SAN LUCAS 21

1Ex chuncha taʼan ixvil ni Jesús lakatajtan va lakavanal, va jalaqtsʼil ni maqalinin ixtamujuy ixlimosnajkʼan laka kajun. 2Ex ancha laqtsʼil qayntaun kilpataniʼ tiyau va mujul aqxtʼuy lakstʼuniy tumin. 3Ex va naul ni Jesús: —Laqsaval klajunau yu aniy kilpataniʼ tiyau apalay lhuu xtaqlhi xajantu yu alati lapanakni. 4Yuʼuncha mas va taxtaʼa laqlhuu pero taxtaʼa vamun yu tamaxajniyachal. Chavay ni kilpataniʼ tiyau mas va tsʼuniy tumin yu xtaqlhi pero va xtaqʼol tachun yu ixputapasay. 5Ex chuncha lati ixtatʼajun lhichivinin yu la ay lakatajtan. Ixtanajun va kun la lajkʼus chiyux ixmaxantilakanta y vachuʼ kun yu la kʼus axtoqnuʼ yu taxtaqlhi lapanakni. 6Pero ni Jesús lakjunil: —Kaminaʼ julchan tejkan tachun yu laqtsʼinatʼik kalaqcheʼeʼokanaʼ, jantu katamakaunaʼ chiyuxin yu katalaʼakltankukʼataulal. 7Ex chuncha talhisakmil: —Jamalaniniʼ, ¿tavanancha chuncha katapasayaʼ? Tejkan va laycha chuncha katapasal, ¿tas kakpukʼatsayaucha? 8Ex va naul ni Jesús: —Kʼalhistʼajkʼantʼikcha para jantu matichun katamakanun. Kataminaʼ qaynlhuu la kintaqaʼuti y katanaunaʼ: “Kitʼin ni Cristo”; y katanaunaʼ: “Chavaycha kamiʼoyaʼ ni lakamunukpaʼ.” Pero uxiknankʼan jantu kʼalaktʼapʼintʼik. 9Tejkan kaʼasmaktʼapitik la alin lhilukuj ni lakamunukpaʼ y tejkan katalachʼapayaʼ ni lapanakni kun lhachimoʼonun ex jantu katʼalhanantʼik. Chuncha maqskʼiniy pʼunaj katapasal. Pero tejkan chuncha kunaʼ jantukaʼ kamiʼoyaʼ ni lakamunukpaʼ. 10Ex chuncha taylhaʼal ixchivinti ni Jesús, va lakjunil: —Yu oqxlaqtaun lapanakni katalachʼapayaʼ kun aʼoqxlaqtaun lapanakni. Yu laqataun pais katalachʼapayaʼ kun ataun pais. 11Kalaklayaʼ lakatʼun lakalhuu lakamunukpaʼ y lakalhuu kaʼalinaʼ chavan y lakalhuu kaʼalinaʼ taqanʼati. Vachuʼ kaʼalinaʼ la ay talhanti laktʼiyan y va yucha katapukʼatsayaʼ ni lapanakni va laycha kamiʼol ni lakamunukpaʼ. 12Pero pʼunaj tejkan jantukaʼ chuncha katapasayaʼ katachʼapayan, katamamajkʼatsanivayan, katamaqxtaqniyan yu xalajʼay lapanakni laqa chaqan taʼan tataqxtoʼa ni israelitas. Kalhipʼinikʼanapitik yu lajʼay lapanakni kun yu jalhachimoʼonun. Kalhipʼinkʼanapitik laka pachʼin. Va si chun katapasayaʼ por kilapanakni untʼatʼik. 13Pero tejkan chuncha katapasayaʼ ex laycha kʼachʼivinapitik para kintamispal. 14Pero kapʼastʼaktʼik la melhanutkʼan ni jantu katapastakʼun tas laycha kʼapʼuʼaltʼayanantʼik tejkan katamukʼaniyan laqtaqal. 15Ni kitʼin klaxtaqniyau chivinti kun jatapastakʼati. Chuncha tachun mintʼalaxkayninkʼan katakʼatsayaʼ va laqsaval yu naunatʼik, jantu lay katanaul yu jantu laqsaval yu naunatʼik. 16Mas va mimpaykʼan u minatikʼan katamaqxtaʼan. Mas va mintʼalaqaunin u miʼamigoskʼan katamaqxtaʼan. Lati yu uxiknankʼan kʼamaqnikʼanapitik. 17Tachun ni lapanakni katalhixkayan por kilapanakni untʼatʼik. 18Pero jantu kamaʼatsʼanʼayapitik metsukuntikʼan mas va maqataun miʼajikʼan. 19Mas va lhitaʼay kunaʼ incha kilalhakapuʼanʼalhiyau ex kʼalhitsʼukʼuyapitik jatsukunti. 