1 Ex va chuncha tejkan tunkulcha, tachun yu xaʼukxtinin ni kuras kun yu xalajʼaynin lapanaki va tamachʼantamilcha ni ixchivintikʼan para katamaqnil ni Jesús. 2 Ex chuncha tachʼilhaʼalcha, va tamaqxtaqnilcha ni Pilato yu xagobernador romano. 3 Ex va chuncha ni Judas tejkan kʼatsal ni kamaqnikanaʼ ni Jesús yu ixmaqxtaqta va mapaxal ixjatapastakʼati. Laqmaqxtaqnichoqol yu treinta xatumin plata ni xaʼukxtinin kuras kun yu xalajʼaynin lapanakni. 4 Va lakjunil: —Ni kitʼin ikmaqtaqalhinil tejkan ikmaqxtaqlhi para kamaqnikal qayntaun lapanaki yu jantu kalhitsukul laqtaqal. Ex ni yuʼuncha va tanaul: —Yucha jantu kintapaxtoqniyan ni kijnankʼan. ¡Yucha ka minkuentajcha ni uxintʼi! 5 Ex ni Judas laqtanqalhul ni tumin laka ay lakatajtan, taxtul va ankal ixpixtuchʼikiltaka ixlaqʼaman. 6 Yu xaʼukxtinin kuras tasakchoqol ni tumin, va tanaul: —Ni aniy tumin va tsamantacha jakʼalnan, va yucha yu lhimapalkal ixmaqnika qayntaun lapanaki. Jantu lay mujuyau taʼan mujukan xatumin lakatajtan. 7 Ex va tamachʼantamil ixjatapastakʼatkʼan para kataʼil aqxtaun tʼun yu ixnavin qayntaun xamakanaʼ aqchoqoxna, chuncha para ancha katamaknul lapanakni yu alakataun machaqan. 8 Xlhiyucha ni anchanu lakatʼun vananaj tajuniy va Xatʼun Jakʼalnan. 9 Va chuncha val tacha maqancha tsʼoqlhi ni Jeremías yu ixlaqputeʼey ixchivinti Dios, yu najun inchine: “Tachʼapal ni treinta xatumin plata, yu xatapal yu ixtamukʼanita ni israelitas, 10 kun yucha taʼinil ixtʼun qayntaun xamakanaʼ aqchoqoxna, chuncha tacha kilhijunil ni Jalhachimoʼonuʼ Dios.” 11 Ex chuncha va lhaʼankal ni Jesús kun ni gobernador. Yucha va lhisakmil: —¿Uxintʼi va yu ay xajalhachimoʼonuʼ kʼatʼi ni israelitas? Ex va naul ni Jesús: —Va tacha ni uxintʼicha nau. 12 Pero tejkan ixtatʼajuncha tislajmanan ni Jesús yu xaʼukxtinin ni kuras kun yu xalajʼaynin ni lapanakni, ex ni yucha va valiʼiy saq ixjunita. 13 Xlhiyucha ni Pilato va lhisakmil: —¿Jantu kʼaʼasmaktʼi tachun yu tatʼaunan lhitislajmanan? 14 Pero ni Jesús mas va laqataun chivinti jantu kaqaltayl. Ex tus taun lhilal ni gobernador. 15 Tejkan xakʼatan Paxku ixjun, ex yu gobernador va si ixxʼotʼa qayntaun tachʼin yu ixtalaksakʼa ni lapanakni. 16 Exnicha ixʼalin qayntaun tachʼin yu ayaj ixmispakan, va ixjunkan Barrabás. 17 Ex chuncha tejkan ixtaʼaqxtoqnun ni lapanakni, ni Pilato va laklhisakmil, va naul: —¿Taʼayucha naunatʼik oxamaktaun kakmakaul? ¿U va Barrabás u va Jesús yu junkan Cristo? 