SAN LUCAS 6

1Taun xajulchan jastaknati ni Jesús ali ixtʼaltanan ixtapuʼanta taʼan alinta tachʼanati, yu ixtʼaltanan taʼaqtayl talajʼexʼiy yu xataltsʼi ni trigo, va taxapʼiʼulhaʼalcha. 2Ex lati yu fariseos va talhisakmil: —¿Valiʼiycha makʼayatʼik lhitapatsa chavay mas jantu xtaqkan lakatin kʼatʼapʼatsʼatʼi ni xajulchan jastaknati? 3Ex ni Jesús va jaqaltayanal: —¿Jantu kʼapʼutʼeʼetʼik tacha tamakal ni David kun ixtʼaltanan tejkan tachavanil? 4Tejkan tanul la ixchaqa ni Dios, chʼapal ni pan yu ixmoqslanikan Dios, va ul, ex jalaqxtaqnil ixtʼaltanan. Chuncha makal mas vamun ni kuras ixtalhitʼajun lakatin para kataʼul ni anchanu pan. 5Ex vachuʼ naul ni Jesús: —Ni kitʼin yu Sasʼatʼa Lapanaki klhinajun tisuncha lay makakan ni xajulchan jastaknati. 6Ex ataun xajulchan jastaknati val. Ni Jesús tanul laqa chaqaʼ taʼan ixtataqxtoʼa ni israelitas, ancha masul ixchivinti Dios. Ancha ixʼalinta qayntaun lapanaki yu jantu lay ixmapuʼay ixlhijakanaj makaʼ. 7Yu ixtamasuy ixlhachimoʼonkʼan ni israelitas ali yu fariseos ixtalaqtsʼintanuy ni Jesús. Incha kakʼuchʼul mas va xajulchan jastaknati ex lay kataputislajmal. 8Pero ni Jesús ixkʼatsaycha yu ixtatʼajun pastaknan. Ex junil ni lapanaki yu jantu lay ixmapuʼay ixmakaʼ: —Kaʼostʼaycha, kʼatʼanʼajtʼaycha aniy. Ex ni lapanaki ostayalcha, va ancha tayal. 9Ex ni Jesús lakjunil yu alati: —Kaklalhisakmiyau taun tuʼuchun. ¿Ni xajulchan jastaknati tas lhinajun kilhachimoʼonkʼan? ¿Lhinajun kʼamakʼatʼi yu ox u va lhinajun kʼamakʼatʼi yu talaqalhin? ¿Lhinajun kʼamalaqtʼaxtʼutʼi u va lhinajun kʼamaqnitʼi? ¿Tas lhinajun? 10Ex ni Jesús jalaqtsʼil tachun yu ixtamalaqachoqoxnuta ex junil ni lapanaki: —Kʼaxnujtʼi mimakaʼ. Ex ni lapanaki xnujlhi ixmakaʼ, oxicha junchoqol. 11Pero ni fariseos kun yu ixtamasuy ixlhachimoʼonkʼan ni israelitas ayaj talukujlal. Aqtaylcha talaxaqalay, va talalhisakmiy tisuncha lay katamakanil ni Jesús. 12Tejkan chuncha ixtiʼukxuntayay, ni Jesús al skʼiniʼ Dios laqataun aspajun. Ancha taun tatsʼis tʼachivinil Dios. 13Tejkan tunkunchoqol lakjuntaʼil ixtʼaltanan, jalaksaklhi pumakautʼuy, va jalakʼulal ixtamalaqachan. 14Laksaklhi Simón, yu Jesús junil Pedro. Vachuʼ Andrés yu ixtʼalaqajun ni Simón. Vachuʼ Jacobo ali Juan ali Felipe ali Bartolomé 15ali Mateo ali Tomás ali Jacobo istsʼal ni Alfeo ali Simón yu ixjunkan Zelote. 16Vachu Judas ixtʼalaqajun ni Jacobo y vachuʼ aputaun yu ixjunkan Judas Iscariote yu astan maqxtaqlhi ni Jesús. 17Ni Jesús laktʼatajuminchal ixtʼaltanan ni laka aspajun. Tachinchal taʼan akpujunan, ancha tatayal. Vachuʼ ixtaʼalinta pumalhuu ixtʼaltanan kun pumalhuu yu machaqan xaʼestado Judea, yu machaqan Jerusalén, vachuʼ yu machaqan laka putaulan Tiro ali Sidón. Tachinchal para kataqalasmaklhi ni Jesús y vachuʼ para kalajkʼuchʼukal ixtaqanʼatkʼan. 