʼan ni Sasʼatʼa borrego mas va toʼoxtaycha puʼan. Va chʼantaun ixtajunita kun xalapanakni aniy lakamunukpaʼ pero jamalaqtaxtukal para kataval tacha taun ox lapaxkan yu jamoqslanikan ni Dios ali yu Sasʼatʼa borrego. 5La ixkilnakʼan jantu aqtaun katakiltaxtul jalaklkanti. Jantu katalhitsukul tuʼuchun laqtaqal. 6Astan klaqtsʼil apumataun ixmayul Dios, ixjaltilinijʼanta la ixtanʼajna laktʼiyan. Ixlhaʼanta yu laqsastʼi chivinti yu la ox yu jantu miʼojoy. Va para kalaqputeʼenil tachun ni lapanakni yu tavilanal lakamunukpaʼ, mas va toʼoxtaycha palhachimoʼon, mas va tisuncha lhichivin yu tachiviniy, taʼoqxlaqchux lapanakni. 7Pʼays ixchiviniy, va najun: —¡Katʼoʼoyatʼik ni Dios kun talhanti! ¡Chavay va laqchaʼalcha julchan para kamukʼanil laqtaqal ni lapanakni yu tapaxtoqniy! ¡Katʼoʼoyatʼik, va yucha makal laktʼiyan ali lakatʼun ali lakamar ali laqxqatij! 8Astan chinchaʼal aqayntaun ixmayul Dios, va najun: —¡Chavay taqtalcha, va taqtalcha, talaqalhiʼolcha ni ay putaulan Babilonia! Va jamamaqtaqalhinil taʼoqxlaqchux lapanakni lakamunukpaʼ. Va tacha kalakmalanil jaʼoqnuti kun ixlhiʼotʼati. 9Astan vachuʼ chinchal aqayntaun ixmayul Dios, yu pumatʼutunuʼ, pʼays ixchiviniy, va najun: —Jantu ox yu katatoʼoyayaʼ ni maqtaliʼ ali ixʼantivaj yu ixtʼatasun. Vachuʼ jantu ox yu katalaqaʼiyaʼ ixjatsʼoqnuti la ixmuntsan u la ixmakaʼ. 10Yuʼuncha katalaqaʼiyaʼ ixlhilukuj Dios. Va tacha kataʼoqyaʼ pʼays maqanlqajnati yu jalaʼoxinti laka vaso. Katamaqanlqajnanaʼ laka azufre, va pʼays maqtajita la ixtalakavantikʼan ixmayulnin ni Dios ali yu Sasʼatʼa borrego. 11Xajin ni lapanakni yu katalaqaʼiyaʼ jamaqanlqajnati katantʼaqstʼayaʼ talman mas va tavanancha y jantu aqtaun katamaqtayaʼ. Yuʼuncha jantu katastaknanaʼ mas tsʼis, mas tunkuj. Va por tatoʼoyal ni maqtaliʼ ali ixʼantivaj y talaqaʼil xajatsʼoqnuti ixtaqaʼuti la ixlakatunajkʼan. 12Xlhiyucha maqskʼiniy katamaqantʼaqnil ixlapanakni Dios, yu tamakay yu lhinajun, yu ox tataylhaʼan kun Jesucristo. 13Ex ijqasmaklhi chivinti yu minchal laktʼiyan, va kijunil: —Katsʼoqʼulatʼi ni aniy chivinti: “Chavay katalhiʼachantajuyaʼ tachun yu taniy incha chʼantaun tajunita kun ni Jalhachimoʼonu Jesús.” Najun ni Espíritu yuʼuncha katastaknanacha, jantucha katatapatsayaʼ. Ox lhitapatsa tamakal aniy lakamunukpaʼ, xlhiyucha ancha katalaqaʼiyaʼ yu lajʼox. 14Ex klakavanal y klaqtsʼil taputsʼi yu ox xutʼutʼu. La ixʼukxna ni laka taputsʼi ancha ixvil qayntaun yu ixtasuy tacha Sasʼatʼa Lapanaki. La ixʼaqtsul ixlhaʼanta laqataun korona si oro. Ixchʼapalhaʼanta aqxtaun chitaj yu ox kikxtuy. 15Ex chuncha la ixchaqaʼ ni Dios takyautaxtul aqayntaun ixmayul Dios. Pʼays ixmatʼasay, junil yu ixvil laka taputsʼi: —¡Kʼamapʼatsʼatʼi ni minchitaj, kʼaxʼaʼitʼicha yu jaxqanti. Laqchaʼalcha julchan para kʼamaʼatʼi, oxicha katʼata! 16Chuncha yu ixvil la ixʼukxna laka taputsʼi matajul ixchitaj lakatʼun. Ex taʼakapuchun ni lakamunukpaʼ jaxqananʼokalcha. 17Ex taxtul aqayntaun ixmayul Dios ni anchanu chaqaʼ laktʼiyan. Vachu ixlhaʼanta aqxtaun chitaj yu ox kikxtuy. 18Vachu taxtul aqayntaun ixmayul Dios ni laka altar. Yucha ixlhichimoʼoy ni jikmi. Pʼays pukiltʼasanil, junil ni mayul yu ixlhaʼanta chitaj, va naul: —¡Kʼalaqchʼaqxpʼuxnincha ixlaqapʼu ni uva yu alin lakamunukpaʼ! Oxicha katʼata xaʼunikan. 19Ex ni mayul matajul ixchitaj lakatʼun, va pʼuxʼolcha ni uva. Va lakataun mujul xaʼunikan taʼan xapachʼikni uva. Ancha tus ox pʼal ixvil ixlhilukuj ni Dios. 20Ni uva laqpichʼaqxkal ixlhimaqspaʼ taʼan ay putaulan. La xapachʼikni tixajchal maqataun maqaʼay laʼaxkan si jakʼalnan. Jaltanal tus 300 kilometros ixpuʼayaxtu ixjunita, ixtalmanixtu tacha ixqaltsʼan laqataun juki.

will be added

X\