18 Ni Pilato ixkʼatsay va ixtamaqxtaqta ni Jesús por ixʼakchaʼatikʼan. 19 Tejkan vananaj ixvil la ixpulakchivin, ex yu ixanati va malaqachanil chivinti, va junil: “Jantu tuʼuchun kʼamakʼanin ni anchanu lapanaki yu jantu kalhitsukul laqtaqal. Kutancha tsʼis va taxtuj klhiʼaqlaqavanal ni anchanu lapanaki.” 20 Pero yu xaʼukxtinin kuras kun yu xalajʼaynin ni lapanakni va taxaqalal ixtalhavaxtu lapanakni para kataskʼinil kaxʼoqkal ni Barrabás y para kamaqnikal ni Jesús. 21 Ex chuncha yu gobernador va aaqtaun jalaklhisakmil ni lapanakni, va lakjunil: —¿Taʼayucha naunatʼik kakmakaul oxamaktaun ni aniy pumatʼuy lapanakni? Va tanaul: —¡Va Barrabás! 22 Ex yu gobernador va laklhisakmichoqol, va naul: —¿Ex tisuncha kakmakayacha kun ni Jesús, yu junkan Cristo? Ex va taqaltayanal, va tamatʼasal: —¡Kamakxtukmukʼakal laka kurus! 23 Pero yu Pilato va lakjunchoqol, va naul: —¿Tisuncha laqtaqal makata? Pero ni yuʼuncha aaqtalaqtaun tamatʼasachoqol, va tanaul: —¡Kʼamakxtʼukmukʼacha laka kurus! 24 Ex laqtsʼil ni Pilato ni jantucha lay tuʼuchun makay. Yu lapanakni va apalaycha ixtalakchiviniy y ixtatʼasay kun lhilukuj. Chuncha ni Pilato va malaqachanil ixʼika xkan, va makchaʼal la ixlakaʼukxpukʼan ni lapanakni y lakjunil: —Ni kitʼin jantu kilaqtaqal kunaʼ ixmaqnika ni aniy ox lapanaki. Tapaxtoqniyan ni uxiknan. 25 Chuncha tus tachun ni lapanakni va tanaul: —Chun, ni kijnan y vachuʼ kesʼatʼankʼan va kilaqtaqalchkʼan kunaʼ ni ixlhinin. 26 Ex chuncha ni Pilato va oxamaktaun makaulcha ni Barrabás. Ex lhinaul ixmaqanaqka ni Jesús y maqxtaqlhi para kamakxtukmukʼakal. 27 Ex chuncha yu ixtropas ni gobernador va talhaʼal ni Jesús la ixchaqa ni gobernador. Ancha laqmaqxtoqkal yu alati tropas tus xvilhin tamalaqachoqoxnul. 28 Tamajʼanil ixlaqchʼiti y tamulanil aqxtaun laqchʼiti yu xlapul. 29 Tamalakpatanul taun korona yu ixlhimakakanta jaltukun, y tamachʼapal laqataun palik la ixlhimajkanaj. Ex taʼaqtsoqoqtanil la ixlakaʼukxpu, talaktuʼul, va tajunil: —¡Katsukuʼalil yu ay xalhachimoʼonuʼ ni israelitas! 30 Va talakapuchujval, ex kun ni anchanu palik yu ixlhaʼanta, va talhilaqapanaqchoqol. 31 Tejkan talaktuʼuʼolcha ex tamaxtunichoqol ni xlapul laqchʼiti, tamulanichoqol yu ixlaqchʼiti y talhaʼalcha para kataxtukmukʼal laka kurus. 32 Tejkan ancha tataxtul, tapaxtoqlhi qayntaun joʼati yu junkan Simón yu machaqaʼ Cirene. Talhijunil laqatapʼasta kalhaʼal ixkurus ni Jesús. 33 Tachaʼal lakataun aspajun yu ixjunkan Gólgota (va naunputun xajalukuti aqtsul). 