APOCALIPSIS 10

1Astan klaqtsʼil aqayntaun ixmayul Dios kun lhuu tapʼasta. Ixtaʼeltajuminta laktʼiyan, ixtanun ixpulakna laka taputsʼi. Vachuʼ xkʼavin ixʼalinta xkulumakchati la ixʼaqtsul. La ixʼukxpuʼ ixmaqtajiy tus tacha julchan. La ixqatuʼ ixtasuy tacha matau yu si jikmi. 2Ixchʼapata aqxtaun lakatʼuniy jalhiki yu smilkanta pero va puxʼoqkantacha. La ixchʼajaʼ yu ixlhichʼankanaj tachʼatal laka mar. Yu ixlhichʼanmaqxu tachʼatal lakatʼun. 3Ex pʼays tʼasal, tus tacha laqataun león. Tejkan tʼasaʼol ex aqtujun makatʼaul jamaxkan. 4Tejkan aqtujun makatʼaunʼol yu jamaxkan, ex kitʼin xaktsʼoqʼulaputun. Ex ijqasmaklhi laqataun chivinti, va kunkal: —Vamun saq kʼamaʼatʼi tachun yu xatanajun ni laqatujun jamaxkan. Jantu katsʼoqʼulatʼi. 5Astan ni mayul yu xaklaqtsʼintacha, yu ixchʼatay laka mar ali lakatʼun, yucha maqstal ixlhimajkanaj makaʼ laktʼiyan. 6Va naul ni laqsaval ixchivinti, va lhichivinil la ixtaqaʼuti ni Dios yu kujta mas va tavanancha yu jantu aqtaun katamaktal, yu makal laktʼiyan ali lakatʼun ali lakamar y tachun axtoqnuʼ yu alin. Va naul: —Jantucha kataqmaqayaʼ tachun yu xalaqtsʼin. 7Tejkan yu pumatujunuʼ ixmayul Dios kasunaʼ isqol, ex kalaqchaanacha julchan tejkan katapasaʼoyaʼ yu Dios ixmakaputunta, yu jantu ixmispakan. Chuncha kunaʼ tacha jalakjunil ixlapanakni yu maqancha ixtalaqputeʼey ixchivinti. 8Ex aaqtaun ijqasmakchoqol taun chivinti yu minchal laktʼiyan yu kijunil: —Kapiticha. Kachʼapʼacha ni jalhiki yu puxʼoqkantacha yu chʼapata ni mayul yu chʼatay laka mar ali lakatʼun. 9Chuncha klaqʼalcha ni ixmayul Dios. Ex ikskʼinil ni kixtaqnil ni jalhiki. Ex yucha kijunil: —Aniycha alinta ni jalhiki. Kachʼapʼacha y kaʼutʼicha. La minkil ayaj saqsi kunaʼ tacha xaxkan seraj, pero la mimpajan ayaj sun kunaʼ. 10Ex kimaqxtaqnil ni jalhiki, ex kʼulcha. Va ayaj saqsi ixjunita la kinkilna, va tacha xaxkan seraj. Pero astan la kinpajan ayaj sun val. 11Astan kijunil: —Uxintʼi tsʼanʼay kʼalaqpʼutʼeʼecha yu katapasayaʼ oqxlaqlhuu lapanakni lakamunukpaʼ, lakalhuu putaulanaxna, mas va tichichuncha lhichivin yu talhichiviniy, vachuʼ pumalhuu jalhachimoʼonun.

will be added

X\