SAN MARCOS 3

1Ex chuncha ni Jesús va tanuchoqochal aaqtaun laqa chaqaʼ taʼan ixtataqxtoʼa ni israelitas. Ancha ixvil qayntaun joʼati yu ixixta ixmakaʼ. 2Va xajulchan jastaknati, xlhiyucha lati ixtamakata kuenta incha kakʼuchʼuyaʼ ni anchanuʼ joʼatiʼ. Va chuncha incha kakʼuchʼul ex laycha kataputislajmal ni Jesús. 3Ex chuncha ni Jesús va junil ni yu joʼati yu jantu lay ixmapuʼay ixmakaʼ: —Kaʼostʼaycha, kʼatʼanʼajtʼaycha aniy. 4Ex va chuncha jalaklhisakmil, va naul: —Ni xajulchan jastaknati, ¿tas lhinajun kilhachimoʼonkʼan? ¿Lhinajun kamakʼatʼi yu ox u yu jantu ox? ¿Lhinajun kʼamalaqtʼaxtʼutʼi jatsukunti u va kamaqnitʼi? Ex yuʼuncha va tus saq tataulal. 5Ni lapanakni jantu ixtaqalasmakputun, xlhiyucha ni Jesús va ixmaqanininta. Va kun lhilukujcha jalaqtsʼil. Ex va junil ni anchanuʼ joʼati: —Kaxnujtʼi mimakaʼ. Ex ni joʼati va xnujlhi ixmakaʼ, va palaycha junchoqol. 6Ex chuncha ni fariseos tataxtulcha. Yuʼuncha ali ixtʼaltanan jalhachimoʼonuʼ Herodes niman taʼaqtaylcha talakchiviniy tacha lay katamaqnil ni Jesús. 7Ex chuncha ni Jesús kun ixtʼaltanan va taʼal la ixkilpaʼ ni lakamar. Lhuvaj xalapanakni Galilea tatʼaʼal, vachuʼ yu machaqan xalakatʼun Judea. 8Tejkan takʼatsal tacha makal lajʼay axtoqnuʼ ni Jesús, ex chuncha va talaqmil ayaj lhuvaj lapanakni, yu machaqan xalakatʼun Judea ali laka putaulan Jerusalén ali xalakatʼun Idumea ali yu xlhiʼavintʼi ixtavilananchal xalaʼaxkan Jordán, vachuʼ yu machaqan laka putaulan Tiro ali Sidón. 9Ex ni Jesús jalaklhijunil ixtʼaltanan listu katamakal laqataun barco para ancha katajul. Ex chuncha jantu lay katapaqasajlhi ni lapanakni mas va la lhuvaj ixtaʼalinta. 10Ni Jesús va ayaj lhuvajcha lapanakni palay ixlakmakata, va xlhiyucha ayaj lhuvaj taqanʼanin tatalakanunil, ixtachʼapaputun ni Jesús. 11Vachuʼ yu ixtalhitʼajun yu jantu lajʼox espíritus tejkan ixtalaqmin ni Jesús va ixtataʼaqtsoqoqtaniy la ixlakaʼukxpu. Va pʼas ixtatʼasay, ixtanajun: —¡Ni uxintʼi Sasʼatʼa Dios kʼatʼi! 12Ex chuncha ni Jesús va jalaqʼaymal, jantu ixnajun kalakmasunikal ni lapanakni taʼayucha ixjunita. 13Taval ni Jesús al taun aspajun, va lakjuntaʼil ni lapanakni yu ixnajun katatʼaʼal. Ex chuncha talaqʼal. 14Ex ni Jesús va lakʼulal pumakautʼuy joʼakna, ixnajun katatʼatiʼukxuntayal. Vachuʼ kalaqmalaqachayaʼ kataʼal laqputeʼenin ixchivinti Dios. 15Vachuʼ jalaqxtaqnil tapʼasta ni lay palay katamakal yu taqanʼanin, vachuʼ katamaxtunil yu jantu lajʼox espíritus. 16Inchineʼ lakjunkan yu jalaksaklhi ni Jesús: ni Simón yu vachuʼ junkal Pedro, 17vachu yu Jacobo ali ixlaqaj Juan, yu istsʼalan ni Zebedeo. Ni yuʼuncha va jalakjunil Boanerges, va naunputun istsʼalan ni laqpaqnati. 