18Vachu ni Jesús palay jalakmakal ni lapanakni yu jamamaqanlqajnivay ni jantu ox espíritus. 19Tachun ni lapanakni ixtachʼapaputun ni Jesús, ixtapʼasta taxtuniy para kalajkʼuchʼul ni taqanʼanin tejkan lakpiklay. 20Ex ni Jesús jalaqtsʼil ixtʼaltanan, va lakjunil: —Lajʼox kaxajtachal mijatsukuntikʼan ni uxiknankʼan kilpatanin, tapaxtoqniyan kʼatʼanutʼikcha taʼan lhachimoʼonun ni Dios. 21’Lajʼox kaxajtachal mijatsukuntikʼan yu chavay chʼavanitʼikcha, astan kʼaʼotsʼayapitik. ’Lajʼox kaxajtachal mijatsukuntikʼan yu chavay alhunatʼik, astan kʼalajʼachʼanapitik. 22’Lajʼox kaxajtachal mijatsukuntikʼan tejkan taxkayyan ni lapanakni, tejkan jantucha tatʼaltananputunan, tejkan talaktuʼuyan, vachuʼ tejkan tamanuniyan jalaklkanti por kilapanakni untʼatʼik ni kitʼin yu kval Sasʼatʼa Lapanaki. 23Ayaj kalhiʼachʼantʼaʼutʼik kun lhuu achati ni anchanu julchan tejkan chuncha katamakaniyan. Ay kunaʼ milhilhajatkʼan ni laktʼiyan. La maqancha ixpayankʼan vachuʼ jantu ixtalaqtsʼinputun yu ixtalaqputeʼey ixchivinti ni Dios. 24’Pero payniʼincha yu uxiknankʼan maqalinin, vamun chavay lhitʼaunatʼik achati. 25’Payniʼincha ni uxiknankʼan yu chavaycha tus ox otsʼatʼatʼik, astan kʼachʼavanapitik. ’Payniʼincha ni uxiknankʼan yu chavaycha achʼanatʼik, astan kʼamaʼaninanapitik y kʼalajʼalhunapitik. 26’Incha tachun ni lapanakni tanajun lajʼoxi lapanakni untʼatʼik, ex payniʼincha ni uxiknankʼan. Maqancha ixpayankʼan vachuʼ talakjunil lajʼoxi lapanakni yu jamakanunun, yu ixtanajun ixtalaqputeʼey ixchivinti Dios. 27’Pero uxiknan yu kilaqalasmatʼau, klajunau kapʼaxkʼatʼik mintʼalaxkayninkʼan. Kʼamakʼanitʼik lajʼoxi yu taxkayyan. 28Kʼalaklhitʼapʼaynitʼik yu ox yu tanajun jantu ox kʼatʼapʼasatʼik. Kaskʼinitʼik Dios yu tamakaniyan laqtaqal. 29Incha matichun palaqstisayan va kaxtʼaqnin aminpalaqxtitaun. Incha matichun kamaxtunin minkutun, kamakʼaunincha vachuʼ kalhaʼalcha mixkujuʼ. 30Incha matichun skʼiniyan taun tuʼuchun kaxtʼaqnin. Incha tamaxtuniyan yu minavin, jantucha maqskʼiniy kaskʼinichʼoʼo. 31Kalakmakʼanitʼik yu alati vachu va tacha naunatʼik katamakanin. 32Incha pʼaxkʼayatʼik vamun yu tapaxkayan, ¿ex tisuncha xtapal kaval? Yu talaktuʼunun vachu va chuncha talapaxkay. 33Incha makʼaniyatʼik lajʼoxi vamun yu tamakaniyan lajʼoxi, ¿ex tisuncha xtapal kaval? Yu maqtaqalhinin vachu va chun talamakaniy. 34Incha machʼixtʼaqniyatʼik vamun yu lay katamapalnichoqoyan, ¿ex tisuncha xtapal kaval? Yu maqtaqalhinin vachu va chun talamachʼixtaqniy para katalaqaʼichoqol. 35Kʼalakpʼaxkʼatʼik mintʼalaxkayninkʼan, kʼalakmakʼanitʼik yu lajʼoxi, kʼaxtʼaqnitʼik yu taskʼiniyancha mas jantu kataxtaqnichoqoyan. Ex ay kunaʼ milhilhajatkʼan, vachuʼ kʼaʼunapitik sasʼatʼan Dios. Ni Dios lakmapayniy mas yu jantu tapaxkajlaqtsʼin ali yu talaktuʼunun. 36Kamapʼayninitʼik vachu va tacha mimPay Dioskʼan tamapayniyan. 