20’Tejkan kalaqtsʼinapitik va katamalaqachoqoxnuyaʼ ni tropas ni aniy putaulan yu Jerusalén. Chuncha kakʼatsʼayapitik va niman kalaqmaqniʼokanaʼ xalapanakni. 21Tejkan chuncha katapasayaʼ, ex yu tavilanal xaʼestado Judea maqskʼiniy kataqoslhi laka aspajunuxnan. Yu tavilanal aniy laka ay putaulan maqskʼiniy katataxtul y yu tavilanal ixlhimaqspa ni putaulan jantu katatanul. 22Ni anchanu julchan kaʼalinaʼ maqanlqajnati por yu talaqalhin. Chuncha laqsaval kunaʼ tachun yu tsʼoqkanta la ixchivinti Dios. 23¡Payniʼincha xanatin yu jaʼaynan katajunaʼ anchanuʼ julchan, vachuʼ yu katalhitsukuyaʼ lakstʼuniy sasʼatʼakʼan yu lhimatsʼikʼiti! La kaʼalina maqanlqajnati aniy la kintʼunkʼan y ni Dios ayaj katalqaunaʼ kun yu aniy lapanakni. 24Lati kalaqmaqnikanaʼ laka lhilukuj. Lati kalakchʼikanaʼ, kalaklhaʼankanaʼ ixlhilakalhuu lakamunukpaʼ. Yu aniy la ixputaulankʼan Jerusalén katataulaʼ yu jantu israelitas kataval tus tejkan kamiʼoyaʼ julchan yu lakʼulanikanta. 25’Ex chuncha laktʼiyan katatapaxayaʼ ni julchan kun ni malkuyuʼ kun ni jastʼakun para katapulakpastaknal. Aniy lakatʼun la katatalhananaʼ ni lapanakni, jantu katamalaqasiyaʼ tejkan ayaj kamakatʼaunaʼ ni lakamar. 26Jantucha katalhitsukuyaʼ tapʼasta por ixtalhantikʼan y va por la katapastakʼuyaʼ tisuncha katapasayaʼ lakamunukpaʼ. Ni julchan ali ni malkuyuʼ ali ni jastʼakun kataxkapʼiknanaʼ. 27Ex chuncha katalaqtsʼinaʼ ni Sasʼatʼa Lapanaki, va kaminaʼ laka taputsʼi, kaminaʼ kun ixtapʼasta y tachun ixʼayaxtu. 28Tejkan chuncha kaʼaqtayniyacha ex kʼaʼachʼantʼik, y kʼatalaqstʼatʼik kun achati. Tejkan chuncha kunaʼ ex kʼalaqtʼaxtʼuyapitikcha. 29Ex lakjunil ataun chivinti yu xtaʼa jatapastakʼati, va naul: —Kʼalaqtsʼintʼik ni kʼiu yu junkan higuera, u va taʼayucha kʼiu kaval. 30Tejkan kalaqatajuyaʼ xaxqoy ex meʼemankʼan kʼatsʼayatʼik ni taʼukstsʼuniycha ni lhikʼatsa. 31Vachu va chun tejkan kalaqtsʼinapitik ni chuncha tʼajun tapasanaʼ aniy lakamunukpaʼ yu tacha klajuniu, ex va chuncha kakʼatsʼayapitik ni taʼukstsʼuniycha tejkan Dios kalhachimoʼonunaʼ. 32Laqsaval klajunau, ni lapanakni yu chavay tatʼajun, jantukaʼ kataniʼoyaʼ tus katapasaʼoʼelayaʼ yu klajuntau. 33Yu lakatʼun kun laktʼiyan katamiʼoyaʼ pero yu kinchivinti jantu aqtaun kamiʼoyaʼ. 34Kʼalhistʼajkʼantʼikcha para jantu pʼas kʼamakʼatʼik melhanutikʼan por mintaʼapʼatikʼan nisin por yu makʼapʼutʼunatʼik la milakatunajkʼan, y jantu kʼatʼapʼastakʼun tacha kʼapʼutʼapʼasayapitik la metsukuntikʼan. Ni anchanuʼ julchan va tsʼalaj kachinaʼ. 35Kaminaʼ tacha laqataun patʼal yu tsʼalaj putaqtay, va kalaqmaqsvaʼoyaʼ ni lapanakni yu tavilanal talakachux ni lakamunukpaʼ. 36Lhistujcha kʼaʼuntʼik, va si kaskʼintʼik Dios para lay kʼapʼulaqtʼaxtʼutʼik tachun yu katapasayaʼ. Ex chuncha lay kʼapʼulaqchʼipʼintʼik ni Sasʼatʼa Lapanaki. 37Tejkan tunkuj, ni Jesús ixlakmalanin laka ay ixlakatajtankʼan ni israelitas. Chuncha tejkan tsʼis, ixʼan loqojnuʼ taʼan junkan xaʼaspajun Olivos. 38Tachun ni lapanakni vakuj ixtalaqʼan ni Jesús ni ay lakatajtan. Va ixtaʼan qasmaknan ixchivinti.

will be added

X\