1 Ex va chuncha ni fariseos ali ni saduceos talaqʼal ni Jesús, talaqtsʼintanul, va taskʼinil para kalakmasunil taun ay axtoqnu yu minachal laktʼiyan. 2 Ex ni Jesús va lakjunil: —Tejkan toqoxata, ex ni uxiknankʼan naunatʼik: “Chavay ka la lhiʼacha kunchoqoyaʼ, ni laktʼiyan ayaj xlapul.” 3 Tejkan puvakuj, ex naunatʼik: “Yu chavay ka jantu lhiʼacha kunaʼ, ni laktʼiyan ayaj xlapul, chuncha aqapuchajuy.” Ex chuncha ni uxiknan ox mispʼayatʼik tacha kunaʼ ni julchan, ¿ex valiʼiycha jantu malaʼasiyatʼik yu tapasay chavaycha aniy taʼan tʼaunatʼik? 4 Yu aniy jalaktuʼunun ali maqtaqalhinin lapanakni taskʼin para kakmakal taun ay axtoqnu pero jantu tuʼuchun kaklakmasuniyaʼ, vamun yu tacha tapasal ni Jonás yu maqancha ixlaqputeʼey ixchivinti Dios. Ex chuncha ni Jesús jamakaulcha, va anchoqolcha. 5 Tejkan taʼal ixlhiputakuktachal ni lakamar yu ixtʼaltanan ni Jesús, va jantu katalhaʼal ixtiyutkʼan, va takauklhi. 6 Chuncha ni Jesús va lakjunil: —Kʼalhistʼajkʼantʼik kun yu ixlevadurajkʼan ni fariseos kun yu saduceos. 7 Ex yuʼuncha taʼaqtaychal talaxaqalay, va talajuniy: —¡Chuncha najun por jantu kalhimiu kintiyutkʼan! 8 Ni Jesús kʼatsal yu ixtapastakʼacha, va lakjunil: —¿Valiʼiycha naunatʼikcha ni jantu kʼalhitsʼukʼutʼik mintiyutkʼan? Jantu ox kilalhakapuʼanau. 9 ¿Jantukaʼ malaʼasiyatʼik? ¿Jantu pʼastʼakʼatʼik ni aqskis pan iklaqmaqpitsinil laqakis mil joʼakna? ¿Tas chuncha canastajcha laksakchʼoʼotʼikcha? 10 ¿Jantu pʼastʼakʼatʼik yu aqxtujun pan yu iklaqmaqpitsinil laʼatʼati mil joʼakna? ¿Tas chuncha canasta laksakchʼoʼotʼikcha? 11 Jantukaʼ malaʼasiyatʼik ni kitʼin jantu kaklalhixaqalau pan. Yu klajunau va kalhistʼakkʼantʼik ixlevadurajkʼan ni fariseos kun yu saduceos. 12 Taval tamalaqasilcha yu lakjunil ni Jesús. Jantu ixlhichiviniy xalevadura ni pan, va ixlhichiviniy yu ixtamalaniy ni fariseos kun saduceos. 13 Tejkan chaʼal ni Jesús ixlhiʼukstsʼuniy ni putaulan Cesarea Filipo, ex laklhisakmil ixtʼaltanan, va lakjunil: —¿Ni lapanakni tas ayucha talhilaycha ni kitʼin yu Sasʼatʼa Lapanaki? 14 Yuʼuncha va tanaul: —Lati tanajun uxintʼi va Juan yu jamaqchajʼavanaʼ. Lati tanajun uxintʼi va Elías. Lati tanajun va Jeremías kʼatʼi u matichun yu maqancha ixtalaqputeʼey ixchivinti Dios. 15 Ex naul ni Jesús: —Ex uxiknan, ¿tas ayucha naunatʼikcha ijkunita ni kitʼin? 16 Ex yu Simón Pedro va junil: —Ni uxintʼi va yucha ni Cristo kʼatʼi, istsʼal kʼatʼi ni Dios yu kujta. 17 Ex ni Jesús va junil ni Pedro: —Simón, yu istsʼal kʼatʼi ni Jonás, ayaj achʼantʼacha ni uxintʼi. Jantu matichun lapanaki kamamispanin yu nau pero yu kimPay yu alintachal laktʼiyan, yucha mamispanin. 18 Kitʼin ijkunan ni uxintʼi va Pedro kʼatʼi, y kun aniy chiyux kapuʼaqtayniyaʼ kilapanakni y mas ixtapʼasta ni lhinin jantu lay kaamaqalhajayaʼ. 19 Kakxtaqniyan xapalhachimoʼon laktʼiyan. Yu kʼachʼiʼulayeʼe aniy lakamunukpaʼ vachu jachʼiʼulanti kunaʼ laktʼiyan. Yu kaxʼotʼeʼe aniy lakamunukpaʼ, vachu jaxʼoqnuti kunaʼ laktʼiyan. 20 Ex ni Jesús va lakjunil ni ixtʼaltanan para jantu matichun katajunil ni yucha va yu Cristo. 21 Anchanu julchan ni Jesús aqtaynil jalaqputeʼeniʼ ixtʼaltanan ni yucha maqskʼiniy kaʼal Jerusalén. Chuncha katamamaqanlqajnivayaʼ yu xalajʼay xapaynin, ni xaʼukxtinin kuras, y vachuʼ yu ixtamasuy ixlhachimoʼonkʼan. Va katamaqniyaʼ, pero yu laʼatʼutu julchan va katakukchoqoyaʼ. 22 Chuncha ni Pedro va alakataun ixʼaman lhaʼal ni Jesús, va aqtayl laqʼaymay, va juniy: —Jalhachimoʼonuʼ, kamapʼaynikʼa meʼeman. Apalay ox jantu chuncha kʼatʼapʼasʼa. 23 Chuncha ni Jesús talaqaspʼiklhi, va junil ni Pedro: —Yu uxintʼi, Satanás, tumpajcha kʼaʼuntʼi kun kitʼin. Uxintʼi vamun makʼay para kʼimapʼutsʼanʼanitʼi. Uxintʼi mejatapastakʼati jantu chun tacha ixjatapastakʼati Dios, va pastakʼa tacha yu valiʼiy lapanakni. 24 Ex ni Jesús va lakjunil ixtʼaltanan: —Incha matichun kintʼatiʼukxuntayaputun, yucha jantucha lay makay yu makaputun. Kaval tacha kalhaʼal ixkurus, ex chuncha lay kintʼatiʼukxuntayalcha. 25 Ni lapanaki yu ayaj lhitsukuputun ixjatsukunti, yucha kamaqatsʼanqayaʼ. Pero yu kamaqatsʼanqayaʼ ixjatsukunti por kitʼin, yucha kalhitsukuchoqoyaʼ. 26 ¿Tisuncha lhajaycha qayntaun lapanaki incha kalhitsukuʼol tachun yu alin lakamunukpaʼ pero va maqatsʼanqay ixjatsukunti? ¿Tas kapulhitsukuchoqoyaʼ ixjatsukunti? 27 Yu kitʼin ni Sasʼatʼa Lapanaki kakmintachal kun ixtapʼasta kimPay, y kun ixmayulnin. Ex chuncha kaklakmapalacha ni lapanakni por qayntamin va yu tamakata. 28 Laqsaval klajunau, aniy taʼalin lati lapanakni yu jantukaʼ kataniyaʼ tus katalaqtsʼinʼelayaʼ ni kitʼin yu Sasʼatʼa Lapanaki tejkan kakmintachal la kilhachimoʼon.