37’Jantu kʼalakmukʼanitʼik laqtaqal yu alati lapanakni ex ni uxiknan jantu katamukʼaniyan laqtaqal ni Dios. Jantu kʼamukʼatʼik maqanlqajnati, ex jantu katamukʼaniyan maqanlqajnati. Kʼalamalaqmixinitʼik, ex katamalaqmixiniyan. 38Kʼalaqxtʼaqnitʼik yu tamaqskʼiniy ex kaxtʼaqnikʼanapitik yu maqskʼiniyatʼik. Kataxtaqniyan kun taun papulkan yu ox jakʼalhamunti, ox jakʼauksmunti y ox jatsʼiuksmunti. Katapuxtaqniyan ni uxiknankʼan vachu va tacha japʼuxtʼaqniyatʼik yu alati. 39Ex ni Jesús lakjunil taun chivinti yu xtaʼa jatapastakʼati, va naul: —Qayntaun laʼachʼix jantu lay kamapʼulal aqayntaun laʼachʼix. Katataqalqosaʼ ixlaʼatʼuykʼan, va chʼantaun katalaqpaʼaʼ laka pusanjan. 40Jantu matichun yu malanikanta apalay ay xajantu yu jamalaniy. Tejkan kalaniʼoyaʼ, ex vachu va chun kunaʼ tacha ixjamalaniniʼ. 41’¿Valiʼiycha makʼay kuenta yu lakatʼuniy laqtaqal yu makay qayntaun milaqaj pero jantu makʼay kuenta yu la ay laqtaqal yu makʼay uxintʼi? Va tacha laqtsʼiniy xatalvayanti kʼiu yu lakputanun la ixlaqchul milaqaj, pero jantu makʼay kuenta yu la milaqchul va lakputanun maqaʼay kʼiu. 42Chavay incha lakputanun ni maqaʼay kʼiu la milaqchul, ¿ex valiʼiycha uniy milaqaj: “Kakmaxtuniyan yu xatalvayanti kʼiu yu lakputanun la milaqchul”? Va tʼuy ukxpuʼ makʼay. Maqskʼiniy pʼunaj kʼamaxtʼuʼel ni maqaʼay kʼiu yu lakputanun la milaqchul, ex chuncha apalaycha ox kʼalakʼavananeʼe para kʼamaxtʼunin xatalvayanti kʼiu yu lakputanun la ixlaqchul milaqaj. 43’Jantu tʼujuʼ ox kʼiu yu xtaʼa xaʼunikan yu jantu ox kaval. Nisin jantu kaʼalilcha kʼiu yu jantu ox kaval yu xtaʼa xaʼunikan yu ox. 44Tachun kʼivinan pumispakan ni xaʼunikan yu xtaʼa. Jantu lay kʼapʼuxtʼi higo laka jaltukun, vachuʼ jantu lay kʼapʼuxtʼi uvas taʼan valiʼiy jakʼivinan. 45Yu ox lapanaki, la ixjalhanuti maʼata yu lajʼoxi, ancha maxtuy yu lajʼoxi chivinti. Yu laktuʼunuʼ lapanaki la ixjalhanuti maʼata yu jantu lajʼoxi kaval y ancha maxtuy chivinti yu jantu lajʼox. Va kiltaxtuy ixchivinti tacha najun ixjalhanuti. 46’¿Valiʼiycha kilajunau ni uxiknankʼan, kiJalhachimoʼonu, kiJalhachimoʼonu, pero jantu makʼayatʼik yu klalhijunau? 47Chavay klajunau tacha junita yu kinqalasmatʼa y makay tacha yu kitʼin klhinajun. 48Yucha va tacha qayntaun lapanaki yu makal aqataun chaqaʼ. La pulman maknunil ixputayan, va si kun chiyux. Ex tejkan aynlhi ni laʼaxkan talakanunil kun tachun ixtapʼasta para kamaqtal ni anchanuʼ chaqaʼ. Pero jantu tsʼuniy kapiklal, va lhitʼajun ixputayan si chiyux. 49Pero yu qasmatʼa kinchivinti incha jantu makay yu kitʼin klhinajun, yucha va tacha qayntaun lapanaki yu makal ixchaqaʼ lakatʼun, jantu kun xaputayan. Ex tejkan aynlhi ni laʼaxkan talakanunil kun tachun ixtapʼasta, va tus tachun lakpujʼol, laqcheʼeʼol, va aqtaun lhaʼanʼol.

will be added

X\