1 Ex chuncha yu xagobernador ni Galilea, yu ixjunkan Herodes, ni yucha vachu kʼatsal yu ixtʼajun makan ni Jesús. 2 Ex yucha va lakjunil yu ixtaʼaqtayjuy: —Ka va Juan yu jamaqchajʼavanaʼ ni kujchoqota. Ka xlhiyucha lhitʼajun tapʼasta para kamakal yu lajʼay axtoqnuʼ. 3 Va yucha ni Herodes yu ixmalaqachananta ixlakachʼimaka ni Juan, ex va maqanul lakapachʼin. Va chuncha makal va por ixanati yu Herodías junkan, yu ixanati ixjunita ixlaqaj Felipe. 4 Yu Juan va ixjunita: —Jantu lay kʼamakʼatʼi mixanati yu ixanati milaqaj. 5 Ex va chuncha ni Herodes ayaj ixmaqniputun ni Juan, pero va ixlaktalhauniy ni lapanakni. Yuʼuncha ox ixtalhakapuʼan ni Juan va ixlaqputeʼey ixchivinti Dios. 6 Pero tejkan lakachil ixkʼatan ni Herodes, ex yu istsiʼi ni Herodías va aqtaynil jatʼinin la ixtalakaʼukxpukʼan yu ixlakjuntaʼikanta. Ex ayaj maqamal ni Herodes. 7 Chuncha yucha va junil ni laqsaval kaxtaqniyaʼ va tuʼuchun yu kaskʼinilcha. 8 Va chuncha ixnati va chivijval yu jatsiʼi. Ex yucha va junil ni Herodes: —Va knajun kʼixtʼaqnin ixʼaqtsul ni Juan yu jamaqchajʼavanaʼ kun laqataun ay plato. 9 Ex ni ay jalhachimoʼonu Herodes va maqaninil, pero va por ixjunitacha la ixtalakaʼukxpukʼan ni ixlakjuntaʼita, ex mas jantu kaʼuyujnaul, va lhinaul kaxtaqnikal. 10 Va malaqachanalcha ixchaqxpʼuxnika ixʼaqtsul ni Juan taʼan ixtanun lakapachʼin. 11 Chuncha talhiminil ixʼaqtsul laqa ay plato ni jatsiʼi, ex yu jatsiʼi va maqxtaqnilcha ni ixnati. 12 Ex tachinchal yu ixtʼaltanan ni Juan, va talhaʼalcha maknunun ixlakatunaj. Ex astan va taʼal mapastakʼanin ni Jesús. 13 Ex tejkan qasmaklhi ni Jesús yu tapasalcha, va taxtulcha taʼan ixvil, va ixʼaman al, tajul laqataun barco va puʼal lakamar, va chaʼal lakatʼun taʼan jantu alin lapanakni. Pero tejkan chuncha takʼatsal ni lapanakni ex tataxtul ni putaulanin y tatixkaulhaʼal pero yuʼuncha va lakatʼun tapuʼal. 14 Tejkan patajul laka barco ni Jesús va jalaqtsʼil lhuvaj lapanakni. Ex ni yucha va ayaj lakmapaynil, y va jalajkʼuchʼul tachun yu taqanʼanin. 15 Taval va putsʼisputuncha. Ex yu ixtʼaltanan tatalakanunil, va tajunil: —Ayaj toqoxalcha y aniy va xʼaman ni lakatʼun, jantu tʼujuʼ jataulanti. Kalakmakʼaucha ni lapanakni para kataʼalcha lakxkaunan ixvaytikʼan taʼan alin jataulanti. 16 Ni Jesús va lakjunil: —Jantu maqskʼiniy kataʼal lakxkaunan. Ni uxiknan kʼalakvavatʼikcha. 17 Ex ni yuʼuncha va tanaul: —Pero jantu lhuu kaklhimiu ni vayti. Va ikmaqalinau aniy va aqskis pan kun aqxtʼuy jatanti. 