34 Ancha tamaʼotul ni Jesús xaxkan uvas yu skajtacha yu lhiyaukanta taun kʼuchʼu para jantu ayaj kaʼukskʼatsal. Pero tejkan kilkʼatsal ni Jesús ex jantu kaʼoqlhi. 35 Tejkan tamakxtukmukʼaʼol laka kurus, ex aqtayl tamakay suerte para taʼayucha katamakaunil ixlaqchʼiti. Ex va chuncha taqayntsal tacha maqancha istsʼoqta yu ixlaqputeʼey ixchivinti Dios, najun: “Talaqlvaqlhi kilaqchʼiti y tamakanil suerte yu xakʼulata.” 36 Ex chuncha ancha tataulalcha para katalhistaklhi. 37 Va tatsʼoqmukʼanil taun chivinti la ixʼaqtsul ni ixkurus, va najun: “Aniy va Jesús, ixJalhachimoʼonukʼan ni israelitas”. Va yucha talhimaqnil. 38 Ancha vachuʼ laktʼaxtukmukʼakal kun Jesús pumatʼuy alhavanan. Qayntaun la ixlhijakanaj y yu aqayntaun la ixlhimaqxu. 39 Yu ancha ixtatapasay va laqxtoqnuʼ chivinti ixtajuniy, ixtamalaklay ixʼaqtsulkʼan, 40 va ixtajuniy: —¡Uxintʼi yu ixmaqtʼatʼi ni ay kilakatajtankʼan ex paqtʼutu julchan ixmaʼayauchʼoʼoʼ! Incha laqsaval va Sasʼatʼa Dios unitʼa, chavay kʼalaqtʼaxtʼu meʼeman y kapʼatʼaʼutʼi laka kurus. 41 Yu xaʼukxtinin ni kuras ali yu xalajʼaynin ni lapanakni ali yu ixtamasuy ixlhachimoʼonkʼan ni israelitas, vachu va chun talaktuʼul ni Jesús, va tanaul: 42 —Ixjamalaqtaxtuy yu alati pero jantu lay laqtaxtuy ixlaqʼaman. Incha yucha va yu ay xajalhachimoʼonuʼ israelitas, ex kapatajul la ixkurus y kaklhakapuʼaniyau ni yucha. 43 Yucha lhakapuʼan ni Dios. Chavay va Dios kamalaqtaxtul incha laqsaval achaniy. Yucha kintajuntan va Sasʼatʼa Dios junita. 44 Yu pumatʼuy alhavanan yu ancha ixlaktʼaxtukmukʼakanta vachu chun laqxtoqnuʼ chivinti tajunil ni Jesús. 45 Ex atunkuj va aqtaynil putsʼisa, y taylhaʼal tus laʼatʼutu putoqoxata ixputsʼista. 46 Ex chuncha anchanu hora va pʼaysni tʼasal ni Jesús, va naul: —Eli, Eli ¿lema sabactani? (va naunputun: “KiDios kʼatʼi, kiDios kʼatʼi, ¿valiʼiycha ni kʼilakʼamakʼauntʼacha?”) 47 Yu ancha ixtayanal taqasmaklhi, va tanaul: —Va tʼajun tʼasaʼiniʼ ni Elías yu maqancha ixlaqputeʼey ixchivinti Dios. 48 Ex yu qayntaun va takyauʼal iniʼ laqataun sponja. Va matajul laka xaxkan uva yu skajtacha, ex akatachʼimukʼal laka maqataun kʼiu ex va malakanunil para kaʼoqlhi ni Jesús. 49 Pero lati tanaul: —Kʼamakʼaucha. Kalaqtsʼinaucha incha kaminaʼ malaqtaxtunuʼ ni Elías. 50 Taval aaqtaun tʼasachoqol ni Jesús, ex va nilcha. 51 Ex chuncha va taʼexpakltʼiyul yu xaʼay kortina ni ay lakatajtan, va taʼexminchal xʼakpuʼ tus xtuntaun. Vachu xkapʼiknil ni lakatʼun y tatampacheʼeʼol yu ay chiyux. 