18Yu alati va lakjunkan Andrés, Felipe, Bartolomé, Mateo, Tomás, ali Jacobo yu istsʼal ni Alfeo, vachuʼ yu Tadeo, ali Simón yu ixlhiyal xapartido cananista, 19vachu yu Judas Iscariote, va yucha astan maqxtaqchoqol Jesús para katachʼapal. 20Ex va chuncha ni Jesús anchoqol laqa chaqaʼ. Ex yu lapanakni va lhuvaj tataqxtoqchoqol, va tus jantucha lay tavajin ni Jesús ali ixtʼaltanan. 21Yu ixlapanakni ni Jesús tejkan takʼatsal tacha ixtʼajun tapasanaʼ, ni yuʼuncha va taʼal lakxkaunan, va ixtachʼapaputun. Lati ixtanajun ni Jesús val loko. 22Taval vachu yu ixtamasuy ixlhachimoʼonkʼan ni israelitas taminchal ni Jerusalén, ixtanajun: —Va laqtanuy ni Beelzebú, yu xaʼukxtin aqmoqxnuʼ. Va yucha xtaqniy tapʼasta, xlhiyucha lay maxtuy aqmoqxnun la ixlakatunajkʼan ni lapanakni. 23Taval ni Jesús va lakjuntaʼil ni anchanuʼ lapanakni, va jalakjunil taun chivinti yu xtaʼa jatapastakʼati, va lakjunil: —¿Lhilay ni xʼaman lay maxtuchoqokal ni Satanás? 24Mas va tisuncha lhachimoʼon kaval, incha tatalaqlvaʼa y talaxkajiy ni lapanakni, ex jantucha lay tayaniy. 25Vachu va chun yu tavilanal aqataun chaqaʼ, incha talaxkajiy, ex jantucha lay chʼantaun katatsukul. 26Vachu va chun yu Satanás. Incha yucha ali ixtʼaʼaqmoqxnun talaxkajiy y talachʼapay ex jantucha lay tatayaniy, va chuncha tapumiʼojoy ixtapʼasta. 27’Jantu matichun lay tanuyachal la ixchaqa qayntaun laqapʼays joʼati y valiʼiy kamaxtunil yu ixnavin. Pʼunaj maqskʼiniy kachʼiʼelal ex lay kalakmaxtunil yu ixnavin. 28’Laqsaval klajunau tachun talaqalhin yu tamakay ni lapanakni lay kalaqmalaqmixinikal, vachu tachun yu tanajun yu jantu lajʼox. 29Pero yu jantu lhiʼajin ni Espíritu Santo yucha jantu lay kamalaqmixinikanaʼ ixtalaqalhin, mas va tavanancha kaval kalhitsukuʼalhiyaʼ ixtalaqalhin. 30Yuʼuncha va ixtajuniy va ixlhitʼajun taun jantu ox espíritu, xlhiyucha va chuncha naul ni Jesús. 31Ex chuncha va tachinchal ni ixnati ali ixtʼalaqaunin ni Jesús, va maqspaʼ tatayal, va tamalaqachanil ixjuntaʼika. 32Ex yu lapanakni yu ixtamalaqachoqoxnuta ni Jesús va tajunil: —Minati ali mintʼalaqaunin tayanal maqspaʼ, va talakxkauyan. 33Ex chuncha ni yucha va lakjunil: —¿Taʼayuʼunchacha ni kinati ali ketʼalaqaunin? 34Ex chuncha ni Jesús va jalaqtsʼil yu ixtamalaqachoqoxnuta, va naul: —Yu aniy taʼalinta, yuʼuncha ni kinati ali ketʼalaqaunin. 35Mas va taʼayuchacha kaval incha makay tacha lhinajun ni Dios, ex yucha kilaqaj, yucha kintʼalapanaki, yucha kinati.

will be added

X\