18 Ex ni Jesús va naul: —Kilalhiminiu aniy. 19 Ex va lakjunil ni lapanakni para katataulal ni laka jatsʼinan. Ex chuncha va chʼapalcha la ixmakaʼ ni anchanu aqskis pan kun aqxtʼuy jatanti, ex va talaqstʼal laktʼiyan, va xtaqnil lhimalaqpuchuncha ni Dios. Ex va laqcheʼelcha ni pan, va jalaqxtaqnilcha ixtʼaltanan. Ex yuʼuncha va taʼaqtaynilcha talaqmapitsiniy ni lapanakni. 20 Ex tus tachun ox tavayl y tus ox taʼotsaʼol. Vananaj tamaʼaqtsamachoqol laqakautʼuy canastas yu xatalaqcheʼeniʼ yu xajchal. 21 Yu tavayl va laqakis mil joʼakna y tumpaj yu xanatin kun jasʼatʼan. 22 Ex va chuncha ni Jesús va niman lakjunil ixtʼaltanan para katatajuchoqolcha ni laka barco. Pʼunaj kataminchoqochalcha apaʼextaun lakxkan. Yu Jesús vananaj tamakaul jalakmastakʼanaʼ ni lapanakni. 23 Tejkan lakmastakʼaʼolcha ex ni Jesús va al skʼiniʼ Dios ixʼaman lakataun aspajun. Taval tejkan putsʼislhicha ex ni yucha va ancha ixʼaman ixʼalinta. 24 Ex va chuncha ni barco va la maqati anta, va laycha ixpakltaun lakamar. Va ixʼunilata la ixʼukxpulakapu ni barco, yu xkan ixtantʼaqstʼay y vachu ixqalnaqlhaʼanta ni barco. 25 Ex va chuncha tejkan tunkumintacha, ni Jesús va ltanajʼal la ixʼukxni lakamar, va taʼan ixtapuʼanta yuʼuncha. 26 Tejkan chuncha talaqtsʼil yu ixtʼaltanan ni Jesús va ltanajʼanta ni yucha la ixʼukxni lakamar, tus pʼas talaktʼasal kun ixtalhantikʼan: —¡Va qayntaun maqtsʼisvanaʼ! 27 Pero ni Jesús jalakkilʼanil, va jalakjunil: —¡Kaʼayajnantʼik! Jantu maqskʼiniy katʼalhanantʼik, va kitʼin. 28 Ex yu Pedro va naul: —Jalhachimoʼonuʼ, incha laqsaval va uxintʼi, ex kʼiʼun para kakltanajʼanchal la ixʼukxni ni lakxkan. 29 Ex naul ni Jesús: —Kʼatʼatʼicha. Ex ni Pedro va takuklhicha laka barco, va ltanajʼalcha ni lakxkan taʼan ixpuminta ni Jesús. 30 Yu un va la pʼasnicha talakanuniy, ex ni Pedro va talhanalcha, ex va aqtaylcha talaqtsʼanqay, va tus sqau tʼasal, va naul: —¡Jalhachimoʼonu, kʼiʼaqtʼayʼutʼi! 31 Ni Jesús va tsʼalaj maqchʼapachoqol, va junil: —Ayaj lakatsʼuniy milhakapuʼati. ¿Valiʼiycha jantu kʼalhakʼapʼupʼi? 32 Tejkan tataukʼachoqolcha laka barco ni Jesús kun Pedro, ex yu un va vak junchoqolcha. 33 Ex yu ixtatʼajumanal laka barco va tataʼaqtsoqoqtanil ni Jesús, va tajunil: —Laqsaval ni uxintʼi va Sasʼatʼa kʼatʼi ni Dios. 34 Va chuncha va tapatakuklhi ni lakamar, ex tachaʼal xalakatʼun Genesaret. 35 Yu xalapanakni ni anchanu putaulan va tamispalcha ni Jesús, ex tus tamapastakʼanininʼol talakachux xaputaulanin ni anchanu jalakatʼun. Ex ni yuʼuncha va talhiminil tachun ixtaqanʼaninkʼan. 36 Ixtatapayniniy ni Jesús para lay katachʼapanil vamun ixpiktuʼ ni ixlaqchʼiti. Ex tachun yu tachʼapanil va si taʼayajnanʼochoqol.
