APOCALIPSIS 11

1Ex ikmaqxtaqnikal maqataun akltiyati, tacha maqataun kʼiu, yu papulkanankan. Va kunkal: —Kaʼostʼaycha y kʼalkʼatʼi ni chaqaʼ taʼan vil ni Dios. Vachuʼ kʼalkʼatʼi laka altar. Vachuʼ kʼapʼutʼeʼe tas qaynchuxicha yu tatoʼoyanan ancha. 2Taʼan ixlhimaqspaʼ ixchaqaʼ Dios, ancha jantu kʼalkʼatʼi. Ancha jamaqxtaqnikantacha lapanakni yu jantu katamispal ixchivinti Dios. Yuʼuncha katachʼintayaʼ ni anchanu putaulan yu ixnavin Dios, va katachʼintayaʼ 42 malkuyuʼ. 3Kitʼin ikmalaqachayaʼ pumatʼuy lapanakni. Kintalhichivinanaʼ y klaqxtaqniyaʼ lakatin para katalaqputeʼel kinchivinti tus 1260 julchan. Katalakatayayaʼ tacha lapanakni yu tamaqaninin. 4Yu aniy qayntʼuy yu kintalhichiviniy va tacha aqatʼuy kʼiu yu junkan olivo y tacha laʼatʼuy yu xaputayan kantila. Ni anchanu lapanakni tayanal la ixlakaʼukxpuʼ Dios yu makal ni lakamunukpaʼ. 5Incha matichun kalhimaqchapuputul, yuʼuncha tamaxtuy jikmi la ixkilnakʼan, tus talaqxavaʼojoy tachun ixtʼalaxkayakʼan. Ex mas va taʼayucha kaval yu kalhimaqchapuputul, yucha maqskʼiniy kanil. 6Yuʼuncha talhitʼajun tapʼasta para jantu katamal xkan tampachun katalaqputeʼeyaʼ ixchivinti Dios. Vachuʼ talhitʼajun tapʼasta para katamaʼakxajnichal jakʼalnan ni xkan. Yuʼuncha lay kataxtaqnil maqanlqajnati ni lakamunukpaʼ, va tavanancha yu yuʼuncha katanaul. 7Tejkan katalaqputeʼeʼoyacha ixchivinti Dios ex ni maqtaliʼ yu pataxtuy taʼan pulman laka pachʼin, yucha kalakmakaniyaʼ lhilukuj. Ex kamaqalhajayacha tus kalaqmaqniyaʼ. 8Ixlakatunajkʼan katatamakaunaʼ laka tin yu ay putaulan taʼan makxtukmukʼakal ni ixJalhachimoʼonukʼan. Ni anchanu putaulan vachu lay kalhimapaqaʼukal Sodoma o Egipto por ixtalaqalhinkʼan. 9Tus taʼoqxlaqchux lapanakni yu alin, ali tachun putaulanaxna ali yu talhichiviniy tachun lhichivin, mas va toʼoxtaycha kataval, yuʼuncha katalaqtsʼitapasayaʼ ixlakatunajkʼan taʼan katatamayaʼ ni anu pumatʼuy lapanakni. Chuncha katapasayaʼ laʼatʼutu julchan apakltaun. Jantu kaxtaqnikanaʼ lakatin kalakmaknukal. 10Ex tachun lapanakni ayaj katalhiʼachantajuyaʼ tus katamakayaʼ kʼatan. Katalaxtaqniyaʼ axtoqnuʼ por tanitacha ni anu pumatʼuy lapanakni yu ixtalaqputeʼey ixchivinti Dios. Ni anchanuʼ pumatʼuy ayaj ixtamamaqanlqajnivay ni lapanakni. Xlhiyucha tejkan kataniyaʼ ayaj katalhiʼachantajuyaʼ. 11Astan tejkan taqayntsalcha laʼatʼutu julchan apakltaun ex tanul la ixlakatunajkʼan ni ixʼun ni Dios yu xtaʼa jatsukunti. Ex taʼostayachoqolcha aaqtaun. Ex tachun yu ancha ixtalaqtsʼitapasal ayaj tatalhanal. 12Ex ni pumatʼuy lapanakni pʼays jamatʼasakal kun chivinti yu minchal tus laktʼiyan, va jalakjunkal: —¡Kʼapʼatʼaxtʼutʼantʼikcha aniy! Ex tapataxtulcha laka taputsʼi y tachun yu ixtʼalaxkayninkʼan tus ox talaqtsʼil. 13Va exnicha nimancha aqtayl jaxkapʼiknin lakatʼun. Laqatamin por laqakavin xachaqan ni anchanuʼ putaulan tus talaqcheʼeʼol. Tanil laqatujun mil lapanakni. Chuncha yu vananaj taxajchal va tatalhanal. Taʼaqtayl ay tamakay ni Dios yu vilchal laktʼiyan. 14Ni aqtʼiyunu maqanlqajnati chavay tapasaʼolcha. Chavay mintacha yu aqtʼutunu maqanlqajnati. 15Ni pumatujunuʼ ixmayul Dios sqolil. Ex yu ixtavilanal laktʼiyan va pʼays tamakatʼaul, tanaul: Chavaycha xapalhachimoʼon ni lakamunukpaʼ va ixnavin ni Dios vachuʼ ni Cristo yu ulakal para kalhachimoʼonul. Yucha kalhachimoʼonunaʼ mas va tavanancha kaval. 16Ex ni pʼuxauntʼati xapaynin yu ixtavilanal la ixlakaʼukxpuʼ Dios taʼan talhachimoʼonun, yuʼuncha tatalakaputatamal lakatʼun, aqtayl tatoʼoyay ni Dios, va tajunil: 17KiJalhachimoʼonu Dios kʼatʼi, klaxtaqniyau lhimalaqpuchuncha. Uxintʼi lhitʼajun tachun tapʼasta. Uxintʼi tʼaʼun, vachuʼ ixtʼaʼun mas va maqancha, vachuʼ kaminchoqoyaʼ. Chavaycha aqtʼayniy jalhachimoʼonun. 18Ni lapanakni yu jantu katamispan, tatalqauniyan. Chavay uxintʼi tʼalʼaman. Laqchaʼalcha julchan para kʼamukʼanin ixlaqtaqalkʼan ni lapanakni yu tanitacha. Chavaycha kaxtʼaqniyeʼe ixlhilhajatkʼan ni lapanakni yu tatapatsanin yu talaqputeʼey minchivinti, vachu milapanakni yu tatoʼoyay mintaqaʼuti, yu lajʼay ali yu jantu lajʼay kataval. Chavay vachuʼ katamaqanlqajnanaʼ yu tamamaqanlqajnival milapanakni lakamunukpaʼ. 19Ex talaqltiʼal ixchaqaʼ ni Dios yu alintachal laktʼiyan. La ixpulakna tasul ni kaja taʼan tajun ni chivinti yu xtaqlhi ni Dios para chʼantaun kaval kun ixlapanakni. Ex alil taun pʼays makaliukniti kun laktʼasati, yu lakatʼun pʼays jaxkapʼiknil y tamal lhuu chajʼiti.

will be added

X\