52 Vachu lati yu putaknun va talaqltiʼaʼol y pumalhuvaj ixlapanakni Dios va takujchoqol la ixlhininkʼan. 53 Astan tejkan takujchoqol ni Jesús la ixlhinin, ex ni yuʼuncha tataxtul la ixputaknunkʼan y tatanul laka ay putaulan Jerusalén yu ixnavin Dios y pumalhuu talaqtsʼil. 54 Yu kapitan kun yu ixtropas yu ixtalhistakta ni Jesús va talaqtsʼil y taʼukskʼatsal ni xkapʼikniti y talaqtsʼil tachun yu ixtʼajun tapasanaʼ. Ex tus ayaj tatalhanal, va tanaul: —¡Laqsaval ni aniy joʼati va Sasʼatʼa Dios ixjunita! 55 Ancha vachu ixtayanal lhuvaj xanatin, va paqmaqati ixtatʼajun laqtsʼinin ni Jesús. Yuʼuncha ixtatixkaulhimintachal tus Galilea y va ixtaʼaqtayjulhiminta. 56 Lati ni yuʼuncha va yu María Magdalena ali María yu ixnatikʼan ni Santiago kun José, ali ixnatikʼan yu istsʼalan Zebedeo. 57 Va chuncha ixtʼajuncha putsʼisniʼ tejkan chaʼal qayntaun maqaliʼ yu ixjunkan José yu xamachaqaʼ Arimatea ixjunita. Yucha vachuʼ ixtʼaltanaʼ ni Jesús ixjunita. 58 Ni José va laqʼal ni Pilato y va skʼinil ixlakatunaj ni Jesús. Chuncha yu Pilato lhinaul kaxtaqnikal. 59 Ex ni José va pʼuxlhi ixlakatunaj ni Jesús y pamilil kun aqxtaun kʼus laqchʼiti. 60 Kiimaʼanil ixlakatunaj taʼan sastʼi ixpukutunuta taun talpa yu yucha ixnavin. Malakchaunilcha xakiltalakxtuti kun aqxtaun ay chiyux. Taval anchoqolcha. 61 Pero yu María Magdalena kun yu aqayntaun María va ancha ukstsʼuniy ixtavilanal taʼan maʼakal ixlakatunaj ni Jesús. 62 Ex va chuncha ataun julchan val, va xajulchan jastaknati. Ex yu xaʼukxtinin ni kuras ali yu fariseos va talaqʼal ni Pilato. 63 Va tajunil: —Jalhachimoʼonuʼ, kijnan ikpastakchoqoyau tejkan vananaj ixtʼajun ni anchanuʼ makanunuʼ lapanaki, va ixnajun yu laʼatʼutunuʼ julchan kakujchoqoyaʼ la ixlhinin. 64 Xlhiyucha, klaskʼiniyau kamalaʼachʼan ixlhistakka taʼan maʼakanta ixlakatunaj tus laʼatʼutunuʼ julchan. Incha jantu, ex lay kataʼal alhaumaxtunun ixlakatunaj yu ixtʼaltanan. Ex astan katajunil ni lapanakni ni va kujchoqotacha la ixlhinin. Incha va chuncha kaval, ex va apalaycha ay kaval ni anchanuʼ jalaklkanti xajantu yu pʼunaj. 65 Ex lakjunil ni Pilato: —Kʼalhipʼintʼikcha ni tropas yu katalhistakʼaʼ. Kʼapʼinchʼipitikcha y kʼalhistʼaktʼik taʼan maʼakanta ixlakatunaj tacha lhilayatʼik yu ox lhistaknati. 66 Ex taʼalcha, ox tamakal kuenta taʼan ixmaʼakanta ixlakatunaj, va tamukʼanil taun sello ni chiyux yu ixpumalakchaukanta. Ancha tamakaulalcha ni tropas para katalhistaknal.
