FILEMÓN 1

1Kitʼin kPablo, va kchʼikanta por klaqputeʼey ixchivinti Jesucristo. Va chʼantaun kun yu kilaqaj Timoteo klatsʼoqniyau uxintʼi Filemón. Ox kilatʼatapatsayau, xlhiyucha ayaj klapaxkayau. 2Vachu ikmastakʼayau ni Apia yu kintʼalapanakkʼan yu ikpaxkayau y vachu Arkipo yu kintatʼataylhaanan ni lachʼapati por kilhakapuʼatkʼan y vachu ikmastakʼayau yu talhakapuʼanan yu tataqxtoʼa la minchaqaʼ. 3Katamapaynin y oxamaktaun katamakan ni kimPay Dioskʼan kun Jesucristo kiJalhachimoʼonukʼan. 4Ikxtaqniʼalhiy lhimalaqpuchuncha ni Dios y klapastakʼau ni uxiknan tejkan ikskʼin ni Dios. 5Kintajuniy ni ox achʼaniy y lhakʼapʼupʼin ni Jesús kiJalhachimoʼonukʼan y lakpʼaxkʼay tachun ixlapanakni. 6Va ikskʼin Dios para kalakmamispʼanin alati lapanakni milhakapuʼati y chuncha kaxajchal ni kamispʼatʼi tachun yu ox yu Dios kintaxtaqniyan kijnankʼan yu chʼantaun kun Cristo Jesús juntau. 7Ayaj ijkʼachanau y ox kʼatsanau por mijapaxkanti. Uxintʼi, laqaj, ox lakmalakaʼulay ni ixlapanakni Dios la ixjalhanutkʼan. 8Xlhiyucha mas kun Cristo klhitʼajun lhachimoʼon para kaklhijunin yu maqskʼiniy, 9pero kʼachaniyan, xlhiyucha vamun iktapayniniyan. Kitʼin kPablo ayaj xapaycha y chavaycha va ktachʼin kunita por Cristo Jesús. 10Va iktapayniniyan por Onésimo. Yucha kilaqmil taʼan iktanun laka pachʼin y tacha kintsʼal val por ixlhakapuʼati. 11Pʼunaj jantu ox ixjunita para kaʼaqtayjun pero chavaycha ox lay aqtayjuyan y vachu lay kiʼaqtayjuy ni kitʼin. 12Chavay yucha ikmalaqachanichoqoyan. La ox kʼalaʼaʼitʼi vachu va tacha kilaʼaʼitʼi ni kitʼin. 13Va xaknajun ixtaulal kun kitʼin ex chuncha ixkintapatsanil por uxintʼi. Va aniy iktanun laka pachʼin por klaqputeʼel yu ox chivinti yu lhichiviniy Jesucristo. 14Pero jantu klhijunputun kataulal aniy incha jantukaʼ mintakʼatsan kaval. Jantu iknajun ni kiʼaqtʼayʼutʼi laqatapʼasta, va iknajun kiʼaqtʼayʼutʼi laqaʼachati. 15Ka va lay ixmakauntan taun panchʼix para chavaycha lay kalaʼaʼichʼoʼo y katʼataulan mas va tavanancha. 16Jantucha kunaʼ tacha oqxtamati, va tacha milaqaj yu paxkayan. Chuncha apalay ox xajantu yu valiʼiy oqxtamati. Yucha ox ikpaxkay ni kitʼin pero apalay kapʼaxkʼatʼi ni uxintʼi, jantucha tacha valiʼiy lapanaki, va tacha milaqaj kalaqtsʼi. Milaʼatʼuykʼan va ixlapanaknicha ni Jalhachimoʼonuʼ Jesucristo untʼatʼik. 17Incha kilaqtsʼin tacha milaqaj y chʼantaun juntau ex kalaʼaʼitʼi ni yucha vachu va chun tacha kʼilaʼaʼitʼi ni kitʼin. 18Chavay incha yucha va makanitan taun laqtaqal o incha va lhaaniyan tuʼuchun ex kalaqtsʼi va tacha ni kitʼin kaklhaanin. 19Kitʼin Pablo iktsʼoqniyan la kimakaʼ. Va kunan ni kakmapalniyan, pero jantu ikmaqskʼiniy kajkunin. Uxintʼi kʼatsʼaycha ni kʼilhipinin metsukunti. 20Ex chuncha, laqaj, kʼamakʼatʼi yu klhitapayniniyan por chʼantaun juntau kun yu Jalhachimoʼonuʼ. Chuncha kʼimalakʼaʼulanin kelhanuti por chʼantaun juntau kun yu Jalhachimoʼonuʼ Cristo. 21Iktsʼoqniyan por ijkʼatsaycha ni kiʼalasmatʼeʼe y apalay kʼamakʼayeʼe tacha klhitapayniniyan kamakʼatʼi. 22Vachu kʼalaʼoxitʼi taʼan lay kaktaulal la minchaqaʼ. Klhilay ni por skʼinatʼik ni Dios lay klalaqʼanchoqotachaʼau taʼan vilanantʼik. 23Vachu mastakʼayan ni Epafras yu kintʼatanun laka pachʼin por Cristo Jesús. 24Vachu tamakstakʼayan ni Marcos ali Aristarco ali Demas ali Lucas yu kintatʼatapatsay. 25Katamapaynin ni Jalhachimoʼonu Jesucristo la metsukuntikʼan. Chuncha kavalcha.

will be added

X\