APOCALIPSIS 12

1Ex ni laktʼiyan tasul taun tuʼuchun yu jantu aqtaun katasul. Va qayntaun xanati yu ixlhilakayal julchan. Yu malkuyuʼ ixjukʼal la ixqaltaʼapuʼ ixchʼajaʼ. Laqakautʼuy jastʼakun ixtajukʼanal la ixʼaqtsul. 2Ni anu xanati jaʼaynaʼ ixjunita, va ayaj pʼays ixtʼasay, va ixmaqanlqajnan por ixpaqputunta. 3Vachuʼ ni laktʼiyan tasul aputaun ay tuʼuchun, yu tacha ay tsapul ixtasuy. Va la xlapul y va laqatujun ixʼaqtsul kun laqatamin korona ali maqakau ixʼaqaloqoti. 4La ixtiʼistaj va puxaqamalhaʼal lhuu jastʼakun, tampataun yu pumaʼatʼutu xaqamalhaʼal, ex laqtanqalhumal lakatʼun. Ni anchanu ay tsapul aqatayal ukstsʼuniy ni xanati para niman kaʼunil sasʼatʼa tejkan kalhitsukuyaʼ. 5Taval ni anchanu xanati lhitsukulcha sasʼatʼa, va tsʼal. Va yucha yu kalhachimoʼonunaʼ taʼakapuchun lakamunukpaʼ kun lhuu tapʼasta la ixmakaʼ. Ni anchanu sʼatʼa niman lhaankal taʼan vilchal Dios tus taʼan jalhachimoʼonun. 6Ex ni xanati nimancha jaqosnul, alcha lakatʼun taʼan jantu matichun kataulal. Ancha Dios ixlaʼoxita taʼan lay kataulal, ancha kavavayaʼ tus 1260 julchan. 7Exnicha alil taun ay lhilukuj laktʼiyan. Ni Miguel ali alati ixmayulnin Dios talachʼapachal kun ni anchanu ay tsapul ali ixmayulnin. 8Taval tatsʼanqal ni tsapul kun ixmayulnin. Ex jantucha apalay kalaqxtaqnikal lakatin katataulal laktʼiyan. 9Ni anchanu ay tsapul va tatinaqxtulcha laktʼiyan kun ixmayulnin. Yucha ni tsapul yu alil maqancha, vachu junkan Diablo ali Satanás. Yucha jamakanuy tachun ni lapanakni lakamunukpaʼ. 10Ex alil taun pʼays chivinti yu naul: —Chavay ni Dios kintamalaqtaxtutancha. Chavay chintacha ni Dios tacha ay Jalhachimoʼonuʼ kun lhuu tapʼasta, chintacha ni Cristo yu ulakal kun ixpalhachimoʼon. Va tatinaqxtulcha laktʼiyan ni anchanuʼ yu si mukʼay laqtaqal. Yucha ixlaktislajmay ketʼalaqauninkʼan, tsʼis ali tunkuj, la ixlakaʼukxpu ni Dios. 11Ni ketʼalaqauninkʼan tamaqalhajal ni ay tsapul. Tapulhajal ixjakʼalna ni Sasʼatʼa borrego vachu por ni chivinti yu ixtalaqputeʼey. Jantu katatalhanal, va ixtatamaqxtaqtacha mas katanil. 12’Xlhiyucha kʼalhiʼachʼantʼaʼutʼikcha uxiknan yu vilanantʼik laktʼiyan. Payniʼincha uxiknan yu vilanantʼik lakatʼun ali lakamar. Ni ay aqmoqxnuʼ chavay talaqʼanchaʼancha taʼan vilanantʼik. Yucha ayaj lukujlata, va kʼatsay ni jantucha maqan kataulaʼ. 13Tejkan ni anchanuʼ ay tsapul tinaqmalaqachakal lakatʼun ex niman takyauʼal lakxkaunaʼ ni xanati yu lhitsukul qayntaun istsʼal. 14Pero ni xanati maqxtaqnikal pakatʼuy paqachuj tus tacha ixpaqachuj atsʼoʼo para lay kaltilinijʼal taʼan laʼoxikantacha para kataulal lakakʼavin. Va ixlhimaqati taʼan kataulal ni ay tsapul. Ancha kavavakanaʼ laʼatʼutu jachʼitin apakltaun. 15Ex ni tsapul xnaq kiltaxtul lhuu xkan tus tacha maqataun ay laʼaxkan para kamamuxtul ni xanati taʼan ixvil. 16Pero ni lakatʼun ayaj aqtayjul ni xanati. Niman lvaq tapulqal, ex ancha talaqtsʼanqaʼol tachun ni laʼaxkan yu kiltaxtul ni tsapul. 17Chuncha ni tsapul ayaj lukujlanil ni xanati. Ex alcha makan lhilukuj kun alati sasʼatʼan ni xanati. Yuʼuncha tamakay yu lhinajun ni Dios y ox tataylhaaniy la ixchivinti Jesucristo.

will be added

X\